Yob na a fosiwan di bigin taki
1Te fu kba Yob opo en mofo èn a fluku a dei di a gebore. 2A taki:
3“Gado, fluku a dei di mi gebore,
fluku spesrutu a neti di mi m'ma taki:
‘Mi kisi wan manpikin!’
4Gado, meki dungru tapu a dei dati.
No prakseri en noiti moro,
no meki a son opo na en tapu moro.
5Meki a moro dipi dungru di de, lontu en,
meki dungru wolku tapu en,
meki ala a dungru dati meki a dei di mi gebore, beifi.
6Gado, meki dungru teki a neti dati tyari gwe,
no meki a teri leki wan fu den dei fu a yari,
no meki a de fu feni srefsrefi na ini den mun.
7Meki tak' noiti moro wan uma sa hori bere a neti dati,
meki a tron wan neti pe sma no sa bari moro fu prisiri.
8Meki den tofruman,
den di sabi fa fu meki a Leviatan du san den wani,
fluku a neti dati.
9Meki den mamanten stari, no opo a mamanten dati,
meki a neti dati wakti fu soso tapu a krin fu dei,
meki dei no broko srefsrefi gi en.
10Bika a neti dati gi a bere fu mi m'ma pasi fu mi kon gebore,
a no kibri mi gi a ogri di ben e wakti mi.
11Fu sanede mi no dede di mi ben e kon na grontapu,
fu sanede mi bro no koti di mi ben e kmopo ini a bere fu mi m'ma?
12Fu sanede den poti mi tapu den bowtu di mi gebore?
Fu sanede mi m'ma gi mi bobi?
13Efu mi ben dede di mi ben e gebore,
mi bo didon fu mi na ondro gron.
Mi bo sribi, sondro wan broko-ede,
14makandra nanga kownu nanga den prenspari wrokoman fu den,
den di ben meki kownu-oso, di broko fadon kba.
15Mi bo sribi fu mi tu nanga den gudu tiriman fu kondre,
den di ben furu den oso nanga gowtu nanga solfru.
16Fu sanede den no beri mi leki wan pikin
di dede ini a bere fu en m'ma,
leki wan nyunyun pikin
di noiti no si a krin fu dei?
17Ini dedekondre den ogriman e tapu nanga a ogridu fu den,
èn den di no abi krakti srefsrefi moro, kan feni bro.
18Drape den sma de tiri fu den,
di ben mus wroko fu soso gi trawan,
den no e yere a bari moro
fu den wan di ben e basi den.
19Drape pôtiman nanga guduman na a srefi,
èn srafu no abi basi moro.
20Fu sanede Gado e meki sma di e pina,
nanga sma di ati broko, tan na libi?
21Den sma dati e wakti dede,
ma a no e kon,
den e suku en,
moro leki fa sma e diki suku gudu,
di beri na ini a gron.
22Den bo breiti srefsrefi te a libi fu den ben kon na wan kba,
na ini den grebi nomo den bo prisiri.
23Fu sanede Gado e meki wan sma tan na libi,
di no sabi san a mus du,
wan sma gi san A tapu ala pasi?
24Bika prefu mi nyan, na dyeme nomo mi e dyeme,
den kragi fu mi e kmopo leki watra na ini mi mofo.
25San mi ben e frede, na dati e miti mi.
Sani ben e benawtu mi, na dati kon tapu mi pasi.
26Mi no abi freide nanga misrefi,
a no de tiri na mi inisei,
soso fuga mi e fuga,
problema e kon nomonomo.”
