1A folku di e waka lontu na ini dungru si wan bigi faya,
wan faya e opo gi den wan di e libi ini dipi dungru.
2Yu e meki a folku kon furu baka,
yu gi den bigi prisiri.
Den e prisiri na yu fesi,
leki te den e koti nyanyan,
den e bari fu prisiri,
leki te den e prati den sani di den teki fu den feyanti baka a feti.
3A lai di den ben mus tyari,
a tiki di ben e naki den na den mindribaka,
a wipi fu a man di ben e tiri den,
Yu ferlusu den fu den dati,
leki fa Yu ben ferlusu den fu den Midyanitisma.
4Ibri srudatisusu di ben e stampu,
ibri srudatikrosi nanga brudu na en,
den o fringi go ini a faya,
fu a faya bron den.
5Bika gi wi wan pikin gebore,
wi kisi wan manpikin,
a wroko fu tiri a kondre sa de tapu a skowru fu en.
Den sa kari en: Wondru Raiman,
Tranga Gado, Têgo Papa,
Kownu fu Freide.
6A makti fu en sa bigi srefsrefi,
èn wan kba no o kon na a freide di a sa tyari.
A o de kownu tapu a kownusturu fu David,
abra a kondre pe David ben de na makti leki kownu.
A sa bow en, èn hori en tnapu
fu di a o tiri en soleki fa a fiti èn na tapu wan leti fasi,
now èn fu têgo.
MASRA fu ala sani sa sorgu nomonomo taki disi psa.
Masra o strafu Israel
7Masra seni en wortu go gi Israel,
a krutu a pipel fu Yakob.
8A heri pipel o firi en,
Efraim nanga den sma fu Samaria,
den di e taki nanga heimemre èn bigifasi taki:
9“Den skotu di wi ben meki nanga pikin ston fadon,
ma wi o bow den baka nanga ston
di wi kapu puru na den bergi.
Sma koti den figabon trowe,
ma un o prani sedrebon ini den presi.”
10Ma dan MASRA meki den feyanti fu Resin opo fu kon feti nanga den,
A sutu faya gi den feyanti fu den:
11Aram fu oostsei,
nanga den Filistijnsma fu a westsei,
so den swari Israel.
Ma ala den sani dati no kowru a atibron fu En,
A e tan opo En anu fu naki den.
12Ma a pipel no drai go na a wan di strafu den,
den no suku MASRA fu ala sani.
13Dan tapu wan enkri dei
MASRA koti a ede nanga a tere fu Israel puru,
palmtaki nanga tyengrasi.
14A ede na den edeman nanga den heihei sma,
a tere na den profeiti di e leri a pipel sani di no tru.
15Den edeman fu a pipel ben e kori den,
a pipel ben e suku sma fu tiri den,
ma den meki a pipel lasi pasi.
16Dat' meki MASRA no abi prisiri nanga den yongusma,
A no o sorgu gi den pikin di no abi p'pa nanga m'ma moro,
nanga gi den uma di masra dede kba.
Bika den alamala poti Gado na wan sei,
den alamala e du ogri èn taki lawlaw sani.
Ma ala den sani dati no kowru a atibron fu En,
A e tan opo En anu fu naki den.
17Bika kruktudu na leki wan faya,
a e bron makamaka nanga krasiwiwiri,
a e meki busi teki faya,
ala sani e bron èn a e gi deki smoko.
18A tranga atibron fu MASRA fu ala sani
e sutu faya gi a heri kondre,
a pipel e bron gwe ini a faya,
no wan sma e sari wan trawan.
19Den e grabu nyanyan teki na den let'sei,
ma angri e tan kiri den,
den e swari nyanyan na den kruktusei
ma a no e furu den bere.
Ibrisma e nyan a meti fu en eigi anu.
20Manase e nyan Efraim,
Efraim e nyan Manase,
dan makandra den e fadon na Yuda skin.
Ma ala den sani dati no kowru a atibron fu En,
A e tan opo En anu fu naki den.
