1“A kba gi den tiriman di e panya den skapu fu a wei fu Mi èn di e meki den go lasi, na so MASRA taki. 2Dat' meki na disi MASRA, a Gado fu Israel, e taigi den man di e tiri a pipel fu En: Un meki den skapu fu Mi panya, un yagi den gwe, èn un no e go suku den. Un yere, Mi o strafu un fu den ogri di un du, na so MASRA taki. 3Dan Mi o tyari ala den skapu fu Mi di libi, kon na wan. Mi o puru den ini ala den kondre pe Mi ben yagi den go. Dan Mi o meki den drai kon baka na den weigron fu den. Den o meki furu pikin èn den o kon furu. 4Mi o poti tiriman tu fu luku den, tiriman di o tiri den nanga den heri ati. A pipel fu Mi no o frede moro, èn no wan fu den o lasi moro, na so MASRA taki.
5Yere, den dei e kon, na so MASRA taki, dati Mi o poti wan sma leki kownu di de wan trutru bakapikin fu David. A o tiri den sma na tapu wan leti fasi, a o sorgu dati sma fu a kondre kisi den leti èn dati sani e psa na tapu wan leti fasi. 6Te a sa de kownu, a sa ferlusu Yuda fu den feyanti fu en, èn a pipel fu Israel sa libi ini freide. Den o kari en: ‘MASRA, di e gi wi wi leti.’
7Dat' meki den dei e kon, na so MASRA taki, dati sma no o sweri moro taki: ‘Mi e sweri na a libilibi Gado di puru den Israelitisma fu Egiptekondre,’ 8ma sma o sweri now taki: ‘Mi e sweri na a libilibi MASRA di ferlusu den Israelitisma fu a kondre na noordsei, nanga fu ala den tra kondre pe A ben meki feyanti tyari den go.’ Iya, den o libi na ini den eigi kondre baka.”
A boskopu fu Yeremia abra den profeiti
9Abra den profeiti:
“Mi dati no sabi srefsrefi moro san Mi mus prakseri,
mi heri skin e beifi.
Mi de leki wan drunguman,
a gersi leki win frei na mi ede.
Na MASRA poti mi so,
na den sani di A taki.”
10“A kondre furu nanga sma di e waka gi Masra.
A heri kondre e soktu ondro a fluku,
a grun fu a sabana kon geri.
Soso ogri de ini den sma ede,
èn den no e du bun sani nanga a makti di den abi.
11Srefi den profeiti nanga den priester
no abi no wan dropu lespeki moro gi Gado.
Te ini Mi oso srefi Mi e si fa den e du ogri,
Na so MASRA taki.
12Dat' meki a libi fu den o de leki wan dungru grati pasi.
Den o misi futu ini a dungru èn den o fadon.
Bika te a yuru doro fu Mi strafu den Mi o meki bigi ogri miti den,
Na so MASRA taki.
13Mi ben si wan sani na den profeiti fu Samaria di no bun srefsrefi.
Den ben taki san Baal ben gi den fu taki,
èn so den ben kori Mi pipel Israel.
14Ma na den profeiti fu Yerusalem Mi si sani di e gro Mi skin.
Den e waka gi Mi èn den e lei.
Den e hori baka tu gi den sma di e du ogri.
Dat' meki no wan fu den sma dati
e tapu nanga den ogri di den e du.
Ini wan fu den kon takru
leki den sma fu Sodom nanga Gomora.
15Dat' meki MASRA fu ala sani e taki disi fu den profeiti:
Luku, Mi e gi den bun bita sani fu nyan,
watra nanga dresi Mi e gi den fu dringi.
Bika a tapu di den profeiti tapu fu lespeki Mi,
panya ini a heri kondre.
16Na disi MASRA fu ala sani e taki: Un no arki den sani di den profeiti e taki. Den e meki un e howpu tapu sani di no o psa. Na densrefi meki den sani di den e si, a no MASRA gi den den sani dati fu taki. 17Dorodoro den e taigi den sma di no wani du san Mi e taki tak': ‘MASRA taki tak' sani o go bun nanga unu.’ Den sma di trangayesi den e taigi taki: ‘No wan ogri o miti unu.’ 18Ma sortu wan fu den ben de ini a konmakandra fu MASRA? Sortu wan fu den ben drape fu yere den besroiti di A teki? Sortu wan fu den ben arki èn yere san A taki?
