Gado e trowstu a pipel fu En
1A Gado fu unu e taki:
Un trowstu, un trowstu a pipel fu Mi.
2Gi Yerusalem dek'ati,
bari taigi en taki a srafuten fu en kon na wan kba,
taki a kisi pardon fu en kruktudu,
èn taki MASRA ben strafu en dobru fu ala en sondu.
3Wan sten e bari taki:
“Meki wan pasi klari gi MASRA ini a dreisabana,
grati wan pasi gi a Gado fu unu ini a drei kontren.
4Ibri dal mus kon hei,
ibri bergi, heiwan nanga lagiwan, mus kon lagi leki a pasi.
den olo-olo presi mus kon grati,
sosrefi den gron di lai furu ston.
5Dan a glori fu MASRA o de fu si,
ala libisma o si en,
bika na MASRA srefi taki en.”
6Wan sten e taki: “Bari wroko!”
Wan trawan e aksi: “San mi mus bari?”
Yu mus bari taki: “Ala libisma de leki grasi,
den de fu wan syatu pisten nomo,
leki di fu wan bromki fu a wei.
7A grasi e drei èn a bromki e fadon,
te a bro fu MASRA psa na en tapu.
Fu tru, a pipel de leki grasi.”
8A grasi e drei gwe
èn a bromki e fadon,
ma a wortu fu a Gado fu unu e tan fu têgo.
9Sion, kren tapu wan hei bergi fu tyari yu bun boskopu,
Yerusalem, bari a bun boskopu fu yu nanga krakti,
yu kan opo yu sten, yu no abi fu frede.
Taigi den foto fu Yuda taki:
“Luku, a Gado fu unu dyaso!”
10Luku, Masra MASRA, e kon nanga krakti!
A makti de na ini En anu.
Luku, A e kon nanga pai,
En pai e waka na En fesi.
11Leki wan skapuman A o tyari a pipel fu En go wei.
Nanga en anu A o tyari yongu skapu kon na wan,
A o hori den na En borsu.
den mama fu den A o tiri safrisafri.
Noti no de fu marki nanga Gado
12Suma marki den watra fu a se ini en anu,
noso a heimel mindri en doi nanga en pikin finga?
Suma poti ala a santi fu grontapu ini wan markikan,
noso poti den bergi, heiwan nanga lagiwan, tapu wan wegi?
13Suma taigi a yeye fu MASRA san a mus du,
noso gi En rai leki En raiman?
14Suma A go aksi rai fu A ben kan ferstan sani,
fu leri En a leti pasi,
fu gi En sabi èn fu meki a du sani tapu wan koni fasi?
15Yere, den folku de leki wan dropu watra ini wan embre,
leki wan pikin doti tapu wan wegi.
Den kondre tapu se de leki pikinso santi.
16A busi fu Libanon no sari fu meki wan udufaya,
den meti ini a busi no sari fu tyari leki ofrandi gi En.
17No wan folku de wan sani ini En ai,
den no de notinoti gi En.
18Nanga suma un wan marki Gado?
San un wani poti na En sei di de leki En?
19Nanga wan popki di wan sma meki fu wan gado?
Wan man di sabi wroko udu bun e meki a popki,
wan gowtusmeti e naki gowtu poti na en tapu,
dan a e bron solfru keti fasi na en.
20A sma di pôti tumsi fu gi sowan kado e suku udu di no e pori,
a e suku wan sma di sabi wroko udu bun,
fu poti a popki tnapu fu a no fadon.
21Yu no sabi? Yu no yere?
Yu no kisi en fu yere sensi na a bigin?
A no krin gi yu sensi grontapu ben e meki?
22Gi En di e sidon tapu En kownusturu hei psa grontapu.
den sma fu grontapu de leki sprenka.
Na En e anga heimel leki wan garden,
bradi en leki wan tenti pe A kan libi.
23A e tyari wan kba na makti fu den wan di e rigeri,
A meki den tiriman fu grontapu tron noti.
24Leki fa sma prani den,
leki fa sma sai den,
leki fa den rutu fu den e bigin go ini a doti,
na so A e bro na den tapu, èn den e drei gwe.
dan wan bun tranga winti e tyari den gwe leki aleisibuba.
25A Santawan e taki:
Nanga suma un wani marki Mi?
Suma de a srefi leki Mi?
26Opo yu ede go na loktu èn luku.
Suma meki ala den sani dati?
Na En di e go na fesi fu a heri legre stari,
na En di e kari iniwan fu den na den nen.
No wan no e tan na baka,
bika a makti nanga a krakti fu En bigi sote.
27Yakob, fu sanede yu e taki,
Israel, fu sanede yu e taki tak'
“MASRA no e luku san e psa nanga unu srefsrefi,
A no e meki un kisi den leti fu unu.”
28Un no sabi? Un no yere?
MASRA na wan Gado di de fu têgo,
na En meki a grontapu de fu a wan kbapisi go te na a trawan.
A no e swaki, A no e weri.
No wan sma man sabi a dipi fu a ferstan fu En.
29Na En e gi den swakiwan krakti,
bogobogo krakti A e gi den di weri.
30Yongusma e swaki èn den e weri,
srefi steifisteifi yonkuman e misi futu e fadon.
31Ma den di e ferwakti MASRA, e kisi nyun krakti baka,
a o gersi leki nanga frei fu aka den o frei.
Den o lon, sondro fu weri,
Den o waka, sondro fu kon swaki.
