A boskopu gi Gog
1MASRA taki nanga mi, A taigi mi taki: 2“Manpikin fu libisma, luku go na Gog, a bigi tiriman fu Mesek nanga Tubal, ini a kondre fu Magog, dan yu e taki san Mi e gi yu fu taki. 3Taki: ‘Na disi Masra MASRA e taki: Gog, bigi tiriman fu Mesak nanga Tubal, Mi o strafu yu! 4Mi e kon teki yu. Dan Mi o naki aka psa na yu kakumbe èn meki yu hari gwe nanga a heri legre fu yu: nanga asi èn nanga den man di e tyari den asi, alamala nanga ala den fetisani. Wan bigi legre nanga bigi èn nanga pikin schild, soso srudati di sabi feti bun nanga deigri. 5Dan yu abi owktu den srudati fu Persia, fu Nubia, nanga fu Libia, alamala nanga schild èn nanga den fet'ati. 6Gomer nanga ala den grupu fetiman fu en taki pe yu poti mi. Bet-Togarma nanga ala den grupu fetiman fu en fu fara na noordsei: a no pikinso folku de nanga yu. 7So, meki yusrefi klari gi a feti, yu nanga a heri bun bigi grupu di de nanga yu èn yu mus de a tiriman fu den. 8Baka wan heri pisten yu o kisi wan komanderi fu hari go feti nanga wan kondre di no kmopo langa ini wan bigi feti, wan folku di kmopo ini furu folku èn kon na wan tapu den bergi fu Israel. Den e libi tiri fu den drape den wawan. 9Dan un o hari go na en tapu leki wan tranga winti. Un o de leki wan wolku di e tapu a kondre, yu nanga ala den grupu fetiman fu yu nanga den furu folku di de nanga yu.
10Na disi Masra MASRA e taki: Te a ten dati doro yu o prakseri fu du wan ogri. 11Yu o taki: Mi o hari go feti nanga a kondre dati, a kondre di abi foto sondro skotu srefi. Mi o hari go feti nanga den sma dati di e libi tiri fu den, di e libi ini freide ini den foto di no abi skotu, bigi doro nanga greni. 12Yu o go drape fu fufuru ala san yu man feni tyari gwe, fu feti nanga a broko pranasi pe sma e libi baka. A folku dati kmopo ini den kondre fu den tra folku èn kon na wan, wan folku di tyari meti nanga tratra sani kon na wan èn di e libi leti na mindrisei fu grontapu. 13Den sma fu Seba, fu Dedan, den baiman nanga den seriman nanga den bigiman fu kondre fu Tarsis o taigi yu taki: Na kon yu kon fufuru ala sani tyari gwe? Na tyari yu tyari ala den grupu fetiman kon na wan fu kon teki den sma sani? Fu teki solfru nanga gowtu tyari gwe, fu feni furu sani teki tyari gwe?’
14Dat' meki, manpikin fu libisma, taki san Mi e gi yu fu taki. Taigi Gog taki: ‘Na disi Masra MASRA e taki: Yu o sabi bun te Israel, a pipel fu Mi, e libi tiri fu den. 15Dan yu o kmopo kon fu a tanpresi fu yu di fara na noordsei, yu nanga den furu folku di de nanga yu, soso fetiman tapu asi, bun furu, wan bigi legre. 16Dan leki wan wolku di e tapu a kondre yu o hari go fu feti nanga Israel, a pipel fu Mi. Disi o psa wan fu den ten disi. Mi o meki yu hari kon fu kon feti nanga a kondre fu Mi. Dan te den tra folku o si san Mi o du nanga yu, Gog, den o leri sabi Mi.
17Na disi Masra MASRA e taki: Na yu na a wan abra san Mi ben meki den knekti fu Mi, den profeiti fu Israel, taki langa di psa dati Mi ben o meki yu hari go fu feti nanga a pipel fu Mi.
18Ma te a ten doro di Gog o kon ini Israel, Masra MASRA e taki, dan a hebi atibron fu Mi o kmopo ini noso leki smoko, 19dan Mi o taki disi fu di Mi dyarusu èn ini a faya fu a hebi atibron fu Mi: Tapu a dei dati a gron fu Israel o seki wan hebi seki. 20Iya, den fisi fu den se, den fowru di e frei na loktu, den krasimeti, ala san e kroipi na gron, nanga ala sma na grontapu o beifi gi Mi. Bergi o fadon, bergiston o broko fadon, èn ala den skotu fu foto o fadon broko. 21Dan Mi o meki ala sortu bigi ogri miti Gog na tapu ala den bergi fu Mi, Masra MASRA e taki. Den man fu en o kiri makandra nanga den deigri. 22Mi o strafu Gog nanga takrusiki nanga brudu di o lon drape. Mi o meki hebi alen nanga pis'pisi ijs, nanga faya èn nanga kroiti fadon na tapu en, tapu den grupu fetiman, nanga tapu ala den folku di de nanga en. 23Mi o sori Misrefi na tapu wan bigi èn santa fasi. Te Mi o sori Misrefi furu folku o sabi taki Mi de MASRA.’
