Yeremia 24

₁Kownu Nebukadnesar fu Babel ben tyari kownu Yekonya fu Yuda, a manpikin fu Yoyakim, nanga tranga fu Yerusalem go na Babel. Makandra nanga Yekonya a ben tyari den tra man di ben e yepi tiri a kondre, den temreman nanga den smeti gwe. Baka dati MASRA sori mi wan sani. A meki mi si tu baskita nanga figa di ben de fesi a tempel fu MASRA. ₂Wan fu den baskita ben abi moi èn bun figa, leki den fosiwan di e lepi, ma a tra baskita ben abi pori wan di sma no ben man nyan srefsrefi. ₃Dan MASRA aksi mi taki: “Yeremia, san yu e si?” Mi piki taki: “Mi e si figa. Den bun wan bun srefsrefi fu nyan, ma den pori wan pori sote dati sma no man nyan den.” ₄Dan MASRA taki baka nanga mi, A taigi mi taki: ₅“Na disi MASRA, a Gado fu Israel, e taki: Leki fa Mi sorgu gi den bun figa, na so Mi o sorgu tu gi den sma fu Yuda di Mi meki a feyanti tyari gwe nanga tranga go na a kondre fu den Kaldeasma. ₆Mi o luku den fu a go den bun èn Mi o meki den drai kon baka ini a kondre disi. Mi no o broko den, ma Mi o bow den. Mi no o hari den puru, ma Mi o prani den. ₇Mi o gi den a ferstan fu den sabi dati na Mi de MASRA. Dan te den o drai kon na Mi nanga den heri ati, den o de a pipel fu Mi èn Mi o de a Gado fu den. ₈Ma leki fa den tra figa pori, taki den di no bun fu nyan srefsrefi, MASRA e taki, na so Mi o du nanga kownu Sedekia fu Yuda, den tra man di e yepi en tiri a kondre, den sma di tan ini Yerusalem, nanga den di go libi ini Egipte. ₉Mi o meki den de wan eksempre gi ala kownu na grontapu, taki den o frede fu si san psa nanga den. Sma o teki den meki spotu. Den o de leki eksempre fu sori san kan psa te bigi ogri miti sma. Sma o dreigi den èn den nen o de leki wan fluku ala presi pe Mi o panya den go. ₁₀Mi o meki bigi feti nanga angriten miti den èn takrusiki o panya na den mindri, te leki den alamala dede gwe fu a kondre di Mi ben gi den afo fu den.”