Lees verschillende vertalingenLees verschillende vertalingen
Vergelijk verschillende vertalingenVergelijk verschillende vertalingen
Maak uw notitiesMaak uw notities
Kopieer en markeer BijbeltekstenKopieer en markeer Bijbelteksten
Uitproberen
Krutubakra 11
1A pisten dati yu ben abi wan man ini Gilead di ben nen Yefta. Yefta ben de wan bun dyadya fetiman. Ma en p'pa Gilead ben meki en nanga wan motyo. 2Gilead meki tra manpikin tu nanga en eigi uma. Di den manpikin dati ben kon bigi, den yagi Yefta gwe fu en p'pa oso. Den ben taigi en taki: “Yu no o kisi noti fu un p'pa, bika yu na a pikin fu wan tra uma.” 3Dan Yefta lowe gi den brada fu en. A go libi ini a kondre Tob. Drape wantu man di no e denki, bigin waka na en baka. 4Dan den Amonitisma bigin feti nanga Israel. 5Di a feti bigin, den edeman fu Gilead go na Tob fu go teki Yefta tyari kon baka. 6Den taigi en taki: “Kon baka, tron wi fesiman ini a feti nanga den Amonitisma.” 7Ma Yefta piki den edeman fu Gilead taki: “Un ben e si mi fu noti èn un ben yagi mi puru na ini a oso fu mi p'pa. Dan fu sanede un e kon na mi, now di un de ini benawtu?” 8Den edeman fu Gilead piki en taki: “Dati tru. Ma now un wani meki en bun nanga yu. Efu yu kon nanga unu èn feti nanga den Amonitisma, yu sa tron edeman fu unu nanga fu ala den sma fu Gilead.” 9Yefta piki den taki: “Dat' wani taki tak' efu mi drai go baka nanga unu fu feti nanga den Amonitisma, èn MASRA meki mi wini den Amonitisma, dan mi sa tron un edeman?” 10Den edeman fu Gilead piki Yefta taki: “Na so a de. MASRA yere san wi agri. Wi sa du so trutru san yu aksi.” 11Dan Yefta gwe nanga den edeman fu Gilead, pe den poti en leki edeman nanga fesiman fu den. Na Mispa Yefta taki ete wan leisi na MASRA fesi, ala den sani di a ben taki.
Yefta nanga a kownu fu den Amonitisma
12Baka dati Yefta seni boskopuman go na a kownu fu den Amonitisma. A seni aksi en taki: “Fu sanede yu kon feti nanga mi ini mi kondre?” 13A kownu fu den Amonitisma piki den boskopuman fu Yefta taki: “Di Israel ben e kmoto fu Egipte, den teki wan pisi fu a kondre fu mi, fu a heri kontren kmopo fu Arnon te go te miti Yabok nanga a Yordanliba. Gi mi a kontren dati baka sondro fu un meki trobi fu en.” 14Dan Yefta seni boskopuman go baka na a kownu fu den Amonitisma. A seni taigi en taki: 15“Na disi Yefta e taki: ‘Israel no teki kondre fu den Moabitisma noso fu den Amonitisma. 16Bika di Israel kmoto fu Egipte, den waka ini a dreisabana go miti a Riet Se. Baka dati den doro na Kades. 17Dan Israel ben seni boskopuman go na a kownu fu Edom nanga a aksi taki: Wi e begi yu fu yu meki wi psa ini yu kondre. Ma a kownu no ben wani. Den seni aksi a kownu fu Moab a srefi sani tu, ma ensrefi no ben wani. Dan so Israel ben abi fu tan na Kades. 18Te fu kba den teki a pasi fu a dreisabana. Den beni psa lontu den kondre fu Edom nanga Moab te leki den ben doro na oostsei fu Moab. Dan den ben meki den kampu na abrasei fu a Arnonliba. Den no ben kon ini a kondre fu den Moabitisma srefsrefi, bika den no ben koti a Arnonliba abra. Bika na a Arnonliba a kondre fu Moab ben e kba. 19Dan Israel ben seni boskopuman go na Sikon, a kownu fu den Amoritisma di ben e libi na Hesbon. Israel ben seni aksi en tangitangi fu psa ini en kondre fu go pe den ben mus go. 20Ma Sikon no ben fertrow Israel, dati na psa nomo den ben wani psa ini en kondre. Ne a kari a legre fu en kon na wan. Den meki den kampu na Yahas, dan a feti nanga Israel. 