1“MASRA, te mi e krutu nanga Yu fu wan tori,
a e kon na krin taki ala ten Yu abi leti.
Ma toku mi wani aksi Yu wan sani:
Fu sanede a e go ogri-ati sma bun?
Fa a kan dati den di no de fu fertrow e libi sondro wan broko-ede?
2Na Yu meki dati den tnapu tide,
èn den tnapu tranga tu.
A e go den bun tu.
leki te a bon gi nyun taki nanga froktu.
Den e taki dorodoro fu Yu,
ma den ati de fara fu Yu.
3Ma MASRA, Yu sabi mi.
Yu e luku mi fin'fini èn Yu sabi fa mi firi de gi Yu.
Ma hari den ogri-ati sma tyari gwe,
leki skapu di sma e tyari go srakti.
Poti den na wan sei te leki a dei doro fu sma srakti den.
4Olanga a kondre mus drei gwe ete?
Olanga bromki nanga grasi mus flaw gwe ete.
Na fu den takrudu fu den sma di e libi drape,
na den ede meki meti nanga fowru dede gwe.
Den e tak' srefi taki:
‘A no man taki fa a kba fu wi o de.’ ”
5Ne Masra piki Yeremia taki:
“Efu yu abi muiti fu lon nanga den man di gwenti lon,
dan fa yu o man strei nanga asi dan?
Efu yu e misi futu pe a gron grati,
dan fa yu o du ini a busi sei a Yordanliba dan?
6Srefi den brada fu yu,
iya, yu heri famiri o drai baka gi yu.
Densrefi o bari sani gi yu na yu baka.
No fertrow den, awinsi o switi den e du nanga yu.
MASRA e sari fu a pipel fu En
7Mi gwe libi a pipel fu Mi,
Mi poti den wan di de fu Misrefi na wan sei.
Mi gi den wan di Mi lobi nanga Mi heri ati abra na den feyanti.
8Den wan di de fu Misrefi,
den ben kon de gi Mi leki wan lew ini a busi,
den ben e bari gi Mi.
Na dat' meki Mi no lobi den srefsrefi moro.
9Leki krasi meti den ben kon de gi Mi,
fu alasei tingifowru e frei kon na en tapu.
Kari den krasimeti kon na wan,
meki den kon nyan a pipel fu Mi.
10Furu tiriman pori a droifidyari fu Mi.
Den traputrapu a pranigron fu Mi,
den meki a moi pranigron fu Mi tron wan broko pranasi.
11Den meki a tron wan bigi dreisabana.
A sari fu si fa a didon brokobroko na Mi fesi.
No wan sma no drape moro.
A heri kondre broko èn no wan sma e broko en ede nanga en.
12Feyanti kon fu teki ala sani nanga tranga tyari gwe.
Den tnapu tapu ala pikin bergi ini a dreisabana.
Na MASRA e tyari bigi feti kon ini a heri kondre.
No wan sma o libi ini freide.
13Den sai tarwe,
ma den koti makamaka.
Na fu soso den naki den skin.
Den firi syen fu luku a nyanyan di den ben man koti.
Ma dati de a bakapisi fu a faya atibron fu MASRA.
14Na disi MASRA taki: Na disi Mi o du nanga ala den ogri-ati kondre ini a birti fu Israel di hari kon broko a kondre di Mi gi a pipel fu Mi: yere, Mi o rutu den puru fu den kondre fu den. Den sma fu Yuda Mi o puru na den mindri tu. 15Ma bakaten Mi sa abi sari-ati nanga den èn Mi sa meki den alamala drai go baka na den eigi kondre èn na den eigi sani. 16Èn efu den folku dati sa leri fu a pipel fu Mi fa fu dini Mi, leki fa den ben leri a pipel fu Mi fu dini Baal, èn efu den sa sweri ini a nen fu Mi, taki: ‘Mi e sweri na a libilibi MASRA,’ dan Mi sa meki den tron wan pisi fu a folku fu Mi èn sani sa go den bun. 17Ma Mi o rutu a heri folku puru di no wani arki, Mi o wai den puru na pasi. Na so MASRA taki.”
