Yohanes 2

₁Tu dei baka dati wan trow-oso ben de na a foto Kana ini Galilea. A m'ma fu Yesus ben de na a trow-oso ₂èn den ben kari Yesus nanga den man di ben e teki leri fu En kon tu. ₃Di ala a win kba, a m'ma fu Yesus taigi En taki: “Den no abi win moro.” ₄Yesus piki en taki: “Uma, fu sanede yu kon na Mi? Mi yuru no doro ete.” ₅Dan En m'ma taigi den knekti taki: “Un mus du ala sani san A taigi unu fu du.” ₆Now a ben de so tak' siksi ston kroiki ben tnapu drape fu den Dyu wasi den anu leki fa a gwenti fu den ben de. Ibriwan fu den ben e teki aititenti kon miti wan hondro nanga tutenti liter watra. ₇Yesus taigi den knekti taki: “Furu den kroiki nanga watra.” Dan den man furu den te na a lantyi. ₈Dan Yesus taigi den taki: “Un teki pikinso tyari go gi a edeman fu a fesa.” So den man du dati. ₉Di a edeman fu a fesa tesi a watra, a ben kon tron win. A no ben sabi pe a win disi kmopo, ma den knekti di ben puru a watra ben sabi. Dan a seni kari a trowmasra kon ₁₀èn a taigi en taki: “Ala sma e prati a bun win fosi. Te den sma dringi nofo, dan den e kisi a win san no tesi so bun. Ma yu kibri a bun win fu prati en now!” ₁₁A sani disi san Yesus du na Kana ini Galilea ben de a fosi marki fu En. A sori den sma a glori fu En èn den man di ben e teki leri fu En bribi ini En.

₁₂Baka dati Yesus go na Kafarnaum nanga En m'ma, den brada fu En nanga den man di ben e teki leri fu En. Dan den tan wantu dei drape.

₁₃A Paskafesa fu den Dyusma ben de fu kon, dat' meki Yesus go na Yerusalem. ₁₄Di A go ini a tempel, A miti nanga sma di ben e seri kaw, skapu nanga doifi, nanga trawan di ben e sidon broko moni. ₁₅Ne A teki titei dan A meki wan wipi fu en. Dan A yagi ala den man, nanga den skapu nanga den kaw, kmopo ini a kerki. A trowe a moni na gron fu den man di ben e broko moni, dan A drai den tafra fu den tapu. ₁₆A taigi den man di ben e seri doifi taki: “Un puru ala den sani disi! No meki a oso fu Mi P'pa tron wan wowoyo!” ₁₇Dan den man di ben e teki leri fu Yesus memre taki a skrifi ini Gadowortu taki: “A e bron ini mi leki wan faya fu du ala muiti gi Yu oso.” ₁₈Dan den fesiman fu den Dyusma aksi Yesus taki: “Sori un nanga wan marki taki Yu abi primisi fu du den sani disi.” ₁₉Yesus piki den taki: “Broko a santa presi disi puru, dan Mi o bow en baka ini dri dei.” ₂₀Dan den Dyusma piki En taki: “A teki fotenti-na-siksi yari fu bow a santa presi disi. Fa Yu o man bow en baka ini dri dei?” ₂₁Ma di Yesus ben e taki fu a santa presi, A ben e taki fu En skin. ₂₂Baka di Yesus kon na libi baka, den man di ben e teki leri fu En memre taki A ben taki a sani disi. Dan den bribi san skrifi ini a Santa Buku nanga den wortu di Yesus taki.

₂₃Furu sma bribi ini Yesus di den si den marki san A du na a Paskafesa di A ben de na Yerusalem. ₂₄Ma Yesus no ben e fertrow den fu di A sabi fa libisma de. ₂₅No wan sma ben abi fu ferteri En fu libisma, bika A ben sabi a ati fu libisma.