Esra e go na Yerusalem
1Furu yari baka dati, di kownu Artaksasta ben e tiri Persia, wan man di ben nen Esra hari kmopo fu Babilon. Esra ben de a manpikin fu Seraya, Seraya ben de a manpikin fu Asarya, Asarya ben de a manpikin fu Hilkia, 2Hilkia ben de a manpikin fu Salum, Salum ben de a manpikin fu Sadok, Sadok ben de a manpikin fu Akitub, 3Akitub ben de a manpikin fu Amarya, Amarya ben de a manpikin fu Asarya, Asarya ben de a manpikin fu Merayot, 4Merayot ben de a manpikin fu Serakya, Sekarya ben de a manpikin fu Usi, Usi ben de a manpikin fu Buki, 5Buki ben de a manpikin fu Abisua, Abisua ben de a manpikin fu Pinekas, Pinekas ben de a manpikin fu Eleasar, Eleasar ben de a manpikin fu Aaron a granpriester. 6Na a Esra disi hari kmopo fu Babel. A ben de wan koniman di ben sabi a wèt fu Moses bun, a wèt di MASRA, a Gado fu Israel, ben gi. Fu di MASRA, a Gado fu en, ben de nanga en, meki kownu ben gi en ala san a ben aksi en. 7A ben de ini a di fu seibi yari di kownu Artaksasta ben de na makti, di Esra hari gwe na Yerusalem, makandra nanga wantu priester, Lefitiman, singiman fu a tempel, waktiman fu a tempel, knekti fu a tempel nanga tra Israelitisma. 8Den doro na Yerusalem ini a di fu feifi mun fu a yari dati. 9Den ben kmoto na Babel tapu a fosi dei fu a fosi mun, èn fu di Gado ben de nanga en, a doro na Yerusalem tapu a fosi dei fu a di fu feifi mun. 10Bika Esra ben teki a besroiti fu ondrosuku a wèt fu MASRA finifini, fu du san a wèt e taki, èn fu leri den Israelitisma den sani di den mus tan du nanga den sani na san den ben mus tan hori densrefi.
11Priester Esra ben de wan man di ben sabi a wèt fu Gado bun. A ben sabi den gebod bun di MASRA ben gi Israel, nanga den sani di den ben mus tan du. Di a ben o gwe, kownu Artaksasta gi en wan brifi. na disi ben skrifi ini a brifi:
12“Fu Artaksasta, a kownu fu ala kownu, gi priester Esra, a sabiman fu a wèt fu a Gado fu heimel. Mi e winsi yu ala bun!
13Mi komanderi tak' ibri priester, Lefitiman noso tra Israelitisma ini a kondre di mi e tiri, di wani go na Yerusalem, kan go nanga yu. 14Bika a de so tak' na kownu nanga den seibi raiman fu en e seni yu go na Yuda nanga Yerusalem fu ondrosuku efu den sma e hori densrefi na a wèt fu a Gado fu yu, a wèt di yu abi. 15Yu mus tyari a solfru nanga a gowtu gwe tu, di mi leki kownu nanga den raiman fu mi gi nanga wan fri wani, na a Gado fu Israel, di e libi na Yerusalem. 16Yu mus tyari ala a solfru nanga gowtu tu di yu sa kisi fu den sma fu a heri kontren Babel makandra nanga den sani di yu eigi pipel nanga den priester sa gi nanga wan fri wani, gi a oso fu a Gado fu den na Yerusalem. 17Nanga a moni disi yu mus bai bulu nanga man skapu nanga yongu skapu, sosrefi graan-ofrandi nanga win gi den ofrandi di mus tyari makandra nanga den meti dati di un o tyari leki ofrandi. Ala den ofrandi dati mus tyari tapu a altari fu a oso fu a Gado fu yu na Yerusalem. 18A solfru nanga a gowtu di o libi, yu nanga den tra priester kan du nanga en san un wani, efu a de nomo soleki fa a Gado fu yu wani tu. 19Den sani di yu kisi tu leki wrokosani gi a oso fu yu Gado na Yerusalem, yu mus tyari go poti drape tu. 20Mi sa sorgu gi a moni fu den paiman di yu o meki, efu sani de fanowdu ete gi a oso fu a Gado fu yu.
21Mi, kownu Artaxerxes, e komanderi ala den man fu a kontren na a tra sei fu a Eufratliba, di abi a frantwortu abra a moni fu mi drape, disi: ‘Sondro fu draidrai un mus gi priester Esra, a sabiman fu a wèt fu a Gado fu heimel, ala san a aksi. 22Un kan gi en te nanga dri dusun nanga feifi hondro kilo solfru, tin dusun kilo tarwe, tu dusun liter win nanga tu dusun liter oleif-oli. Sowtu un kan gi en omeni a wani. 23Ala san a Gado fu heimel komanderi gi a oso fu En, un mus du fin'fini, fu A no lusu a atibron fu En abra a kondre fu mi nanga abra den manpikin fu mi. 24Mi e taigi un tu taki un no abi primisi fu meki den priester, den Lefitiman, den singiman fu a tempel, den waktiman fu a tempel, den knekti fu a tempel nanga tra wrokoman fu a tempel, pai den difrenti sortu lantimoni.’
25Esra, nanga a koni di yu kisi fu Gado, yu mus poti tiriman nanga krutubakra fu koti krutu gi a heri folku di e libi ini a kontren na a tra sei fu a Eufratliba, gi ala den sma di sabi den wèt fu a Gado fu yu. Den sma di no sabi den, yu mus gi leri. 26Un mus tyari iniwan sma wantron go na krutu di no e du san a wèt fu Gado nanga a wèt fu kownu e taki. A strafu kan de: dede, yagi a sma puru na ini a kondre, butu noso koti strafu.”
27“Prijse MASRA, a Gado fu den afo fu wi, di meki kownu teki a besroiti fu meki a oso fu MASRA, di e libi na Yerusalem, kisi a moi fasi fu en baka. 28A meki kownu, den raiman fu en nanga ala den bigi tiriman fu kownu, sori mi a bunfasi fu den.” Èn fu di MASRA, a Gado fu mi, de nanga mi, mi teki dek'ati èn mi tyari den fesiman fu den Israelitisma kon na wan fu hari gwe nanga mi.
