Debora nanga Barak
1Baka di Ehud dede den Israelitisma bigin du sani baka di no ben bun ini MASRA ai. 2Dan MASRA gi den abra na kownu Yabin fu Kanaan, di ben de na makti ini Hasor. A edeman fu a legre fu en ben nen Sisera èn a ben e libi na Haroset-Hagoyim. 3Kownu Yabin ben abi neigi hondro isri fetiwagi. Sowan tutenti yari langa a pina den Israelitisma hebi. Dan den Israelitisma bari suku MASRA.
4A pisten dati wan uma, di ben nen Debora, ben de a krutubakra di ben e tiri Israel. A ben de a uma fu Lapidot èn a ben de wan profeiti. 5A ben gwenti hori krutu ondro a Deborapalmbon di ben de mindri Rama nanga Bet-El ini a bergikontren fu Efraim. Den Israelitisma ben e go drape na en fu a koti krutu gi den. 6Dan Debora seni kari Barak, a manpikin fu Abinoam, kon. Barak ben de fu a foto Kedes ini a kontren fu Naftali. Di a kon Debora taigi en taki: “MASRA, a Gado fu Israel, e komanderi yu taki: ‘Hari go na a bergi Tabor nanga tin dusun man fu den lo fu Naftali nanga Sebulon. 7Mi sa meki Sisera, a edeman fu a legre fu Yabin, hari kon drape na yu na a Kisonkriki nanga den fetiwagi nanga den srudati fu en. Dan Mi sa gi en abra ini yu makti.’ ” 8Ma Barak taigi Debora taki: “Mi o go soso efu yu kon nanga mi, efu yu no o kon nanga mi, mi no o go.” 9Ne Debora piki en taki: “Mi o kon nanga yu. Ma sabi taki yu no o kisi a grani fu a feti di yu o hari go feti, bika MASRA o gi Sisera abra na wan uma.” Baka dati Debora opo go nanga Barak na Kedes. 10Barak kari den man fu den lo fu Sebulon nanga Naftali kon na wan dan tin dusun man hari gwe nanga en. Debora go nanga en tu.
11Now a ben de so taki a Kenitiman Heber ben kmoto na mindri den Kenitisma go libi aparti. A ben opo den tenti fu en na a bigi bon fu Saanaim, krosbei fu Kedes. Den Kenitisma ben de bakapikin fu Hobab, a swagri fu Moses.
12Di den taigi Sisera taki Barak, a manpikin fu Abinoam, ben hari go na a Taborbergi, 13a meki ala den neigi hondro isri fetiwagi fu en nanga a heri legre fu en hari kmoto na Haroset-Hagoyim go na a Kisonkriki. 14Dan Debora taigi Barak taki: “Hari gwe! Bika tide MASRA e gi Sisera abra ini yu makti. MASRA hari go na yu fesi kba.” Dan Barak saka fu a Taborbergi nanga den tin dusun man fu en na en baka. 15Di Barak bigin feti nanga Sisera, MASRA tyari Sisera nanga ala den fetiwagi nanga a heri legre fu en ini so wan bruya, taki Sisera dyompo fu a fetiwagi fu en dan a bigin lon gwe nanga futu. 16Ne Barak nanga den man fu en go na baka den fetiwagi nanga den srudati fu Sisera te na Hasoret-Hagoyim. Den kiri a heri legre fu Sisera nanga deigri, no wan fu den no tan na libi.
17Sisera lowe nanga futu go na a tenti fu Yael, a uma fu a Kenitiman Heber, bika a ben sabi taki kownu Yabin fu Hasor nanga a famiri fu a Kenitiman Keber ben e libi ini freide nanga makandra. 18Yael waka go miti Sisera na dorosei dan a taigi en taki: “Kon na inisei, mi masra, kon na inisei. Yu no abi fu frede.” So Sisera go ini a tenti, dan a uma tapu en nanga wan krosi. 19Dan Sisera aksi a uma taki: “Gi mi pikinso watra fu dringi, bika watra e kiri mi.” Ne a uma opo wan merkisaka, a gi en fu dringi dan a tapu en baka nanga a krosi. 20Ne Sisera taigi a uma taki: “Go tnapu na mofodoro fu a tenti, dan te wan sma kon aksi efu wan man de dyaso na yu, yu mus taki no.” 21Ma Yael, a uma fu Keber, teki wan fu den udu pen nanga san den e fasi a tenti na gron, a teki wan ambra dan a waka safri go na Sisera di ben fadon na ini wan dipi sribi fu di a ben weri. Dan a uma naki a pisi udu psa ini Sisera en ede, taki a ben fasi na a gron. Na so Sisera dede. 22A srefi momenti dati Barak, di ben lon baka Sisera, doro drape. Yael waka go na dorosei go miti en, dan a taigi en taki: “Kon, mi o sori yu a man di yu e suku.” Di Barak go na inisei, a si taki Sisera ben didon dede nanga a pisi udu ini en ede.
23Na so Gado broko Yabin, a kownu fu Kanaan, saka gi den Israelitisma. 24Den Israelitisma ben e kisi moro nanga moro makti abra kownu Yabin fu Kanaan, te leki den ben puru en na pasi.