19Luku, MASRA e lusu wan tranga winti ini a hebi atibron fu En,
wan draiwinti A e lusu tapu den ogri-ati sma.
20A atibron fu MASRA no o tapu,
a no o tapu solanga A no du san A abi ini En ede fu du.
Na te a ten dati doro fosi, disi o krin gi unu.
21A no Mi seni den profeiti dati,
ma den lon gwe leki boskopuman fu Mi.
Mi no taki nanga den srefsrefi,
ma den e taki leki na Mi gi den sani fu taki.
22Ma efu den ben de ini a konmakandra fu Mi,
den ben o man meki a pipel fu Mi yere Mi boskopu.
Dan den ben o meki den tapu nanga a ogri fasi fa den e libi,
èn nanga den ogri di den e du.
23Mi a no wan Gado di de krosbei wawan, na so MASRA taki,
ma wan Gado di de farawe ini heimel tu.
24Awinsi pe wan sma go kibri gi Mi, Mi o si en nomo, MASRA e taki.
Mi de alasei fu heimel nanga alasei fu grontapu, na so MASRA taki.
25Mi yere san den profeiti e taki di e taigi den sma soso lei sani ini Mi nen. Den e taki: ‘Mi kisi wan dren! Mi kisi wan dren’ 26Olanga sani o tan go so? Olanga den prakseri dati den o man go doro fu gi lei boskopu di kmopo fu den eigi prakseri? 27Den e ferteri a pipel fu Mi den dren fu den nanga a prakseri dati a pipel o fergiti a nen fu Mi, leki fa den afo fu den ben fergiti a nen fu Mi fu Baal ede. 28Wan profeiti di dren kan taki soso san a dren, ma a wan nanga san Misrefi taki mus taki a boskopu fu Mi leki fa a yere en.
Drei grasi nanga karu no de a srefi, na so MASRA taki.
29A wortu fu Mi e bron leki faya,
na so MASRA taki.
A de leki wan ambra di e naki wan bergiston broko pis'pisi.
30Dat' meki, yere, Mi, Mi o strafu den profeiti, na so MASRA taki, den profeiti di e taki baka san trawan e taki. 31Yere, Mi o strafu den, na so MASRA taki. den di lobi bari taki: ‘Na so MASRA taki.’ 32Yere, Mi o strafu den profeiti di e kori sma nanga den dren fu den, na so MASRA taki. Den e bedrigi a pipel fu Mi nanga den lei fu den èn nanga den sososani di den e taki. A no Mi seni den, noti Mi komanderi den. A pipel fu Mi no abi noti na den, na so MASRA taki.
33Masra taigi Yeremia taki: Te wan profeiti, wan priester, noso ini wan sma fu a pipel aksi yu taki: ‘Sortu lai MASRA e gi un fu tyari nanga a boskopu fu En?’ Dan yu sa taigi en taki: Na yusrefi na a lai, èn Mi o fringi yu trowe puru na Mi tapu, na so MASRA taki. 34Mi o strafu a profeiti, a priester, noso winsi suma fu a pipel di e kari Mi boskopu: ‘A lai fu MASRA.’ Mi o strafu en nanga en heri famiri. 35A moro betre un aksi makandra taki: ‘San MASRA piki,’ noso: ‘San MASRA taki?’ 36Ma un no mus taki moro fu: ‘A lai fu MASRA.’ Ala sma e taki dati na Mi e gi den sani fu taki, ma nanga dati un e drai den wortu fu a libi Gado, fu MASRA fu ala sani, a Gado fu unu. 37A moro betre un aksi wan profeiti san MASRA piki noso san A taki. 38Ma MASRA e taki disi: Efu un e tan taki fu ‘A lai fu MASRA’, aladi Mi bari un fu un no du en, 39Mi sa opo un go na loktu èn fringi un kmopo na Mi tapu makandra nanga a foto di Mi ben gi den afo fu unu èn di Mi gi unu. 40Mi o meki un kon tan so wan fasi dati sma o teki un meki spotu fu têgo. Noiti moro sma o fergiti a syen di Mi o gi unu.”
