Fu Babel
1Disi na a boskopu di MASRA gi a profeiti Yeremia fu Babel, a kondre fu den Kaldeasma:
2“Bari wroko na den folku!
Meki a de fu yere, no kibri en!
Taki: Feyanti teki Babel abra.
Bigi syen naki Bel
Marduk no sabi san fu du.
Syen naki den bigi popki fu den,
den fisti gado fu den no sabi san fu du.
3Bika wan folku fu noordsei e hari kon na den,
wan folku di sa meki a kondre fu den tron wan broko pranasi.
No wan sma o libi drape moro,
libisma nanga meti lowe,
den no de fu si drape moro.
4A srefi ten dati,
na so MASRA taki,
den Israelitisma nanga den sma fu Yuda o bari krei.
Dan den sa go suku fu MASRA, a Gado fu den.
5Den o aksi fu a pasi di e go na Sion,
dan den o hari go drape.
Den o taigi makandra taki:
‘Un kon, meki un drai go baka na MASRA,
meki un meki wan ferbontu nanga En di sa tan fu têgo,
wan di wi no sa fergiti.’
6A pipel fu Mi ben de leki wan grupu skapu di lasi pasi.
Den tiriman fu den meki den lasi pasi,
den tyari den go ini den bergi.
Na so den ben waka, fu a wan bergi go na a trawan,
èn den kon fergiti srefi pe den ben libi.
7Ini wan feyanti di ben miti den ben puru den na pasi.
A feyanti ben taki:
‘A no ogri un e du,
na den sondu na MASRA fesi.
Bika na En na a trutru weigron fu den,
na tapu En den afo fu den ben poti ala den fertrow.’
8Pipel fu Mi, un hari kmopo ini Babel,
un gwe libi a kondre fu den Kaldeasma!
Un kmoto leki fosi sma drape.
9Bika yere, Mi e meki bigi folku fu noordsei hari kon na Babel
leki wan man.
Dan Mi o meki den lontu a kondre èn teki en abra.
Na sma di sabi sutu bun nanga den bo,
noiti den e misi.
10Dan sma o kon fufuru sani teki ini a kondre fu den Kaldeasma.
Ini wan sma di o kon fufuru sani o teki te a sari en,
na so MASRA taki.
11Kaldeasma, wan ten ben de pe na unu ben fufuru ala sani teki
fu a pipel fu Mi.
A ten dati un ben lafu,
un ben meki babari fu prisiri
un ben dyompo leki yongu kaw ini a wei,
un ben meki babari leki man asi.
12Ma now a foto fu unu, di de leki wan m'ma gi unu e kisi syen.
Den e broko a uma saka di meki unu.
A kondre fu unu no o de na teri moro,
a o tron wan sabana,
wan bun drei presi.
13Na a faya atibron fu MASRA o meki
dati a o tron wan presi pe sma no o libi moro.
A o tron wan bigi dreisabana.
Ini wan sma di o psa na Babel o tnapu nanga opo mofo,
èn den o skreki fu si a bigi ogri di miti en.
14Un di e sutu bo,
un go tnapu klar'klari lontu Babel!
Un sutu na en tapu,
un sutu ala den peiri di un abi,
bika a sondu, a no du san MASRA wani.
15Un meki a feti babari, un lontu a foto,
den o gi densrefi abra.
Den hei wakti-oso fu den e fadon,
den skotu o broko didon na gron.
Na disi na a fasi fa MASRA e pai den baka:
A e meki den feyanti du a srefi sani di a ben du nanga trawan.
16Siri no e sai moro ini Babel,
nyanyan no e koti moro te den lepi.
Ala doroseisma drape e feti fu go na den kondre baka,
bika a feyanti e rigeri na tapu wan ogri-ati fasi drape.
Den Israelitisma sa drai go baka na den kondre
17A pipel fu Israel de leki skapu.
Lew lon na den baka èn panya den.
A fosi lew ben de a kownu fu Asur di kiri den.
Dan Nebukadnesar, a kownu fu Babel, kon na en baka,
en dati kaw den bonyo fu den.
18Dat' meki MASRA fu ala sani, a Gado fu Israel, e taki disi: Yere, Mi e strafu a kownu fu Babel nanga a kondre fu en leki fa Mi strafu a kownu fu Asur. 19Èn Mi e tyari a pipel fu Israel go baka na den kondre. Den sa nyan den sani di prani tapu Karmelbergi nanga Basanbergi. Den sa nyan te a sari den ini a bergikontren fu Efraim nanga fu Manase. 20Ini den dei dati, na so MASRA taki, Mi sa ondrosuku efu Israel abi kruktudu ete, ma den no sa de moro. Mi sa ondrosuku tu efu Yuda abi sondu ete, ma den sa de moro. Bika Mi sa gi pardon na ala den wan di Mi hori na libi.
21Masra e taki:
Un hari go feti na a kondre Merataim,
un hari go feti nanga den sma fu Pekod.
Un wai den puru na pasi,
un kiri den,
na so MASRA taki,
èn un du ala sani san Mi e komanderi unu.
22Babari fu feti di fu yere kba ini a kondre,
sani e broko fadon tu kba.
23Tye, a ambra di ben e naki heri grontapu
a priti, a broko pis'pisi.
