1Baka di Yosua dede, den Israelitisma aksi MASRA taki: “Suma fu unu sa go feti fosi nanga den Kananitisma?” 2MASRA piki taki: “Yuda sa hari go fosi. Luku, Mi e gi a kondre abra na en.” 3Baka dati den man fu a lo fu Yuda taigi den famiri fu den fu a lo fu Simeon taki: “Un hari go nanga wi fu go feti nanga den Kananitisma di e libi ini a kontren di wi kisi taki na fu wi. Dan wi sa hari go nanga unu tu na a kontren di unu kisi.” Dan a lo fu Simeon go nanga den.
4Di Yuda hari go feti, MASRA gi den Kananitisma nanga den Perisitisma abra na den. Den kiri tin dusun man na Besek. 5Bika drape den ben kon miti nanga kownu Adonibesek. Den feti nanga en, èn den wini den Kananitisma nanga den Perisitisma. 6Adonibesek ben lowe gwe. Ma den gwe na en baka, den grabu en dan den kapu den doi fu en anu nanga en futu puru. 7Ne Adonibesek taki: “Mi abi sowan seibitenti kownu na a kownu-oso fu mi. Mi ben kapu den doi fu den puru èn den e libi fu a sakasaka di e fadon kmoto fu mi tafra. Gado e pai mi now fu den sani di mi du.” Dan den tyari Adonibesek go na Yerusalem, èn drape a dede.
8Baka dati den man fu Yuda go feti nanga Yerusalem. Den teki a foto abra, den kiri den sma drape nanga deigri, dan den sutu faya gi a foto. 9Dan den saka go feti nanga den Kananitisma di ben e libi ini a bergikontren, ini a Negebsabana, nanga na den bergifutu. 10Baka dati den hari go feti nanga den Kananitisma di ben e libi na Hebron. A foto disi ben nen Kiryat-Arba fosi. Drape den wini Sesai, Akiman, nanga Talmai. 11Fu drape den hari go feti nanga den sma fu Debir. A foto disi ben nen Kiryat-Sefer fosi. 12Kaleb ben taki: “A sma di wini den sma fu Kiryat-Sefer èn teki a foto abra, mi e gi mi umapikin Aksa leki frow.” 13Dan Otniyel, a manpikin fu Kenas, a pikin brada fu Kaleb, teki a foto abra. So Kaleb gi Otniyel en umapikin Aksa leki frow. 14Di a doro, Aksa taigi en taki a ben o de wan bun sani fu aksi en p'pa wan pisi pranigron. Di a saka fu en buriki, Kaleb aksi en san a ben wani. 15Aksa piki en taki: “Mi e begi yu, gi mi wan kado fu di mi trow. Fu di a gron di yu gi mi drei srefsrefi, meki mi e aksi yu fu gi mi wantu watrabron tu.” Dan Kaleb gi en den watrabron di ben de hei nanga watrabron di ben de lagi.
16Den bakapikin fu Kenit, a p'pa fu Moses en frow, ben hari go makandra nanga den sma fu Yuda fu a Palmfoto go na a dreisabana fu Yuda, di ben didon ini a Negebsabana na Arad. Den go libi makandra nanga den sma di ben libi ini a kontren fu Arad. 17Dan Yuda hari go na feti baka makandra nanga a lo fu Simeon. Den wini den Kananitisma di ben e libi na Sefat. Den kiri ala sma drape. Dat' meki den e kari a foto dati Horma. 18Baka dati den man fu Yuda teki den foto Gasa, Askelon nanga Ekron abra tu, makandra nanga a heri kontren fu den.
19MASRA ben de nanga Yuda, dat' meki den ben man teki a bergikondre abra. Ma den no ben man yagi den sma ini a Yordandal gwe, bika den disi ben abi isri fetiwagi. 20Kaleb ben kisi Hebron, soleki fa Moses ben taki. A ben yagi den dri bakapikin fu Enak puru fu a foto dati. 21A lo fu Benyamin no ben man yagi den Yebusitisma, di ben e libi ini Yerusalem, puru drape. Den Yebusitisma tan libi mindri den Benyaminitisma ini Yerusalem te tide.
22Den bakapikin fu Yosef hari go feti tu nanga den sma fu Betel èn MASRA ben de nanga den. 23Den sma fu a lo fu Yosef ben seni wantu man fu go luku kibrikibri fa sani ben e waka ini a foto dati, di ben nen Lus fosi. 24Dan den si wan man e kmoto ini a foto. Den taigi a man taki: “Sori unu fa un kan go ini a foto, dan un o du yu wan bun baka.” 25Ne a man sori den fa den ben kan go ini a foto. Den teki a foto abra èn den kiri ala den sma drape nanga deigri. Ma den meki a man nanga en heri famiri gwe sondro fu du den wan sani. 26A man go na a kondre fu den Hetitisma. A bow wan foto drape di a kari Lus. A foto dati nen so te tide.
Den folku di den Israelitisma no ben man yagi
27A lo fu Manase no ben man yagi den sma fu a foto Bet-Sean nanga den dorpu ini a birtu fu en. Den no ben man yagi den sma fu Tanak tu nanga den dorpu ini a birtu fu en. Moro fara den no ben man yagi den sma gwe tu fu Dor, Yibleam nanga Megido, nanga den dorpu ini a birtu fu den. Den Kananitisma tan libi ini den kontren drape. 28Di den Israelitisma ben kon moro tranga, den ferplekti den Kananitisma fu wroko leki srafu gi den, man den no ben man yagi den gwe. 29A lo fu Efraim no ben man yagi den Kananitisma di ben e libi ini Geser gwe tu. Den Kananitisma tan libi nanga den na Geser. 30A lo fu Sebulon no ben man yagi den sma gwe tu di ben e libi ini Kitron nanga Nahalol. Den ben ferplekti den fu wroko leki srafu gi den, ma den Kananitisma tan libi drape nanga den. 31A lo fu Aser no ben man yagi den sma fu den foto Ako, Sidon, Aklab, Aksib, Helba nanga Rekob gwe tu. 32Den sma fu Aser ben e libi drape makandra nanga den Kananitisma, di ben e libi drape kba, fu di den no ben man yagi den. 33A lo fu Naftali no ben man yagi den sma fu den foto Bet-Semes nanga Bet-Anat gwe tu. Den ben e libi drape makandra nanga den Kananitisma, di ben libi drape kba. Ma den ben ferplekti den fu wroko leki srafu gi den. 34Den Amoritisma ben meki den sma fu a lo fu Dan hari go nanga baka go te tapu den bergi. Den no ben e gi den a okasi fu saka a bergi fu kon ini a Yordandal. 35Den Amoritisma ben man tan libi ini Har-Heres, ini Ayalon nanga Saalbim, ma den bakapikin fu Yosef ben e kisi moro nanga moro makti abra den, te leki den ben ferplekti den fu wroko leki srafu gi den. 36A kontren fu den Amoritisma ben e bigin na a Kruktuterepasi èn a ben e waka fu Sela go moro fara na loktu.
