1MASRA ben meki freide de ini Israel fu wan langa pisten èn fu no wan sei feyanti ben e trobi den. Yosua ben kon grani srefsrefi kba. 2Dan Yosua kari heri Israel kon na wan, makandra nanga den fesiman fu a folku, den edeman fu den lo, den krutubakra nanga den legre-edeman. Dan Yosua taigi den taki: “Mi kon grani srefsrefi. 3Ma unsrefi si san MASRA, a Gado fu unu, du nanga ala den folku disi fu wi ede. Bika MASRA, a Gado fu unu, srefi ben feti gi unu. 4Un yere, fu a Yordanliba go te na a Bigi Se na westsei, mi puru den folku na pasi èn mi prati a kondre fu den gi den lo fu unu. Srefi a kontren fu den folku di tan abra ete mi prati kba gi unu. 5MASRA, un Gado, srefi o yagi den folku dati gwe èn puru den na pasi gi unu. Dan so un o man teki a kondre abra leki fa MASRA, un Gado, ben pramisi unu. 6Ma un mus sorgu taki un tan hori unsrefi na ala san skrifi ini a buku fu a wèt fu Moses. Un mus du fin'fini san a e taki. 7Un no mus moksi nanga den folku tu di de ini a kondre ete. Un no mus kari a nen fu den gado fu den, un no mus sweri ini a nen fu den, un no mus dini den èn un no mus boigi gi den tu. 8Ma un mus tan waka baka MASRA, a Gado fu unu, soleki fa un du te tide 9Bigi nanga tranga folku MASRA ben puru na pasi gi unu. No wan fu den folku dati ben man hori feti nanga unu, te tide. 10Wan man fu unu ben lon baka dusun man fu den, fu di MASRA srefi ben feti gi unu, soleki fa A ben pramisi. 11Dat' meki un mus meki ala muiti fu un tan lobi MASRA, a Gado fu unu. 12Bika efu un drai un baka gi En, èn un bigin waka baka den folku di de ini a kondre disi ete, efu un go meki mati nanga den èn un trow nanga den, 13un mus sabi taki a no abi misi taki MASRA, a Gado fu unu, no o yagi den folku dati gwe gi un moro. Dan den o de leki wan tesi nanga wan problema gi unu. Den o de leki wan wipi na un mindribaka nanga wan maka ini un ai, te leki un alamala dede gwe libi a bun kondre disi di MASRA, a Gado fu unu, ben gi unu. 14Un arki, dyonsro mi o waka a pasi di ala sma o waka wan dei. Ma unu no mus fergiti noiti dati MASRA, a Gado fu unu, meki ala den bun pramisi kon tru di A ben gi unu. A hori Ensrefi na alamala èn A no broko no wan fu den. 15Ma soleki fa MASRA, a Gado fu unu, meki ala sani waka bun gi unu, soleki fa A ben pramisi unu, na so MASRA o meki ala sortu ogri miti un tu, te leki A kiri un puru fu a bun kondre di A ben gi unu. 16A sa du dati efu un broko a ferbontu di MASRA, a Gado fu unu, meki nanga unu, efu un go dini tra gado noso efu un boigi gi den. Dan A sa lusu a faya atibron fu En na un tapu èn es'esi A sa wai un puru fu a bun kondre disi di un ben kisi fu En.”
