Krutubakra 10

₁Baka Abimelek, Tola opo leki ferlusuman fu Israel. A ben de a manpikin fu Pua nanga a granpikin fu Dodo èn a ben de fu a lo fu Isakar. Tola ben e libi ini Samir ini a bergikontren fu Efraim. ₂Tutenti-na-dri yari a ben de krutubakra fu Israel, dan a kon dede. Den beri en ini Samir.

₃Baka Tola, Yair fu Gilead opo èn a tiri Israel tutenti-na-tu yari. ₄Yair ben abi dritenti manpikin. Ini wan fu den ben abi wan buriki di ben e tyari den èn den alamala ben abi wan dorpu. Te tide sma e kari den dorpu dati ini Gilead: Dorpu fu Yair. ₅Di Yair dede, den beri en ini a foto Kamon.

₆Den Israelitisma bigin du sani baka di no bun ini MASRA ai. Den ben e dini den Baal nanga den Astarte, den ben e dini den gado fu Aram, fu Sidon, fu Moab, fu den Amonitisma nanga den gado fu den Filistijnsma. Ma den drai den baka gi MASRA èn den no ben e dini En moro. ₇Dat' meki MASRA ati bron tapu den Israelitisma, èn A gi den abra na den Filistijnsma nanga den Amonitisma. ₈A srefi yari dati den bigin kwinsi èn pina den Israelitisma. Tin-na-aiti yari langa den du dati nanga ala den Israelitisma di ben libi ini Gilead, na abrasei fu a Yordanliba, pe den Amoritisma ben e libi fosi. ₉Den Amonitisma koti a Yordanliba abra srefi fu go feti nanga den lo fu Yuda, fu Benyamin nanga fu Efraim èn Israel ben kon na ini bigi benawtu. ₁₀Dan den Israelitisma bari suku MASRA. Den taki: “Wi sondu, bika wi gwe libi Yu, wi Gado, fu go dini den Baal.” ₁₁Ma MASRA taigi den Israelitisma taki: “Di den sma fu Egipte, den Amoritisma, den Amonitisma, den Filistijnsma, ₁₂den Sidonisisma, den Amalekitisma nanga den sma fu Maon ben pina unu, Mi ben ferlusu unu te un ben bari suku Mi. ₁₃Ma un gwe libi Mi èn un go dini tra gado. Dat' meki Mi no sa ferlusu unu moro. ₁₄Un bari suku den gado di un teki. Meki den ferlusu unu, now di un de ini benawtu.” ₁₅Ma den Israelitisma taigi MASRA taki: “Wi sondu. Du san Yu wani nanga wi, ma wi e begi Yu fu Yu ferlusu unu a leisi disi ete.” ₁₆Dan den Israelitisma puru den tra gado na den mindri èn den bigin dini MASRA. Dan MASRA no ben man si a pina fu den Israelitisma moro langa.

₁₇Den Amonitisma ben moksi kon na wan dan meki den kampu ini Gilead. Den Israelitisma ben kon na wan tu èn den meki den kampu na Mispa. ₁₈Ne den edeman fu Gilead aksi makandra taki: “Suma na a man di o go na fesi fu feti nanga den Amonitisma? A man dati sa tron edeman fu ala den sma fu Gilead.”