1A kba gi den di e meki kruktu besroiti,
den di e naki papira di e opo pasi gi sma fu pina trawan.
2Tapu a fasi disi den e puru a leti na a anu fu den pôtisma.
Den no e gi den mofinawan a leti di den mus kisi.
Dan so den e du san den wani nanga den uma di masra dede kba.
Den e fufuru ala sani fu den pikin di no abi p'pa nanga m'ma moro.
3Ma san un o du tapu a dei te Mi o strafu unu,
te a bun tranga winti e kmoto fu fara e kon?
Na suma un o lon go suku yepi,
èn pe un o libi ala den gudu fu unu?
4Un no o man du noti moro dan fu beni un baka
te den o tyari un gwe leki strafuman,
noso fu dede ini a feti.
Ma ala den sani dati no kowru a atibron fu En,
A e tan opo En anu fu naki den.
Asur o kisi en strafu tu
5A kba gi Asur,
Asur na a wipi nanga san Mi e wipi ini Mi atibron,
a tiki nanga san Mi e naki nanga hebi atibron.
6Mi o seni en go na wan pipel di poti Gado na wan sei,
wan pipel tapu san Mi ati e bron sote.
Mi o seni en go fu go teki ala sani tyari gwe,
fu go fufuru den sani,
èn fu traputrapu a pipel leki a doti tapu strati.
7Ma Asur srefi no ben e waka nanga a prakseri dati,
en ati no ben gi en fu du dati.
San en ben wani du na fu pori,
na fu puru furu folku na pasi.
8A e taki:
“Den legre-edeman fu mi de leki kownu.
9A srefi sani di psa nanga a foto Karkemis
psa nanga Kalno,
a srefi sani di psa nanga Arpad
psa nanga Hamat,
èn a srefi sani di psa nanga Damaskus
psa nanga Samaria tu.
10Mi teki kondre fu kownu abra
di ben abi moro kruktu gado,
nanga moro furu popki fu ston noso udu,
dan Yerusalem nanga Samaria.
11Leki fa mi du nanga Samaria
nanga den kruktu gado fu den,
na so mi o du tu nanga Yerusalem
nanga den bigi popki fu den fu ston noso udu.”
12Ma te MASRA kba du ala a wroko fu En
tapu Sionbergi nanga ini Yerusalem,
A o strafu a kownu fu Asur fu a bigifasi fu en,
nanga fu a heimemre di a abi.
13Bika a ben taki:
“Nanga mi eigi krakti mi du den sani dati,
nanga mi eigi koni,
bika mi abi wan krin ferstan.
Mi puru den kbapisi fu kondre èn teki kondre fu folku abra,
ala den gudu fu den mi teki tyari gwe,
èn leki wan bulu mi pusu a pipel trowe.
14Leki fa sma e feni fowrunesi
na so mi feni a gudu fu den folku.
Èn leki fa sma e piki eksi di didon den wawan,
na so mi teki heri grontapu ini mi anu.
No wan fu den no seki den frei,
no wan fu den no opo den mofo bari.”
15Wan beiri no kan meki bigi gi a wan di e kapu nanga en,
èn wan sa no kan meki bigi gi a wan di e sa nanga en.
Wan pisi udu no man du san a wani nanga a sma di hori en ini en anu,
èn wan tiki no o man opo a sma go na loktu tu di hori en.
16Dat' meki Masra, MASRA fu ala sani, o meki wan siki broko ini Asur,
di o meki ala fatu sma di ben e nyan bun, kon mangri.
A o tyari wan kba kon na a bun libi fu den,
leki na wan bigi faya bron den.
17A Leti fu Israel o tron wan faya,
a Santawan o tron wan frambo,
di o bron a krasiwiwiri nanga a makamaka fu Asur.
Na ini wan dei a faya o bron den èn nyan den.
18A o pori ala den moi busi nanga den droifidyari,
nanga ala san de na den ini.
A o de leki te wan takru siki e meki wan sma e mangri gwe.
19Den bon fu a busi di o tan abra o de so pikinso,
tak' wan pikin boi srefi o man teri den.
Wantu sma fu a pipel nomo o drai kon na Gado
20A ten dati den sma fu Israel di tan abra, no o fertrow moro tapu den sma di ben e naki den. A pisi fu a pipel fu Yakob di tan na libi, o fertrow nanga den heri ati baka tapu MASRA, a Santa Wan fu Israel. 21Den di tan abra sa drai kon baka na a tranga Gado, den sma fu a pipel fu Yakob di tan abra. 22Bika Israel, awinsi a pipel fu yu ben furu leki a santi na sekanti, soso den di tan abra o drai kon baka. A stampu kba tak' un o lasi un libi èn un fiti fu dati psa nanga unu. 23Bika Masra, MASRA fu ala sani, teki a besroiti fu puru ala sma ini a kondre na pasi.
24Dat' meki na so Masra, MASRA fu ala sani, e taki: Mi pipel di e libi tapu Sionbergi. No frede gi Asur te a e wipi unu, te a opo a tiki fu naki unu, leki fa Egipte ben du wan ten. 25Bika pikinso ete, dan a hebi atibron fu Mi o kon na wan kba, èn a bron di Mi ati ben bron na un tapu o drai go tapu den now, fu puru den na pasi. 26MASRA fu ala sani o wipi den, leki fa Midyan ben kisi fonfon na a bergiston fu Oreb. A sa opo En tiki abra a se, leki fa A ben du na Egipte. 27A ten dati a lai fu den o kmopo fu un skowru, èn a udu di den ben poti lontu un neki o grati kmoto. Iya, a o broko pis'pisi.
Den sma fu Asur de na mofo doro
28Den e kon fu a sei fu Rimon,
den doro ini Ayat, den e hari go na Migron,
den e libi ala den lai fu den ini Mikmas.
29Den e hari psa mindri den bergi,
den taki: “Un o psa a neti ini Geba.”
Den sma ini Rama e beifi,
den sma ini Gibea, a foto fu Saul,
e lon gi den libi.
30Sma fu Galim, un bari o tranga un man!
Lais, un kaka un yesi!
Anatot, yu de fu sari!
31Madmena e lon,
den sma fu Gebim e go kibri.
32Tide srefi a feyanti o doro ini Nob.
Den e sori a bergi Sion,
a pikin bergi fu Yerusalem,
den kofu.
33Masra, MASRA fu ala sani,
e kapu den taki puru nanga bigi krakti,
den moro bigi bon A e kapu trowe,
den moro deki wan e fadon.
34A e kapu a deki busi opo nanga wan aksi.
A Wan di abi makti e kapu a heri Libanon busi opo.
