Esekiyel 8

₁Ini a di fu siksi yari, tapu a di fu feifi dei fu a di fu siksi mun, den edeman fu den sma fu Yuda ben de na mi ini mi oso. Ne wantronso a krakti fu Masra MASRA kon baka na mi tapu. ₂Di mi luku, mi si wan sani leki wan libisma di ben de fu faya. Fu en ondrobere go na gron ben de fu faya. Fu en bere go na loktu ben e koti faya, a ben e brenki, leki weti gowtu. ₃Dan a langa wan sani leki wan anu èn a grabu mi hori na mi wiwiri. Dan ini a sani di Gado ben e sori mi, a yeye opo mi, mindri heimel nanga grontapu, tyari go na Yerusalem. A tyari mi go leti fesi a doro fu a pren, di ben de tapu a dyari fu a tempel, a doro di ben e luku go na noordsei. Na drape a popki fu a kruktu gado ben de, a groskin sani di e wiki a atibron fu Gado. ₄Ne mi si a glori fu a Gado fu Israel drape tu, leki fa mi ben si ini a dal na a Kebarliba. ₅Dan Gado taigi mi taki: “Manpikin fu libisma, luku go na noordsei!” Mi luku go na noordsei, dan mi si a popki fu a kruktu gado ben tnapu na a bigin fu a Altarpoort, a popki di e wiki a atibron fu MASRA. ₆Dan Gado taigi mi baka taki: “Manpikin fu libisma, yu e si san den sma fu Israel e du? Yu e si den bigi groskin sani di den e du, den sani di e meki Mi abi fu tan fara fu a santa presi fu Mi? Ma yu o si moro bigi groskin sani ete.”

₇Baka dati A tyari mi go pe yu e psa go tapu a pren fu a tempel. Dan mi si dati a skotu ben abi wan olo. ₈Ne A taigi mi taki: “Manpikin fu libisma, psa ini a olo go na a tra sei.” Mi psa ini a olo fu a skotu dan mi si wan doro. ₉Dan A taigi mi taki: “Go na inisei go si den bigi groskin sani di den e du dyaso.” ₁₀Ne mi go na inisei dan mi luku èn mi si ala sortu prenki fu groskin sani di ben tyerfi na a skotuskin: prenki fu meti di e kroipi nanga tra sortu meti, nanga fu ala den kruktu gado di den sma fu Israel ben e anbegi. ₁₁Seibitenti fesiman fu Israel ben tnapu fesi a skotu. Yasanya, a manpikin fu Safan ben de na den mindri. Iniwan fu den ben hori wan pan ini en anu ini san wierook ben e bron èn a smoko fu en di ben abi wan switi smeri ben e opo go na loktu. ₁₂Dan Gado taigi mi taki: “Manpikin fu libisma, yu e si san den fesiman fu Israel e du kibrikibri, drape ini a bigi kamra di furu nanga prenki fu kruktu gado. Den e tak' srefi taki: ‘MASRA no e si unu. MASRA gwe libi a kondre.’ ”

₁₃Gado taigi mi moro fara taki: “Yu o si moro fu den groskin sani di den e du.” ₁₄Dan A tyari mi go leti fesi a doro di de na noordsei fu a oso fu MASRA. We, umasma ben sidon drape e krei gi a gado Tamuz. ₁₅Ne A aksi mi taki: “Yu si dati, manpikin fu libisma? Ma Mi o sori yu moro bigi groskin sani di den e du.”

₁₆Dan A tyari mi go tapu a inisei pren fu a oso fu MASRA. We, drape, mofo a doro fu a tempel fu MASRA, mindri a fes'sei gadri nanga a altari, sowan tutenti-na-feifi man ben de. Den ben drai den baka go na a tempel nanga den fesi go na oostsei. So, nanga den fesi go na a oostsei, den boigi e anbegi a son. ₁₇Ne A aksi mi taki: “Yu si dati, manpikin fu libisma? Èn den groskin sani dati di a pipel fu Yuda e du no sari den, bika soso ogri den e du tu ini a kondre. Luku fa den e afrontu Mi dorodoro. Luku, wan droifi taki srefi den e hori na den noso. ₁₈Na dat' meki Mi o strafu den ini Mi hebi atibron. Mi no o sori sari-ati, Mi no o sari no wan fu den. Awinsi den e bari bun tranga na Mi yesi, Mi no o arki den.”