21Ma MASRA, a Gado fu Israel, ben gi Sikon nanga en heri legre abra na Israel. Den ben wini en, èn den teki a heri kondre abra pe den Amoritisma ben e libi. 22Na so den teki a heri kondre abra di ben de fu den Amoritisma fu a Arnon te go miti Yabok èn fu a dreisabana go te na a Yordanliba. 23We dan, na MASRA, a Gado fu Israel, ben yagi den Amoritisma gwe gi En pipel Israel. Dan now yu wani kon yagi unu? 24Yu kan teki san Kemos, a gado fu yu, gi yu. Ma wi o teki ala sani fu den folku di MASRA, un Gado, yagi gwe gi unu. 25Yu denki taki yu betre moro Balak, a manpikin fu Sipor, a kownu fu Moab? 26Noiti a hari taki nanga Israel noso kon feti nanga unu. Den Israelitisma e libi dri hondro yari kba ini den foto Hesbon nanga Arower nanga ini den dorpu di de ini a birti fu den, sosrefi tu ini den foto na a syoro fu Arnonliba. Fu sanede yu no kon teki den presi dati baka a heri ten dati? 27Mi no du yu noti, ma na yu e du mi ogri fu kon feti nanga mi. MASRA, a Krutubakra, sa krutu a tori fu den Israelitisma nanga den Amonitisma tide.’ ”
28Ma a kownu fu den Amonitisma no gi yesi na a boskopu di Yefta seni gi en. 29Ne a Yeye fu MASRA kon tapu Yefta. Dan Yefta hari psa ini a kontren fu Gilead nanga Manase. Baka dati a drai go baka na Mispa ini Gilead dan a hari fu drape go miti den Amonitisma.
A pramisi fu Yefta
30Dan Yefta pramisi MASRA wan sani. A taki: “Efu Yu gi den Amonitisma abra ini mi makti, 31èn mi doro bun baka na oso, a fosi sani di e kmoto ini mi oso fu kon miti mi, sa de fu Yu. Mi o srakti èn bron en leki wan ofrandi gi Yu.” 32Dan Yefta hari go feti nanga den Amonitisma èn MASRA gi den abra na en. 33A wini den kmoto fu Arower go te krosbei fu Minit, srefi te go miti Abel-Keramim. Tutenti foto Yefta teki abra fu den Amonitisma. A ben de so wan bigi lasi gi den Amonitisma taki den ben abi fu saka densrefi gi den Israelitisma.
34Di Yefta drai go baka na en oso na Mispa, en umapikin ben dansi kon miti en nanga tamboerijn. A ben de en wan enkri pikin. A no ben abi tra manpikin noso umapikin moro. 35Di Yefta si en, a priti en krosi dan a bari taki: “Tye, mi umapikin! Na yu e tyari a bigi sari disi kon na mi tapu. Fu sanede na yu mus meki a ongoloku disi miti mi. Mi pramisi MASRA wan sani di mi no man teki baka.” 36Ma a pikin piki en p'pa taki: “Efu yu pramisi MASRA wan sani, dan yu mus du san yu pramisi En. Bika na En ben yepi yu, meki yu ben kan puru atibron tapu den Amonitisma.” 37A pikin taigi en p'pa moro fara taki: “Ma mi wani aksi yu wan sani nomo. Gi mi tu mun, meki mi nanga den mati fu mi go na den bergi fu go krei taki mi o dede leki wan umapikin di noiti no trow.” 38Yefta piki en taki: “Yu kan go.” Dan a meki a go fu tu mun na den bergi fu go krei nanga den mati fu en taki a ben o dede leki wan umapikin di noiti no trow. 39Baka den tu mun dati a drai kon na en p'pa. Dan Yefta du nanga en san a ben pramisi Gado. Noiti a pikin go nanga wan man na bedi. A sani disi tron wan sani di den e tan du ini Israel, 40taki ala yari den umapikin fu Israel mus low fo dei langa gi a umapikin fu Yefta, a man fu Gilead.
