A libi fu Yeremia leki wan eksempre gi Yuda
1MASRA taki nanga mi, A taigi mi taki: 2“Mi no wani fu yu trow èn kisi pikin ini a kondre disi, 3bika na disi MASRA e taki fu den pikin di sa gebore dyaso, nanga fu den m'ma nanga den p'pa di sa meki den ini a kondre disi: 4‘Na takrusiki sa kiri den. No wan sma sa low gi den èn no wan sma sa beri den. Den dedeskin o tan didon tapu den pranigron leki mest. Trawan fu den na ini bigi feti noso fu angriten den o dede. Den dedeskin fu den o de nyanyan gi fowru di e frei na loktu nanga gi krasimeti.’
5Na disi MASRA e taki: ‘Mi no wani fu yu go na den dede-oso fu den. Mi no wani fu yu low èn fu sori den dati yu e firi nanga den. Bika Mi o puru Mi freide fu a pipel disi, na so MASRA taki, Mi no o sori den lobi nanga sari-ati nanga moro. 6Bigiwan nanga pikinwan o dede ini a kondre disi sondro fu sma beri den. Sma no o low gi den èn no wan sma o tyerfi en skin noso piri en ede gi den fu sori fa a e sari. 7No wan sma o prati en brede nanga den sma di e low fu trowstu den noso tyari sani gi den fu dringi, awinsi na den p'pa noso m'ma srefi lasi libi. 8Mi no wani fu yu go tu na wan oso pe de e meki prisiri, fu go nyan èn dringi nanga den.’ 9Bika na disi MASRA fu ala sani, a Gado fu Israel, e taki: ‘Yere, Mi o meki un si fa sma o tapu fu singi prisiri singi dyaso. Trowman nanga trowmisi no o singi e prisiri moro.
10Te yu o taigi a pipel ala den sani disi den o aksi yu taki: Fu sanede MASRA o meki ala den bigi ogri dati miti wi? San na den kruktudu fu unu? San na den sondu di un du, san na a wani fu MASRA, a Gado fu unu, di un no du? 11Dan yu mus piki den taki: Na fu di den afo fu unu gwe libi Mi, na so MASRA taki. Na fu di den go waka baka tra gado, fu go dini den èn anbegi den. Na fu di den gwe libi Mi, na fu di den no du san a wèt fu Mi e taki, 12èn un du moro ogri leki den afo fu unu. Bika prefu unu arki Mi, ibri wan fu unu du san a takru ati fu un e gi unu fu du. 13Na dat' meki Mi o fringi un puru fu a kondre disi. Mi o meki feyanti tyari un go na wan kondre di, no unu, no den afo fu ben sabi. Dan drape un kan dini tra gado, dei nanga neti, fu di Mi no o abi sari-ati moro nanga unu.’
14‘Dat' meki den dei e kon, na so MASRA taki, dati sma no o sweri moro taki: Mi e sweri na a libilibi Gado di puru den Israelitisma ini Egiptekondre, 15ma sma o sweri now taki: Mi e sweri na a libilibi MASRA di ferlusu den Israelitisma fu a kondre na noordsei nanga fu ala den tra kondre pe A ben meki feyanti tyari den go. Iya, Mi sa meki den drai kon baka na a kondre di Mi ben gi den afo fu den.
16Yere, Mi e komanderi furu fisiman, na so MASRA taki, di o fanga den. Baka dati Mi o komanderi furu ontiman di sa go onti den tapu ibri bergi, tapu ibri pikin bergi nanga ini ibri bergi-olo. 17Bika Mi e si ala san den e du, noti no kibri gi Mi. Mi e si den kruktudu fu den. 18Dat' meki Mi o pai den fosi, Mi o pai den dobru fu den kruktudu nanga sondu fu den. Bika den doti a kondre fu Mi nanga den popki fu den di no e libi èn di Mi no lobi srefsrefi, èn nanga den groskin gado fu den.’ ”
A begi fu Yeremia
19“MASRA, mi krakti, mi tranga kibripresi,
a presi pe mi kan lon go kibri ini ten fu benawtu.
Folku sa kmoto te na a kbapisi fu grontapu fu kon na Yu
èn den sa taki:
‘Den gado fu den afo fu wi ben de soso bedrigi sani,
soso sani, no wan fu den man tyari yepi.’ ”
20“Wan libisma no man meki gado gi ensrefi.
Den sani di a e meki no kan de gado.
21Dat' meki Masra e taki:
‘Mi o meki den firi en disi leisi,
Mi o meki den firi a krakti nanga a makti fu Mi,
dan den o ferstan taki Mi nen na MASRA.’ ”
