Yakobus 3

₁Mi brada nanga sisa, un alamala no mus suku fu tron sma di e gi leri. Bika un sabi taki Gado sa luku moro fini te A e krutu wi di e gi leri. ₂Wi alamala e meki fowtu someni leisi. Ma a sma di no e meki fowtu ini san a e taki, na wan sma di kon de soleki fa a mus de, èn di man hori ensrefi ini ala sani tu. ₃Efu wi wani meki wan asi du san wi e taki, wi e poti wan titei ini en mofo. So a mus fu go pe wi wani. ₄Luku den sipi tu. Den bigi èn tranga winti e trusu den go na fesi. Ma nanga wan pikin sani leki wan pari di fasi na bakasei fu a sipi, a man di e tyari a sipi e tyari en go pe a wani. ₅Na so a de nanga a tongo tu. Na wan pikin pisi fu a skin, ma a e taki bradi. Luku fa wan pikin faya kan bron wan bigi busi. ₆Un tongo na wan faya tu. Soso ogri a e puru kon na doro. Fu ala den pisi fu a skin, a tongo na a wan di e pori a heri skin. A e sutu faya gi a heri fasi fa wi e libi èn na hel srefi e leti en. ₇Libisma man tiri ala sortu meti èn den e du dati tu. Den e tiri bus'meti, fowru di e frei, meti di e kroipi, nanga meti di e libi na se. ₈Ma no wan libisma man basi a tongo. Na wan ogri sani, yu no sabi na fesi san a o du. A ogri san a e du, na leki te takru sneki beti yu. ₉Nanga en wi e opo a nen fu Masra Gado wi P'pa, èn nanga en wi e fluku libisma di Gado meki leki fa Ensrefi de. ₁₀Nanga a srefi mofo di wi e blesi, wi e fluku sma tu. Mi brada nanga sisa, a no mus de so. ₁₁A no kan taki bun watra nanga sowtuwatra de makandra ini wan peti. ₁₂Wan figabon no e gi oleif, èn wan droifibon no e gi figa. Na so wan sowtuwatra peti no man gi bun watra fu dringi.

₁₃Sortu wan fu unu koni èn sabi sani? We, meki a de fu si dan na a bun fasi fa yu e libi. Sma di koni e du sani tapu wan safri fasi. ₁₄Ma efu ini un ati un kon bita fu di un dyarusu, èn efu un e prakseri soso unsrefi, dan un no mus meki bigi tak' un koni. Un mus kba fu lei, èn un mus taki den sani leki fa den de. ₁₅A koni disi no kmopo fu Gado. Na wan grontapu sani, na wan sani di kmoto fu libisma, na wan didibri sani. ₁₆Bika pe dyarusu de èn pe sma e prakseri soso densrefi, drape soso bruya de èn sma e du ala sortu takru sani. ₁₇Ma ini a fosi presi, a koni di kmoto fu Gado e meki sma e libi wan krin libi. Moro fara a e meki den e pruberi fu hori freide, a e meki den abi switi maniri, a e meki den e arki san trawan e taki, a e meki den abi furu sari-ati nanga trawan, a e meki den e du furu bun, a e meki den no e teki a sei fu son sma, èn a e meki den e taki den sani leki fa den de. ₁₈Den sma di e tyari freide kon na trawan mindri, e sai ini freide. Èn a froktu fu en na wan libi di bun ini Gado ai.