A lobi fu MASRA gi Israel
1Uma di no man hori bere,
yu di noiti kisi pikin,
prisiri!
Yu di no sabi a pen fu kisi pikin,
bari fu prisiri!
Bika MASRA e taki tak' den pikin fu a uma di masra ben gwe libi en,
o furu moro den pikin fu a trow uma.
2Meki yu tenti moro bigi,
hari den duku fu en moro bradi!
Bradi en o fara yu man!
Meki den titei fu en moro langa,
Naki den pen fu en fasi.
3Bika yu o kon moro bigi na a let'sei nanga na a kruktusei.
Den bakapikin fu yu o yagi den tra folku gwe,
èn den o go libi ini foto pe sma no ben e libi moro.
4No frede! Yu no o kon na syen.
No firi broko saka! Bika den no o man gi yu syen!
Yu o fergiti a syen fu yu yongu yari,
èn yu no o memre a broko saka moro,
fu a ten di yu no ben abi masra.
5Bika a Wan di trow nanga yu, na a Wan di meki yu,
MASRA fu ala sani na a nen fu En.
A Wan di ferlusu yu na a Santa Wan fu Israel,
a Wan di den e kari: Gado fu heri grontapu.
6Iya, MASRA kari yu di yu ben de leki wan uma,
wan uma di en masra ben gwe libi,
wan uma nanga bigi sari.
A kari yu leki wan yongu uma di en masra gwe libi.
Na so a Gado fu yu taki.
7Fu wan syatu ten Mi ben gwe libi yu,
ma nanga bigi sari-ati Mi e teki yu baka.
8Ini hebi atibron Mi ben drai Mi baka gi yu fu wan momenti.
Ma nanga a têgo lobi fu Mi, Mi sa sorgu gi yu.
Na so MASRA, yu Ferlusuman taki.
9Gi Mi a de leki ini a ten fu Noa.
Leki fa Mi ben sweri taki den watra fu a ten fu Noa
no sa sungu grontapu noiti moro,
na so Mi e sweri now taki Mi ati no o bron moro na yu tapu,
èn taki Mi no o taigi yu moro taki Mi o du yu wan sani.
10Awinsi hei bergi dribi,
pikin bergi kmopo na den presi,
a lobi fu Mi no o kmopo na yu tapu,
èn a ferbontu di Mi meki nanga yu tak' yu o libi ini freide, o tan.
Na so MASRA, di abi sari-ati nanga yu, taki.
11Yu di sani miti,
yu di a tranga winti wai go pe a wani,
yu di no wan sma e trowstu,
yere, Mi o hari den ston fu yu nanga fini smenti,
Mi o meki a fundamenti fu yu nanga a diriston safier.
12Den toren fu yu mi e meki fu robijn,
den poort fu yu fu karbonkelston,
èn a heri skotu fu yu mi e meki fu diriston.
13Ala den pikin fu yu o kisi leri fu MASRA,
èn ala fasi a o go den bun.
14Du sani nanga leti o de a fundamenti tapu san den o bow yu.
Feyanti di e pina yu sa tan fara fu yu,
yu no abi fu frede moro gi den.
No wan ogri no o miti yu moro tu,
bika den no o kon krosbei srefsrefi.
15Efu toku sma kon feti nanga yu, a no Mi seni den.
Dat' meki den no o man hori feti nanga yu.
16Yere, na Mi meki smeti.
Na den e gi a krofaya moro winti fu a kan teki faya,
fu den meki fetisani gi wan spesrutu wroko.
Na Mi meki a wan tu di e tyari pori, fu broko sani.
17Ma no wan fetisani di meki fu feti yu,
o man du en wroko,
èn a o sori taki ala san den taki fu yu fesi krutu, no tru.
Disi na san den knekti fu MASRA o kisi,
a reti di Mi e gi den.
Na so MASRA taki.
