Yosua 24

₁Dan Yosua kari ala den lo fu Israel kon na wan na Sikem. A meki den fesiman fu a pipel, den edeman fu den lo, den krutubakra nanga den legre-edeman kon tnapu na Gado fesi. ₂Dan Yosua taigi a heri folku taki: “Na disi MASRA, a Gado fu Israel, taki: Langa di psa den bigisma fu unu ben libi na oostsei fu a Eufratliba. Wan fu den ben de Terak, a p'pa fu Abraham nanga Nakor. Den ben e dini tra gado. ₃Ma Mi ben puru Abraham, a afo fu unu drape, èn Mi tyari en waka ini heri Kanaan. Mi gi en bun furu bakapikin. Mi ben gi en wan manpikin, Isak. ₄Na Isak mi gi Yakob nanga Esau. Mi gi Esau a bergikontren Seir leki en tanpresi. Ma Yakob nanga den boi fu en ben hari go na Egipte. ₅Bakaten Mi seni Moses nanga Aaron go fu strafu Egipte, èn un sabi fa Mi meki den du dati, dan Mi puru un drape. ₆Baka di Mi ben puru den afo fu unu ini Egipte èn den ben doro na a Riet Se, den sma fu Egipte ben lon kon na den baka nanga fetiwagi nanga fetiman tapu asi. ₇Ne den afo fu unu bari kari MASRA. Dan MASRA meki wan bigi dungru fadon mindri den nanga den sma fu Egipte. Èn A meki den sma fu Egipte sungu ini a se, A meki a se tapu den. Unsrefi si san Mi du nanga Egipte. Baka dati un tan bun langa ini a bigi dreisabana. ₈Baka dati Mi tyari un ini a kondre fu den Amoritisma di ben e libi oostsei fu a Yordanliba. Den kon feti nanga unu, ma Mi gi den abra na unu. Mi wai den puru na pasi gi unu fu un ben kan teki a kondre fu den abra. ₉Dan kownu Balak fu Moab, a manpikin fu Sipor, ben kon feti nanga unu. A ben seni kari Bileam, a manpikin fu Beor, fu fluku unu. ₁₀Ma Mi no gi yesi na Bileam. Prefu fu a fluku, na blesi a blesi unu. Na so Mi ferlusu unu fu a makti fu en. ₁₁Baka dati un koti a Yordanliba abra go na Yeriko. Den sma fu Yeriko kon feti nanga unu, neleki den Amoritisma, den Perisitisma, den Kananitisma, den Hetitisma, den Girgasitisma, den Hiwitisma nanga den Yebusitisma. Ma Mi gi den alamala abra na unu. ₁₂Mi ben seni marbonsu go na un fesi, di meki den lon gi unu, neleki fa den tu kownu fu den Amoritisma ben abi fu lon gi un tu. Un no ben abi fu teki un deigri nanga un bo srefi. ₁₃Na so Mi gi un wan kondre gi san un no ben abi fu du not'noti. Mi gi un foto di un no bow, ma un e libi na den ini. Mi gi un droifidyari nanga oleifbon tu di un no prani ma un e nyan fu den.”

₁₄Dan Yosua taigi den Israelitisma moro fara taki: “We dan, un mus lespeki MASRA, èn un mus dini En nanga wan krin ati èn un mus tan dini En. Un puru den gado na un mindri di den afo fu unu ben e dini na oostsei fu a Eufratliba nanga ini Egipte, èn un dini MASRA wawan. ₁₅Ma efu un no feni en bun fu dini MASRA, dan un mus teki a besroiti tide, sortu gado un o dini: den gado di den afo fu unu ben e dini oostsei fu a Eufratliba noso den gado fu a kondre disi, di den Amoritisma ben e dini. Ma mi nanga den sma fu mi oso, wi sa dini MASRA!”

₁₆Dan a folku piki Yosua taki: “Un no o gwe libi MASRA noiti fu go dini tra gado! ₁₇Bika MASRA na un Gado. Na En ben puru unu nanga den afo fu unu na ini Egipte, pe un ben de srafu. Na En ben du bigi wondru gi unu di un si nanga un eigi ai. Na En ben kibri un a heri pasi tu gi den folku te un ben hari psa ini den kontren fu den. ₁₈Na MASRA ben yagi ala den folku dati gwe gi unu, nanga den Amoritisma di ben e libi ini a kondre disi fosi. Dat' meki wisrefi o dini MASRA, bika En na un Gado!”

₁₉Ma Yosua piki a folku taki: “Un no o man dini MASRA, bika MASRA na wan santa èn wan dyarusu Gado. A no sa gi unu pardon fu den kruktudu nanga sondu fu unu. ₂₀Efu un gwe libi MASRA fu go dini gado fu tra folku, A sa tron un feyanti. A o strafu unu èn A o wai un puru na pasi, awinsi A ben du un bun fosi.”

₂₁Ma a folku piki Yosua taki: “Na so a de, na MASRA un o dini.”

₂₂Dan Yosua taigi den taki: “A bun, dan unu na ketoigi gi unsrefi, taki un teki MASRA fu dini.” Den piki Yosua taki: “Iya, wi na ketoigi!” ₂₃Ne Yosua piki den taki: “Dan un puru den tra gado na un mindri, èn dini MASRA, a Gado fu Israel, nanga un heri ati.” ₂₄Èn a folku pramisi taki: “Na MASRA, a Gado fu unu, un o dini, èn un o arki san A e taki.”

₂₅Dan tapu a dei dati, drape na Sikem, Yosua meki wan ferbontu nanga a pipel. A gi den besroiti na san den ben mus hori densrefi nanga sani di den ben mus tan du. ₂₆Yosua skrifi den sani dati ini a buku fu a wèt fu MASRA. Baka dati a poti wan bigi ston tnapu ondro a bigi bon, na a santa presi fu MASRA. ₂₇Dan Yosua taigi a heri pipel taki: “Luku, a ston disi na wan ketoigi, bika a yere ala san MASRA taigi unu. Dat' meki a sa de leki wan ketoigi te un sa wani drai un baka gi Gado.” ₂₈Baka dati Yosua meki a pipel drai gwe baka. Iniwan fu den drai go na en eigi kontren.

₂₉Wan syatu pisten baka dati Yosua, a knekti fu MASRA, a manpikin fu Nun, kon dede. A ben doro a libimarki fu wan hondro nanga tin yari. ₃₀Den Israelitisma beri en ini a eigi kontren fu en, ini a foto Timnat-Serak ini a bergikontren fu Efraim, noordsei fu a bergi Gaas. ₃₁Den Israelitisma ben dini MASRA solanga Yosua ben de na libi. Baka dati den du dati tu solanga den fesiman ben de na libi ete di ben de fu a ten fu Yosua, èn di ben si ala den bigi sani di MASRA ben du gi Israel.

₃₂Den beri den bonyo fu Yosef, di den ben tyari kmoto fu Egipte, na Sikem tu tapu a pisi gron di Yakob ben bai gi wan hondro pisi solfru moni fu den manpikin fu Hemor, a p'pa fu Sikem. Den bakapikin fu Yosef ben kisi a pisi gron disi taki na fu den.

₃₃Eleasar, a manpikin fu Aaron, kon dede tu. Den Israelitisma beri en ini a bergikontren fu Efraim, tapu a lagi bergi di en manpikin Pinekas ben kisi.