1A lot sori tu sortu kontren a lo fu Manase ben mus kisi. Manase ben de a fosi manpikin fu Yosef. Makir ben de a fosi manpikin fu Manase èn a p'pa fu Gilead. Fu di Makir ben de wan bun fetiman, a ben kisi den kontren fu Gilead nanga Basan kba. 2Dan a lot sori sortu kontren den tra manpikin fu Manase nanga den famiri fu den bo kisi. Den tra manpikin fu Manase ben de: Abiyeser, Helek, Asriyel, Sekem, Hefer nanga Semida. Den manpikin disi fu Manase, a manpikin fu Yosef, ben de den edeman fu den famiri fu Manase. 3Manase ben de a p'pa fu Makir, Makir ben de a p'pa fu Gilead, Gilead ben de a p'pa fu Hefer èn Hefer ben de a p'pa fu Selofkad. Selofkad no ben abi manpikin. A ben abi soso umapikin. Den umapikin fu Selofkad ben de: Makla, Noa, Hogla, Milka nanga Tirsa. 4Den umapikin disi go na priester Eleasar, Yosua, a manpikin fu Nun, nanga den edeman fu den lo. Dan den taigi den man dati taki: “Wi wani memre unu dati MASRA ben komanderi Moses fu gi unu, neleki den omu fu unu, wan pisi fu a kondre gi unsrefi tu.” Dan soleki fa MASRA ben komanderi, den kisi wan pisi fu a kondre gi densrefi tu, neleki den omu fu den. 5Na so a kontren fu a lo fu Manase kon prati ini tin pisi, boiti Gilead nanga Basan di ben didon na a tra sei fu a Yordanliba. 6Bika den umapikin fu a lo ben kisi wan pisi fu a kondre tu neleki den mansma. Ma Gilead ben de gi den tra bakapikin fu Manase.
7A kontren fu Manase ben e waka fu a kontren fu a lo fu Aser go te na a foto Mikmetat, oostsei fu a foto Sikem. Fu drape a ben e waka go na zuidsei na den sma fu En-Tapuak. 8A foto Tapua ben de leti pe den kontren fu Manase nanga Efraim ben e miti. A foto srefi ben de fu a lo fu Efraim, ma a kontren lontu a foto ben de fu a lo fu Manase. 9Baka dati a kontren ben e saka go na a kriki Kana, dan a ben e psa na zuidsei fu a kriki Kana fu go kba na a se. Ala den foto drape ben de fu Efraim, ma den ben didon mindri den foto fu Manase. 10Dati wani taki tak' a kontren zuidsei fu a kriki Kana ben de fu a lo fu Efraim, èn a kontren noordsei fu a kriki ben de fu a lo fu Manase.
A kontren fu Manase ben e kba na westsei na a se, na noordwestsei a ben e miti nanga a kontren fu Aser èn na noordoostsei nanga a kontren fu Isakar.
11A lo fu Manase kisi wantu foto nanga dorpu di ben de ini a birti fu den foto, ini den kontren fu den lo fu Isakar nanga Aser. Disi ben de den foto: Bet-Sean, Yibleam, Dor makandra nanga wan pisi fu a sekanti, Endor, Taanak nanga Megido. 12Ma a lo fu Manase no ben man teki den foto dati abra. Den no ben man yagi den Kananitisma gwe èn den Kananitisma tan libi drape. 13Di den Israelitisma ben kon moro tranga, den meki den Kananitisma wroko leki srafu gi den, ma den no ben man yagi den alamala gwe.
Den sma fu den lo fu Efraim nanga Manase aksi fu moro gron
14Den bakapikin fu Yosef go na Yosua, dan den aksi en taki: “Fu sanede yu meki a lot sori wan leisi nomo sortu kontren un ben o kisi èn fu sanede yu gi wi wan kontren nomo? Wi de nanga furu sma fu di MASRA blesi unu te nanga now.” 15Yosua piki den taki: “Efu un de nanga furu sma èn a bergikontren fu Efraim pikin tumsi gi unu, dan un mus hari go na den busi fu den Perisitisma nanga den Refaitisma. Un kapu den opo èn meki presi gi unsrefi.” 16Ma den bakapikin fu Yosef piki Yosua taki: “Awinsi un du dati toku a bergikontren no sari gi unu. Boiti dati, den Kananitisma di e libi drape ini den dal abi isri fetiwagi. Den di fu Bet-Sean nanga den dorpu ini a birti fu en, nanga den wan di e libi ini a dal fu Yisreel.” 17Yosua piki den bakapikin fu Yosef, den lo fu Efraim nanga Manase taki: “Un na wan bigi folku di tranga srefsrefi. A tru taki wan kontren nomo no sari gi unu. 18Dat' meki a bergikontren nanga den dal fu en sa de fu unu. Awinsi na busi, un o man kapu en opo. Un o man yagi den Kananitisma nanga den isri fetiwagi fu den puru drape tu, awinsi den tranga.”
