A freide di de fu kon
1Ma wan taki o sproiti na a bontompu fu Isai,
wan yongu taki na den rutu fu en o tyari froktu.
2A Yeye fu MASRA sa de na En tapu:
a yeye fu koni nanga ferstan,
a yeye fu rai nanga krakti,
a yeye fu sabi nanga dipi lespeki gi MASRA.
3Iya, a o de wan prisiri gi en fu lespeki MASRA.
A no o koti krutu nomo fu san a si nanga en ai
noso fu san a yere nanga en yesi.
4A o krutu den tori fu sma di no de na teri tapu wan leti fasi,
èn a o krutu den tori fu den pôtiwan na tapu wan leti fasi.
Nanga en wortu a o strafu grontapu,
nanga en bro a o kiri den ogri-ati sma.
5A o krutu sani tapu wan leti fasi,
dati de fu si ini den besroiti di a e teki,
èn a fertrow di a de fu fertrow de fu si ini den sani di a e du.
6Dan wan krasi meti o de na wan presi nanga wan yongu skapu,
wan tigri o go didon sei wan pikin bokoboko,
wan yongu kaw o nyan grasi makandra nanga wan lew,
èn wan pikin boi o luku den.
7Kaw nanga beer o nyan grasi makandra,
den pikin fu den o didon sei nanga sei.
A lew sa nyan drei grasi leki wan kaw.
8Wan nyunyun pikin sa prei na a olo fu wan labariasneki,
èn wan yongu pikin sa sutu en anu go ini a nesi fu wan takrusneki.
9Tapu a heri santa bergi fu Mi yu no o abi sma di o du ogri,
no wan sma di o meki trobi.
Bika a sabi fu MASRA o furu heri grontapu,
neleki fa watra furu a se.
10A ten dati a bakapikin fu Isai
o tnapu leki wan fraga gi den folku.
Den sa kon makandra na en,
èn a tanpresi fu en o moi srefsrefi.
A pipel drai kon baka
11A ten dati MASRA sa sori En makti wantron moro
fu ferlusu a pipel fu En,
den wan di tan abra na ini Asur nanga Egipte,
ini Patros, Nubia nanga Elam,
ini Sinear, Hamat,
ini den kondre tapu se nanga den wan na a sekanti.
12Dan A o opo wan fraga na loktu gi den folku.
A o tyari den sma kon na wan,
den sma di den ben tyari gwe nanga tranga fu Israel.
Den sma fu Yuda di panya go na ala sei.
A o puru den na den fo uku fu grontapu tyari kon baka.
13A dyarusu fu Efraim sa gwe,
èn wan kba o kon na a feyanti fasi fu Yuda.
Efraim no o dyarusu moro tapu Yuda,
èn Yuda no o si Efraim moro leki en feyanti.
14Leki waswasi den o saka go ini a kontren fu den Filistijnsma,
na a westsei.
Makandra den o go fufuru den sani fu den folku na oostsei.
Den e teki Edom nanga Moab abra,
den Amonitisma abi fu saka densrefi gi den.
15Dan MASRA o prati a se fu Egipte na tu.
A o wai En anu abra Eufratliba,
èn wan faya winti o prati en ini seibi kriki,
kriki di sma o man abra sondro fu den futu nati.
16Na so A e meki wan pasi gi a pipel fu En,
den wan di tan abra ini Asur.
Na so A ben meki wan pasi gi Israel tu,
di den ben hari kmopo ini Egipte.
