Gideon
1Ma den Israelitisma ben e du sani baka di no bun ini MASRA ai. Dat' meki MASRA gi den seibi yari langa abra ini a makti fu den Midyanitisma, 2di ben e pina den sma fu Israel. Frede ben meki taki den Israelitisma ben meki kibripresi tapu den bergi, ini bergi-olo nanga na tra presi na den bergi di no ben makriki fu teki abra. 3Ala leisi te den Israelitisma ben prani den gron, den Midyanitisma, den Amalekitisma makandra nanga den folku fu oostsei ben e hari kon feti nanga den. 4Den ben e opo den tenti te ini a kondre, dan den ben e pori ala den sani di prani, te na Gasa srefi. Not'noti den ben e libi na baka gi den Israelitisma fu den libi go moro fara, no wan skapu, kaw noso buriki srefi. 5Den ben e hari kon nanga den tenti èn nanga den meti fu den. Den ben furu leki sprenka. No den, no den kameel fu den, ben de fu teri. Te den ben kon, den ben e pori a kondre. 6Den Midyanitisma ben meki taki Israel ben e pina srefsrefi. Dan den Israelitisma bari suku MASRA.
7Den Israelitisma bari suku MASRA fu yepi den nanga den Midyanitisma. 8Ne MASRA seni wan profeiti go na den di taigi den taki: “Na disi MASRA, a Gado fu Israel, taki: Na Mi puru unu na Egipte, pe un ben de srafu. 9Mi ferlusu unu fu a makti fu den sma fu Egipte, nanga fu ala den tra folku di ben e pina unu. Iya, Mi yagi den gwe gi unu èn Mi gi unu a kondre fu den. 10Mi ben taigi un tu taki: Mi na MASRA, a Gado fu unu. Un no mus anbegi den gado fu den Amoritisma, awinsi na ini den kondre un go tan. Ma un no arki san Mi taigi unu.”
11Dan a Engel fu MASRA kon dan A go sidon ondro a bigi bon na Ofra, di ben de fu Yoas, wan bakapikin fu Abiyeser. Gideon, a manpikin fu Yoas, ben e naki tarwe fu lusu den siri puru na a bosu. A ben e du dati ini wan baki pe den ben e masi droifi fu meki win. A ben e du en drape fu sorgu taki den Midyanitisma no feni en. 12Dan a Engel fu MASRA go na Gideon, dan a taigi en taki: “MASRA de nanga yu, dyadya fetiman.” 13Ne Gideon taigi en taki: “Tye, masra, efu MASRA de trutru nanga wi, fu sanede ala den sani disi e miti wi? Pe ala den wondru fu En de, fu san den afo fu wi ferteri wi? Den ben taki tak' na MASRA puru den ini Egiptekondre. Ma now MASRA no e luku wi na wan ai èn A libi wi gi den sma fu Midyan.” 14Ne MASRA drai, dan A taigi Gideon taki: “Hari gwe nanga a krakti di yu abi èn ferlusu den Israelitisma fu a makti fu Midyan. Na Misrefi e seni yu.” 15Ma Gideon piki taki: “Ma MASRA, fa mi o man ferlusu Israel? A famiri fu mi na a moro pikinwan fu a lo fu Manase èn mi na a moro yonguwan fu a famiri.” 16MASRA piki en taki: “Mi de nanga yu. Na dat' meki yu o man wini den Midyanitisma leki nanga wan sma nomo yu e feti.” 17Ma Gideon aksi baka taki: “Efu Yu abi prisiri nanga mi, gi mi wan marki dati na Yusrefi e taki nanga mi. 18Mi e begi Yu fu Yu no gwe fu dyaso tu. Mi wani go teki wan sani fu gi Yu.” MASRA piki taki: “A bun, Mi sa tan te leki yu kon baka.”
