1Manpikin fu libisma, taigi Gog san Mi e gi yu fu taki. Taigi en taki: ‘Na disi Masra MASRA e taki: Yere, Gog, bigi tiriman fu Mesek nanga Tubal, Mi o strafu yu! 2Mi o kon teki yu, Mi o srepi yu tyari gwe. Mi o meki yu hari kmopo fu fara na noordsei dan Mi o tyari yu go na tapu den bergi fu Israel. 3Dan Mi o naki a bo puru fu a kruktu anu fu yu nanga den peiri fu a leti anu fu yu. 4Tapu den bergi fu Israel yu o dede, yu nanga ala den grupu fetiman fu yu èn nanga den folku di de nanga yu. Mi o meki un tron nyanyan gi ala sortu bigi fowru nanga gi krasimeti. 5Owktu ini a wei un o dede. Na Mi taki en, Masra MASRA e taki. 6Mi o sutu faya gi Magog, nanga mindri den sma di e libi tiri fu den ini den kondre na a syoro fu a se. Dan den o sabi taki Mi de MASRA. 7Mi o meki a pipel fu Israel kon sabi a santa nen fu Mi. Mi no o meki den doti a santa nen fu Mi moro tu. Dan den folku o sabi taki Mi, MASRA, de a santawan fu Israel.
8A e kon, a o psa, Masra MASRA e taki: a dei fu san Mi taki. 9Baka a dei dati den sma fu Israel o kmopo ini den foto fu den kon teki den fetisani fu den fu meki udu faya. Seibi yari langa den o man meki faya nanga den bigi nanga den pikin schild, den bo nanga den peiri, den bigi tiki nanga den lansri. 10Den no o abi fu go teki udu ini a wei noso fu koti na busi, bika nanga den fetisani dati den o meki den udu faya. So den o fufuru den sani fu den feyanti di ben kon fu fufuru den, den o teki ala den sani fu den di den libi na baka, Masra MASRA e taki.
11A ten dati Mi o sori den Israelitisma pe fu Israel den mus beri Gog: den mus beri en ini a Abiramdal, na oostsei fu a Dede se. A grebi dati, pe Gog nanga a bun bigi legre di ben de nanga en o beri, o tapu a pasi fu sma no kan hari psa drape moro. Sma kari drape now: A dal fu a bun bigi legre fu Gog. 12A pipel fu Israel o beri den fu krin a kondre, èn a o teki seibi mun langa fu du dati. 13Iya, ala sma fu a kondre o teki prati fu beri den dedeskin, èn dati o de wan grani gi den tapu a dei di Mi e sori o bigi Mi de, Masra MASRA e taki. 14Dan a pipel sa poti wantu man fu hari psa dorodoro ini a kondre fu beri den dedeskin di didon ete na gron, fu krin a kondre a fasi dati. Na a kba fu den seibi mun den sa bigin teki waka. 15Te den e hari psa ini a kondre èn den si libisma bonyo, den sa poti wan marki na den, fu den wan di e beri den dedeskin kan si den èn beri den tu ini a Dal fu a bigi legre fu Gog. 16Na a fasi dati den sa krin a kondre. Wan foto o kon leti drape ini a birti tu di o nen: Bun bigi legre.’
17Manpikin fu libisma, na disi Masra MASRA e taki: Taigi ala den difrenti sortu bigi fowru di e frei na loktu nanga ala den krasimeti taki: ‘Un kon na wan, dan un kon, un hari kmopo fu alasei kon. Un kon nyan a ofrandi di Mi srakti gi unu, na wan bun bigi ofrandifesa tapu den bergi fu Israel. Un kon nyan meti èn un kon dringi brudu. 18Na a meti fu dyadya fetiman un o nyan èn na a brudu fu tiriman fu grontapu un o dringi. Mi o srakti den leki fa sma e srakti man skapu, yongu skapu, man krabita nanga bulu. Den o de leki den meti fu Basan di kweki kon fatu. 19Un o nyan a fatu fu den te un no man moro èn un o dringi a brudu fu den te un drungu. Na wan ofrandifesa pe Mi srakti sani gi unu. 20Iya, un o nyan te un no man moro na a tafra fu Mi. Un o nyan asi nanga den man di ben tyari den asi, un nyan dyadya fetiman nanga ala sortu tra fetiman, Masra MASRA e taki. 21Na a fasi dati Mi o sori den folku a glori fu Mi. Ala den folku o si fa Mi strafu den èn fa Mi sori a krakti fu Mi.
22Kmopo fu a dei dati a pipel fu Israel sa sabi taki Mi, MASRA, de a Gado fu den. 23Èn den folku o sabi taki a pipel fu Israel de leki strafuman ini wan dorosei kondre fu den kruktudu fu den ede. Fu di den drai baka gi Mi fu go dini kruktu gado meki Mi ben drai Mi fesi gi den èn gi den abra ini a makti fu den feyanti di kiri den nanga den deigri. 24Mi du so nanga den, èn Mi drai Mi fesi gi den fu a doti di den doti densrefi nanga fu den ogri di den du. 25Dat' meki, na disi Masra MASRA e taki: Na now Mi o tyari wan kenki kon gi den bakapikin fu Yakob, Mi o sorgu baka gi a heri pipel fu Israel, bika a santa nen fu Mi mus tan hei. 26Te den o libi tiri fu den baka ini a kondre, èn sma no e kon meki den skreki moro, den o fergiti a syen di den kisi nanga ala den leisi di den drai baka gi Mi fu go dini kruktu gado. 27Mi o puru den mindri den dorosei folku, puru den ini den kondre fu den feyanti tyari kon na wan. Nanga dati bun furu folku o si dati Mi na a Santawan. 28A folku fu Mi srefi o sabi taki Mi na MASRA, a Gado fu den. Den o sabi taki te Mi tyari den gwe leki strafuman go na mindri tra folku, nanga te Mi e tyari den kon na wan baka ini den eigi kondre, sondro fu Mi libi wan fu den srefi ini a kondre pe den ben de. 29Èn te Mi o meki Mi Yeye kon bogobogo na den tapu Mi no o drai Mi fesi moro gi den, Masra MASRA e taki.’ ”