Tye, now Babel srefi tron wan sani fu san sma e skreki
te den si san psa nanga en.
24Babel, Mi seti wan sani fu fanga yu,
èn Mi fanga yu tu sondro fu yusrefi sabi.
Mi fanga yu èn yu no man gwe moro.
Mi du dati fu di yu ben feti Mi.
25MASRA opo a kamra pe den fetisani fu En de,
nanga atibron A grabu wantu fu den.
A sani di e psa ini a kondre fu den Kaldeasma,
na Masra, MASRA fu ala sani, e du En wroko.
26Un go feti nanga Babel!
Un feti nanga en fu alasei!
Un broko den maksin opo.
Un poti ala sani tapu wan ipi leki fa den e du nanga karu.
Un wai a kondre puru na pasi,
noti fu en mus tan.
27Un teki den yonkuman fu den,
un tyari den go srakti leki kaw.
A kba gi den, bika a dei doro,
a ten di Mi o strafu den.
28Un arki!
Den sma di ben kan lowe kmoto ini Babel e taki ini Sion taki:
‘A sani di psa drape,
na pai MASRA, a Gado fu unu, pai den baka.
A pai den baka fu a broko di den ben broko a tempel fu En.’
29Un kari den man di e sutu bo kon na Babel.
Un lontu en fu alasei fu no wan sma kan kmopo na ini.
Un pai en baka fu ala san a ben du.
Un du nanga en san a ben du nanga trawan.
Bika a ben naki tapu en borsu gi MASRA,
a Santa Wan fu Israel.
30Den dei dati a feyanti o kiri den yonkuman tapu den pren,
ala den srudati den o kiri tu,
na so MASRA e taki.
31Foto, yu di abi heimemre sote, Mi o sori yu,
na so Masra, MASRA fu ala sani, e taki:
a dei di Mi o strafu yu doro now.
32A heimemre fu yu o meki yu misi futu, yu o fadon,
èn no wan sma o opo yu.
Mi o sutu faya gi den foto fu yu,
wan faya di o pori ala sani ini a birti fu den.
33Na disi MASRA fu ala sani e taki:
Feyanti e pina den Israelitisma,
èn a srefi sani e psa nanga a pipel fu Yuda.
Den feyanti di tai den tyari gwe e hori ai na den tapu,
den no wani lusu den.
34Ma a ferlusuman fu den tranga,
a nen fu en na MASRA fu ala sani.
A no abi misi dati A o taki gi den.
A o sorgu dati sani kon tiri baka na grontapu,
ma Babel sa de ini dyugudyugu.
35Bigi feti o miti den Kaldeasma:
den sma, den tiriman nanga den koniman,
na so MASRA taki.
36Bigi feti o miti den leimofo profeiti,
den kon na syen.
Bigi feti o miti den dyadya srudati,
den o skreki meki den no sabi san fu du.
37Ala den asi nanga den di e tyari den fetiwagi o dede na ini feti.
Den dorosei srudati di den yuru o de leki umasma.
38Den o lasi ala den gudu fu den,
sma o fufuru den tyari gwe.
Wan hebi dreiten o teki a kondre,
ala den liba o drei.
Bika na wan kondre di lai bigi popki fu ston noso udu,
den groskin sani e meki den lasi den ferstan.
39Dat' meki na meti fu a dreisabana nanga krasimeti o libi drape.
Bigi bus'fowru o meki den tanpresi drape.
Fu têgo sma no o libi drape moro.
40Mi ben drai Sodom nanga Gomora tapu,
den foto ini a birti fu den srefi mi broko.
Mi no meki sma go libi drape moro,
na so MASRA taki.
Na so Mi no o meki sma go libi moro ini Babel,
no wan sma o go psa wan ten drape moro tu.
41Yere, wan folku e kmopo fu noordsei e kon,
wan bigi folku nanga makti kownu
e hari kmopo fu a kbapisi fu grontapu.
42Den hori den bo nanga den lansri klar'klari,
den no abi no wan dropu sari-ati.
A feti babari fu den gersi leki na se e rigeri.
na tapu asi den e buku e kon.
Leki wán man den e tnapu fu feti,
fu feti nanga yu, Babel.
43A kownu fu Babel yere fu a kon fu den,
ala en anu e beifi.
A de na ini bigi benawtu,
frede naki en,
leki wan uma di de fu meki wan pikin.
44Leki fa wan lew e broko go na tapu wan grupu meti
na a bus'busi fu a Yordanliba,
na so Mi broko go tapu Babel.
Mi e meki a heri folku lon panya.
Dan Misrefi o teki wan man poti
fu tiri a kondre dati.
Suma de a srefi leki Mi?
Suma kan kari Mi kon na frantwortu?
Sortu tiriman o man hori feti nanga Mi?
45Dat' meki, un yere san MASRA besroiti fu du nanga Babel,
san A prakseri fu du nanga a kondre fu den Kaldeasma:
Fu tru, a feyanti o srepi den pikin fu den srefi tyari gwe.
Ini wan sma o tnapu nanga opo mofo.
46Di a nyunsu panya tak': ‘Babel fadon!’,
grontapu beifi,
èn folku bari krei.”