19Ne Gideon lon es'esi go na oso. A srakti wan bokoboko, dan a bori en. A teki blon, dan a baka brede sondro dyesi. Di a kba a poti a meti ini wan mantyi èn a sowsu a poti ini wan patu. A tyari den go ondro a bigi bon, dan a poti den gi En. 20A Engel fu Gado taigi en taki: “Poti a meti nanga den brede tapu a bergiston disi, dan yu e kanti a sowsu na den tapu.” Dan Gideon du dati. 21Dan a Engel fu MASRA langa a tiki di A ben hori ini en anu, dan A fasi a meti nanga den brede. Ne faya kmoto ini a bergiston di bron a meti nanga den brede. A srefi momenti dati A Engel fu MASRA no ben de fu si moro tu. 22Ne Gideon kon ferstan taki a ben de a Engel fu MASRA. Dan a bari: “Masra MASRA, a kba gi mi! Bika mi si a Engel fu MASRA fesi nanga fesi.” 23Ma MASRA taigi en taki: “Freide! No frede, yu no o dede.” 24Dan Gideon bow wan altari leti drape gi MASRA. A kari en: MASRA na freide A altari tnapu te tide tapu a gron fu den bakapikin fu Abiyeser ini Ofra.
25A neti dati MASRA taigi Gideon taki: “Teki a di fu tu bulu fu yu p'pa, a di fu seibi yari. Broko a altari fu Baal trowe di yu p'pa meki. A postu di tnapu drape tu gi a gado fu den yu mus kapu trowe. 26Baka dati yu mus meki wan altari gi MASRA, a Gado fu yu, tapu a moro hei pisi fu a presi disi di skotu. Yu mus meki wan bun altari. Te yu kba yu mus srakti a bulu dan yu e bron en leki wan ofrandi. Yu mus meki a faya nanga a udu fu a postu di yu o kapu trowe.” 27Ma fu di Gideon ben e frede den famiri fu en nanga den sma fu a foto, a no go deiten. Di neti tapu fosi a go nanga tin fu den knekti fu en go du san MASRA taigi en. 28Di den sma fu a foto opo a tra mamanten, den si taki a altari fu Baal ben broko èn taki a postu di ben tnapu drape gi wan gado ben kapu trowe. Den si tu taki a di fu tu bulu ben bron leki wan ofrandi tapu a altari di ben meki. 29Dan den aksi makandra taki: “Suma du a sani disi?” Di den go ondrosuku èn aksi sma, dan den kisi fu yere taki na Gideon, a manpikin fu Yoas, ben du en. 30Ne den taigi Yoas taki: “Tyari a manpikin fu yu kon na dorosei, bika a mus dede. A broko a altari fu Baal èn a kapu a postu fu a gado fu wi trowe di ben tnapu drape.” 31Ma Yoas taigi ala den sma di ben kon na en oso taki: “Na wani un wani feti gi Baal? Na wani un wani yepi en? A sma di wani feti gi en o dede tide mamanten srefi. Efu en na wan gado, meki a feti gi ensrefi now di wan sma broko a altari fu en.” 32Sensi a dei dati a bigin kari Gideon Yerubaal, èn a taki: “Meki Baal kon feti nanga en now di a broko a altari fu en.”
33Den Midyanitisma, den Amalekitisma nanga den folku fu oostsei ben bondru densrefi kon na wan baka. Den ben koti a Yordanliba abra dan den meki den kampu ini a dal fu Yisreel. 34Dan a Yeye fu MASRA kon tapu Gideon. A bro a tutu fu kari den bakapikin fu Abiyeser kon fu hari gwe nanga en. 35A seni boskopuman go ini a heri kontren fu Manase tu fu den hari gwe nanga en. A seni boskopuman go tu na a kontren fu Aser, fu Sebulon nanga Naftali. Den alamala kon fu hari gwe nanga en. 36Dan Gideon taigi Gado taki: “Efu a de so trutru taki Yu wani meki mi ferlusu Israel, soleki fa Yu ben taki, 37dan mi o poti wan pisi skapu buba tapu a gron pe wi e masi den siri fu graan puru na den bosu. Efu tamara mamanten dow de soso tapu a buba, ma a gron lontu en tan drei, dan mi sa sabi taki Yu wani meki mi ferlusu Israel, soleki fa Yu ben taki.” 38Na so a sani psa tu. Mamanten Gideon opo fruku dan a kwinsi a skapububa. A ben man kwinsi wan heri komki watra puru fu a buba. 39Ma Gideon taigi Gado taki: “No meki Yu atibron na mi tapu efu mi aksi Yu ete wan leisi wan sani. Meki mi luku wan leisi wan sani ete nanga a buba. Ma now Yu mus meki soso a buba tan drei èn a dow mus nati a heri gron lontu en.” 40A neti dati Gado du san Gideon aksi En. A buba tan drei ma a heri gron lontu en ben nati fu a dow.
