Aaron nanga den manpikin fu en e kisi a frantwortu fu du a priesterwroko
1MASRA taigi Moses taki: 2“Teki Aaron nanga den manpikin fu en. Teki den krosi di den mus weri, a salfu-oli, a bulu di den o tyari leki ofrandi fu kisi pardon fu sondu, den tu man skapu nanga a mantyi nanga den brede di meki sondro dyesi. 3Kari a heri folku kon na wan na mofodoro fu a tenti pe yu kan miti nanga Gado.”
4Moses du leki fa MASRA taigi en fu du. A kari a folku kon na wan na mofodoro fu a tenti pe yu kan miti Gado. 5A taigi a folku taki: “Disi na san MASRA taki tak' un mus du.” 6Dan Moses meki Aaron nanga den manpikin fu en kon na fesi dan a wasi den nanga watra fu den kon krin ini Gado ai. 7Dan a weri a langa ondrokrosi gi Aaron, a tai a banti lontu en bere, èn a weri a langa empi gi en. Baka dati a weri a efod gi en, dan a tai en nanga a banti fu en. 8A weri a saka gi en di e kon tapu en borsu dan a poti a Urim nanga a Tuminston na ini. 9A lontu a ede fu Aaron nanga a duku nanga san a ben mus lontu en ede, dan a fasi a gowtu bromki, a santa bromki, na en tapu leki fa MASRA ben taigi en fu du. 10Baka dati Moses teki a salfu-oli dan a salfu a santa tenti nanga ala sani di ben de na ini, fu meki den kon santa. 11A dropudropu a oli seibi leisi tapu a altari dan a salfu a altari nanga ala den wrokosani fu en. A salfu a beki, pe anu nanga futu mus wasi, nanga den futupisi fu en fu meki den kon santa. 12Dan Moses kanti salfu-oli tapu a ede fu Aaron. A salfu en fu poti en aparti. 13Baka dati Moses meki den manpikin fu Aaron kon, dan a weri a langa ondrokrosi gi den. A tai a banti lontu den bere, dan a lontu den ede nanga a duku, leki fa MASRA ben taigi en fu du.
14Moses meki den tyari a bulu kon gi a ofrandi fu kisi pardon fu den sondu, dan Aaron nanga den manpikin fu en poti den anu tapu a ede fu a bulu. 15Dan Moses srakti a bulu. A teki pikinso fu a brudu dan a lobi en nanga en finga na den tutu fu a altari fu krin a altari. A tra brudu a kanti na a futu fu a altari. Tapu a fasi disi a santa a altari fu a ben kan bun fu meki sma kon bun baka nanga Gado. 16A teki ala a fatu fu a inibere, a moro bun pisi fu a lever, den tu niri nanga a fatu fu den niri dan a bron den tapu a altari. 17Ma a buba fu a bulu, a meti fu en nanga a nyanyan san ben de ini a bere ete, Moses bron nanga faya dorosei fu a kampu, leki fa MASRA ben taigi en fu du.
18Baka dati Moses meki den tyari a man skapu kon di den bo bron leki ofrandi, dan Aaron nanga den manpikin fu en poti den anu tapu a ede fu a man skapu. 19Dan Moses srakti a man skapu. A brudu a fringi lontu na a skin fu a altari. 20A koti a skapu ini wantu pisi, dan a bron a ede, den pisi meti nanga a fatu. 21A wasi a inibere nanga den futu nanga watra, dan a bron den makandra nanga den tra pisi fu a man skapu tapu a altari. A ben de wan ofrandi di bron leki wan switi smeri di e gi MASRA prisiri. Wan ofrandi di bron nanga faya, leki fa MASRA ben taigi Moses fu du.
22Baka dati a meki den tyari a tra man skapu kon di den bo tyari leki ofrandi fu gi Aaron nanga den manpikin fu en a frantwortu fu a wroko, dan Aaron nanga den manpikin fu en poti den anu tapu a ede fu a man skapu. 23Dan Moses srakti a skapu. A teki pikinso fu a brudu dan a lobi en na a let' sei yesi fu Aaron, na a doi fu en leti anu nanga a doi fu en leti futu. 24A meki den manpikin fu Aaron kon, dan a lobi a brudu na den let' sei yesi, na a doi fu den leti anu nanga a doi fu den leti futu. A tra brudu a fringi lontu na a skin fu a altari. 25Dan Moses teki a fatu, a tere, ala a fatu fu a inibere, a moro bun pisi fu a lever, den tu niri, a fatu fu den niri nanga a let' sei baka bowtu. 26A teki wan fu den brede di ben meki sondro dyesi ini a mantyi di den ben poti na MASRA fesi, wan kuku gi san den ben lobi oli nanga wan plata kuku. A poti den tapu den fatu pisi fu a meti nanga a let' sei baka bowtu. 27Dan Moses poti ala den sani disi ini anu fu Aaron nanga den manpikin fu en fu den opo en go na loktu leki wan ofrandi na MASRA fesi. 28Baka dati Moses teki en na den anu, dan a bron en tapu a altari tapu den tra sani di ben o bron leki ofrandi. Na so a ben de wan ofrandi nanga wan switi smeri, di bron nanga faya gi MASRA, fu wei den gi a wroko. 29Dan Moses teki a borsu fu a skapu. A opo en go na loktu leki wan ofrandi na MASRA fesi. A borsu fu a skapu disi ben de fu Moses, leki fa MASRA ben taigi en. 30Baka dati Moses teki pikinso fu a salfu-oli nanga pikinso fu a brudu di ben de tapu a altari, dan a dropudropu en tapu Aaron, tapu a krosi fu Aaron, tapu den manpikin fu Aaron nanga tapu a krosi fu den. Tapu a fasi dati a santa Aaron, den krosi fu en, den manpikin fu en nanga den krosi fu den.
31Dan Moses taigi Aaron nanga den manpikin fu en taki: “Bori a meti na mofodoro fu a tenti pe yu kan miti nanga Gado. Drape un mus nyan en makandra nanga a brede di de ini a mantyi leki ofrandi fu wei un gi a wroko. Un nyan en leki fa mi taigi unu fu du. 32San tan abra fu a brede nanga a meti un mus bron nanga faya. 33Un no mus kmoto seibi dei langa na mofodoro fu a tenti pe yu kan miti nanga Gado. Un mus tan te leki den dei psa di de fanowdu fu wei unu. Bika na seibi dei de fanowdu fu wei unu. 34Ala sani di du tide un mus du den tra dei tu. Na so MASRA taki tak' a mus psa, fu un kan kon bun baka nanga En. 35Seibi dei langa un san tan dei nanga neti na mofodoro fu a tenti pe yu kan miti nanga Gado. Un sa hori un na den sani di MASRA komanderi un fu du, fu un no dede. Na so A komanderi mi.” 36Dan Aaron nanga den manpikin fu en du ala sani di MASRA ben meki Moses taigi den.
