Yob 4

₂“Mi no howpu tak' a o broko yu ati efu mi taki nanga yu.

Bika suma bo man hori en mofo?

₃Yere, yu gi furu sma rai,

èn yu kraka trawan.

₄Den wortu fu yu ben gi den wan di ben lasi ati

dek'ati fu go moro fara,

den swakiwan yu ben gi krakti.

₅Ma now di problema kon na tapu yu pasi, yu e lasi ati,

now di den kon miti yu, yu e bruya.

₆Na fergiti yu fergiti tak' yu e dini Gado

èn tak' yu e libi krin?

Dat' meki yu no kan lasi howpu,

ma yu mus tan fertrow.

₇Memre tak' Gado no e meki sma fadon di no e du ogri,

tak' A no e meki ongoloku miti sma di de fu fertrow.

₈Wan sani mi sabi:

a sma di e sai kruktudu nanga problema,

e koti dati tu.

₉Wan bro fu Gado nomo

èn den e dede,

wan bro fu a atibron fu En,

èn den no de fu feni moro.

₁₀Ogri-ati sma e meki babari leki lew,

ma Gado e naki den tifi broko.

₁₁Leki fa lew e dede te den no man feni nyan,

na so ogri-ati sma e dede,

èn den pikin fu den e waka lontu nomo e suku nyan.

_12-13Wan leisi, di ala tra sma ben e sribi dipi,

mi ben e draidrai na ini mi bedi e dren takru dren.

Dan mi yere wan safri sten,

mi yesi fanga fa wan sma e taki safri.

₁₄Ma wantronso mi ben bigin frede,

mi heri skin ben bigin beifi.

₁₅Mi firi fa wan winti psa mi fesi,

mi skin gro.

₁₆Dan mi si wan sani tnapu,

ma mi no ben kan si san na en.

Mi ben kan si wan sani di ben gersi wan skin,

ma mi no ben man tak' krin san a ben de.

Ala sei ben tiri. Dan mi yere wan safri sten taki:

₁₇‘Wan libisma no man tyari ensrefi soleki fa Gado wani.

Wan dyadyaman srefi no man tnapu sondro fowtu

fesi a Wan di meki en.

₁₈Efu Gado no e fertrow den engel fu En srefi,

efu A e feni fowtu na den ete,

₁₉o moro A no o fertrow libisma, di A meki fu kleidoti.

Libisma meki fu tokotoko,

dat' meki Gado e masi den kiri moro makriki

dan fa sma e masi kakalaka kiri.

₂₀Bunbun den kan de na libi mamanten,

ma fosi neti tapu, Gado maskaderi den.

Sondro fu densrefi sabi, den e dede gwe fu têgo.

₂₁A titei fu den tenti e koti.

Den e dede gwe, sondro fu ben sabi Gado pasi.’