1Luku a knekti fu Mi di mi e kraka.
Mi teki en fu Misrefi èn Mi abi prisiri nanga en.
Mi poti a Yeye fu Mi na en tapu.
A o tyari kon na krin gi ala kondre san na leti.
2A no o bari, èn a no o opo en sten,
a sten fu en no o de fu yere tapu strati tu.
3A no o meki En moro hebi gi den swakiwan,
èn A no o puru a pikinso howpu di den abi ete.
Tapu wan tru fasi a sa meki den kon sabi san na leti.
4A no o lasi howpu, a no o lasi ati,
te leki sani bigin du nanga leti na grontapu,
èn tapu a leri fu en
den kondre tapu se
nanga den wan na a sekanti
e wakti.
5Na so Gado, MASRA e taki,
di meki heimel èn di hari en span,
di meki grontapu nanga ala sani di e libi na en tapu,
di gi libisma di e libi na en tapu, bro,
èn den di e waka na en tapu, wan yeye:
6Na Mi, MASRA, kari yu fu du san bun
èn Mi gi a anu fu yu krakti.
Mi kibri yu èn Mi poti yu leki wan ferbontu gi folku,
leki wan leti gi den kondre,
7fu opo breniwan ai,
fu puru strafuman na dungru-oso,
fu puru den wan kon na doro di de na ini dungru na straf'oso.
8Na Mi na MASRA, dati na Mi nen.
A glori fu Mi, Mi no e prati nanga no wan trawan,
Mi no e gi a grani fu Mi tu na no wan popki fu ston noso udu.
9Den sani di ben taki na fesi, yere, den kon tru,
Èn now Mi e taki fu nyun sani.
Mi e meki un yere fu den fosi den psa.
10Un singi wan nyun singi gi MASRA.
Un prijse En na heri grontapu,
unu di de tapu a se nanga un boto,
nanga ala sani di e libi ini a se.
Den kondre tapu se, den wan na a sekanti nanga ala den sma fu den.
11Meki a dreisabana nanga den foto fu en opo den sten,
den dorpu pe a lo fu Kedar e libi.
Un bari fu prisiri, unu di e libi ini den bergi-olo,
un bari kmopo fu a moro hei pisi fu den bergi.
12Meki den gi MASRA glori,
meki den taki fu a grani fu En ini den kondre tapu se
nanga den wan na a sekanti.
Gado pramisi fu yepi En pipel
13MASRA e hari gwe leki wan dyadya fetiman.
A de fayafaya fu a feti, leki wan srudati.
A e meki wan feti babari, iya, A e bari en kon na doro.
Leki wan dyadya fetiman A e fon den feyanti fu en.
14Bun langa yari Mi ben hori Mi mofo,
Mi ben tan tiri èn Mi hori Misrefi.
Ma now Mi e bari leki wan uma di e meki wan pikin,
Mi e dyeme èn Mi e soktu tapu a srefi momenti.
15Mi o pori den bergi,
hei wan nanga lagi wan,
èn Mi o drei ala san e gro na den tapu.
Mi o meki liba tron drei gron,
èn Mi o meki kriki lon drei.
16Mi o tyari breniwan waka tapu pasi di den no ben go bifo,
Mi o meki den poti den futu tapu pasi di den no sabi.
Mi o meki a dungru na den fesi tron leti,
olo-olo pasi Mi o grati gi den.
Dati na den sani di Mi o du, Mi no libi den.
17Den sma di poti den fertrow tapu popki fu udu noso ston,
den di e taigi sani di meki fu gowtu noso solfru taki:
“Un na wi gado,”
drai den baka èn den e syen sote.
18Un di dofu, un yere!
Un di breni, un luku fu un kan si!
19No wan sma no breni so leki a knekti fu Mi,
no wan sma no dofu so leki a boskopuman di Mi e seni.
Suma breni so leki a wan di Mi poti fu dini Mi nanga en heri ati,
breni so leki a knekti fu MASRA?
20A e si furu sani,
ma a no e hori den ini en ede,
den yesi fu en de opo-opo,
ma a no e arki.
21A ben gi MASRA prisiri,
fu di A e du sani ala ten na tapu wan leti fasi,
fu sori o bigi a wèt fu En de èn fu gi en grani.
22Ma sma fufuru a pipel disi,
èn teki ala den sani fu den tyari gwe.
Den sroto den alamala poti ini olo,
tapu den ini dungru-oso.
Den ben tron sma tapu san trawan ben onti,
èn den no ben abi wan sma fu ferlusu den.
Sma ben e kisi den tyari gwe,
èn no wan sma di ben e taki: “Gi mi den baka.”
23Sortu wan fu unu kan poti yesi fu arki disi?
Sortu wan fu unu kan arki èn ferstan?
24Suma ben gi Yakob abra,
fu sma ben kan fufuru ala sani fu en tyari gwe?
Suma gi Israel abra na fufuruman?
Na MASRA du dati.
Un ben du san A no ben wani.
Un no ben wani libi leki fa A ben wani,
èn du san a wèt fu En e taki.
25Dat' meki A lusu a hebi atibron fu En na den tapu,
nanga a ogri fu bigi feti.
Faya ben lontu den na alasei,
ma ete den no ben e ferstan.
A faya bron den,
ma ete den no teki leri fu en.
