A fasi fa Masra wani taki un mus faste
1Bari bun tranga!
No hori yusrefi!
Meki a sten fu yu piki leki wan tutu.
Taigi a pipel fu Mi den ogri di den du,
ferteri a oso fu Yakob den sondu fu den.
2Ibri dei baka den e kon suku fu Mi,
èn den abi prisiri fu sabi a wani fu Mi,
leki wan pipel di e du sani tapu wan leti fasi,
èn di no e poti den besroiti fu a Gado fu den na wan sei.
Den e aksi Mi fu bun besroiti èn den lobi fu kon na Mi fesi.
3“Fu sanede Yu no e luku te un e faste?
Fu sanede Yu no e si te un e saka unsrefi?”
Bika yere, tapu a dei di un e faste un e bai èn un e seri sani,
èn un e pina den wrokoman fu unu.
4Yere, un e faste fu meki trobi nanga fu hari taki,
un e naki un feyanti nanga kofu srefi.
Efu un e du den sani disi te un e faste,
a sten fu un no o de fu yere na heimel.
5A no a sortu faste dati Mi wani,
a no den sani dati sma mus du tapu a dei pe den mus saka densrefi.
A no wan dei tu pe sma mus saka den ede leki wan bromki di flaw.
A no wan dei tu fu bradi lowkrosi na gron,
fu poti asisi na en tapu dan un go didon na tapu.
A no so faste e faste.
Den sortu dei dati no e gi MASRA prisiri.
6Te un e faste Mi wani tak' un mus du den sani disi:
un mus tapu fu du kruktudu,
un mus puru a hebi lai di un poti tapu trawan,
un mus lusu den wan di un e pina meki den kan libi fri,
èn un mus tapu nanga ala fasi fu pina trawan.
7Te un e faste un mus prati un brede nanga den mofinawan.
Den di no abi oso, un mus teki ini un oso.
Te un si wan sma e waka nanga sososkin,
un mus gi en krosi,
èn un mus yepi un eigi famiri.
8Dan a leti fu unu o broko kon na doro leki te a son e opo,
èn es'esi sani sa go bun baka nanga unu.
Den bunfasi fu unu sa waka na un fesi,
èn a glori fu MASRA
o waka na un baka leki wan waktiman.
9Dan te un o kari MASRA, A o piki.
Te un o bari fu a yepi unu, A o piki taki:
“Mi de dyaso.”
Dati na te un o tapu fu pina wan trawan,
tapu fu sori finga tapu wan trawan,
èn tapu fu tak' takru fu wan trawan.
10Te un o gi wan sma di abi angri san unsrefi wani,
èn gi den sma di trawan e pina ala san den e angri,
dan a leti fu unu sa opo ini a dungru,
dungru o de leki bakadina gi unu.
11Èn MASRA o tiri un ala ten.
Te un de ini wan kontren di drei srefsrefi,
A o gi un watra fu dringi,
èn A o gi un krakti baka.
Un o de leki wan bromkidyari di abi nofo watra,
leki wan watrabron nanga bun watra.
12Presi di ben broko fadon bun langa kba un o bow baka,
fundamenti di ben seti poti bun langa na fesi kba, un o seti baka.
Den o kari unu:
A wan di e bow ston skotu baka,
nanga:
A wan di e seti pasi kon bun baka.
13Efu un hori unsrefi na a sabatdei,
èn un no e bai nanga seri sani tapu a santa dei fu Mi,
efu un sa kari a sabatdei wan dei fu prisiri,
efu un sa si a dei fu MASRA leki wan santa dei,
èn efu un sa lespeki en fu no du den sani di un e du aladei,
fu no bai nanga seri sani a dei dati,
èn fu no tak' lawlaw sani a dei dati,
14dan un sa prisiri fu MASRA ede.
Dan Mi sa tyari unu abra den bergi fu grontapu,
èn Mi o meki unu prisiri nanga a gudu
di Mi ben gi un afo Yakob taki na fu en.
Bika na MASRA srefi taki so!
