Yakobus 2

₁Mi brada nanga sisa, efu un e bribi ini Yesus Kristus, wi Masra fu glori, dan un mus si ala sma a srefi fasi. ₂Kon un taki wan guduman kon inisei te un de makandra fu dini Gado. A weri en moi krosi èn a abi wan gowtu linga na en finga. Ma dan wan pôtiman kon tu di weri syabi-syabi. ₃A man nanga en moi krosi un e sori moro lespeki, èn un e taigi en fu a go sidon na wan bun presi. A pôtiman un e taigi fu a go tnapu na wan sei, noso fu a kon sidon na gron na un futusei. ₄Efu un e du dati, dan un no e si ala sma a srefi fasi, èn a prakseri di de na en baka no bun. ₅Mi lobi brada nanga sisa, un arki. Gado teki den pôtisma fu grontapu fu kon gudu ini bribi èn fu kon ondro a tiri fu En. Na so A pramisi ala sma di lobi En. ₆Ma unu e broko den pôtisma saka! Ma na den gudusma e pina unu. Na den e srepi un go na fesi krutubakra. ₇Na den e afrontu a bun nen fu Masra di ben kari na un tapu. ₈Efu un e du san a moro prenspari wèt ini a Santa Buku taki, dan un e du bun. A wèt disi e taki: “Yu mus lobi tra sma leki fa yu lobi yusrefi.” ₉Ma efu un no e si ala sma a srefi fasi, dan un e sondu èn a wèt e krutu unu leki sma di broko a wèt. ₁₀Bika efu wan sma di e hori ensrefi na a heri wèt, broko wan pikin pisi nomo, na a heri wèt a broko. ₁₁Bika na a Wan di taki: “Yu no mus huru,” taki tu taki: “Yu no mus kiri trawan.” So efu yu no huru, ma yu kiri wan tra sma, dan a tan taki na broko yu broko a wèt. ₁₂Fu dat'ede un mus taki èn un mus libi leki sma di Gado o krutu nanga a wèt di e meki libisma kon fri. ₁₃Bika Gado no sa abi sari-ati nanga a sma di no ben abi sari-ati nanga trawan. Ma a sma di ben abi sari-ati nanga trawan, no abi fu frede gi a krutu fu Gado.

₁₄Mi brada nanga sisa, wan sma kan taki tak' a e bribi, ma efu a no de fu si na den sani di a e du, dan a no abi warti. A bribi disi no o man yepi en. ₁₅Kon un taki wan brada noso wan sisa de na un mindri di no abi krosi fu weri èn di no abi nofo fu nyan. ₁₆Dan efu wan fu unu sa taigi en taki: “Waka bun! Weri bun fu yu skin tan waran, èn nyan yu bere furu,” ma dan a no e yepi en nanga den sani san en skin abi fanowdu, sortu yepi a gi en dan? ₁₇Na so a de nanga a bribi tu. Efu a no de fu si na den sani san yu e du, dan a bribi dati dede. ₁₈Ma dan wan sma kan taki: “Yu e bribi, ma mi e du.” Dan mi e piki taki: “Sori mi taki yu e bribi sondro taki a de fu si na san yu e du, dan mi sa sori yu nanga den sani san mi e du taki mi e bribi.” ₁₉Yu e bribi taki na wan Gado nomo de. Dati bun! Ma dati den takruyeye e bribi tu, èn den e frede! ₂₀Fa un don so! Mi o sori unu taki bribi no abi warti efu a no de fu si na den sani san wan sma e du. ₂₁A sani di wi afo Abraham du di a poti en manpikin Isak tapu a altari, meki taki a kon bun ini Gado ai. ₂₂So un e si taki a no ben bribi wawan, ma a ben du sani tu di sori taki a ben bribi. San a du meki taki a bribi fu en kon de san a mus de. ₂₃So a sani san skrifi ini a Santa Buku kon tru. A skrifi taki: “Fu di Abraham bribi Gado, meki Gado si en leki wan sma di bun ini En ai.” Dan so den kari en wan mati fu Gado. ₂₄So un e si taki a no bribi wawan e meki wan sma e kon bun ini Gado ai, ma te a e du sani tu di e sori taki a e bribi. ₂₅Tapu a srefi fasi disi, den sani san a motyo Rakab du meki taki a kon bun ini Gado ai. Bika a ben kibri den boskopuman ini en oso, èn a meki den teki wan tra pasi gwe. ₂₆Bika leki fa a skin dede te yu no e bro moro, na so bribi dede tu te a sma no e du sani di e sori taki a e bribi.