Yesus go na Sakeus oso
1Dan Yesus waka go moro fara èn a psa ini a foto Yeriko. 2Now yu ben abi wan man di ben nen Sakeus. Sakeus ben de a edeman fu den man di e piki lantimoni, èn a ben gudu. 3A ben meki muiti fu si suma na Yesus, ma a no ben man si En fu di a ben syatu èn den sma ben furu. 4So Sakeus lon go na fesi, dan a kren go na ini wan werder figabon fu a kan si Yesus te A ben o psa drape. 5Di Yesus doro drape A luku go ini a bon, dan a taigi Sakeus taki: “Sakeus, saka kon es'esi na gron, bika tide Mi mus tan na yu oso.” 6Sakeus saka es'esi kmopo ini a bon, èn nanga prisiri a meki Yesus kon na ini en oso. 7Ma di den sma si dati, den bigin krutukrutu. Den taki: “A go tan na ini a oso fu wan sondusma.” 8Ma Sakeus opo tnapu dan a taigi Masra taki: “Masra, yere. Afu fu san mi abi, mi o gi den pôtisma. Èn efu mi ben puru wan sani na wan sma anu nanga tranga, dan mi sa gi en fo tron so furu baka.” 9Dan Yesus taigi en taki: “Tide Gado ferlusu den sma fu a oso disi, fu di a man disi na wan bakapikin fu Abraham tu. 10Bika A Manpikin fu Libisma kon fu suku den sma di e go lasi, èn fu ferlusu den.”
A agersitori fu den tin wrokoman
11Di den sma ben e arki san Yesus e taki, A gi den wan agersitori tu. Bika A ben de krosbei fu Yerusalem, èn den sma ben e prakseri taki na nownow so Gado ben o bigin tiri libisma. 12A taki: “Wan man fu wan prenspari famiri ben go na wan farawe kondre fu den meki a tron kownu. Baka dati a ben o drai kon baka na en kondre. 13Fosi a gwe, a kari tin fu den knekti fu en kon, dan a gi den alamala wan moni. A taigi den taki: ‘Un wroko nanga a moni disi te leki mi kon baka.’ 14Ma den sma fu a kondre fu en no ben lobi en. Dat' meki den seni boskopu go na a tra kondre tak' den no wani a man disi leki den kownu. 15Di a man tron kownu, a drai kon baka na en kondre. Dan a seni kari den knekti kon di a ben gi a moni. A ben wani sabi san den ben du nanga a moni san a ben gi den fu wroko. 16A fosi wan kon, dan a taki: ‘Masra, yu gi mi wan moni. Mi wroko nanga en, èn a meki tin moro.’ 17A kownu piki en taki: ‘Moi so, yu na wan bun knekti. Fu di yu ben wroko bun nanga a pikinso san mi gi yu, mi e gi yu makti abra tin foto.’ 18Dan a di fu tu knekti kon. A taki: ‘Masra, yu gi mi wan moni. Mi wroko nanga en, èn a meki feifi moro.’ 19A kownu taigi en taki: ‘Dan yu o tiri feifi foto.’ 20Dan wan tra knekti kon. A taki: ‘Masra, luku a moni fu yu dya. Mi ben tai en ini wan saka-anyisa, dan mi kibri en. 21Bika mi ben frede fu yu, fu di yu na wan sma di no e meki spotu. Yu e puru san yu no poti, èn yu e koti san yu no prani.’ 22Dan a kownu piki en taki: ‘Yu takru knekti yu! Yu eigi mofo o strafu yu. Yu ben sabi taki mi no e meki spotu. Yu sabi taki mi e puru san mi no poti, èn tak' mi e koti san mi no prani. 23We, dan fu sanede yu no go poti mi moni na bangi? Dan te mi ben kon baka, mi ben kan go teki en nanga san kon na en tapu.’ 24Dan a kownu taigi den tra man di ben e tnapu drape taki: ‘Un puru a moni na en anu, dan un gi a man di abi den tin.’ 25Den man piki kownu taki: ‘Masra, a abi tin kba!’ 26A kownu taki: ‘Mi e taigi un taki: Ala sma di abi, o kisi moro. Ma a sma di no abi, awinsi san a abi, den o puru na en anu.’ 27Dan a taki moro fara: ‘Un tyari den sma kon dya di no ben wani mi leki den kownu, dan un kiri den let' na mi fesi.’ ”
Yesus go ini a foto Yerusalem
28Di Yesus kba taki a sani disi, A waka na den fesi fu go na Yerusalem. 29Dan di A doro krosbei fu den dorpu Betfaga nanga Betania, ini a birti fu a Oleifbergi, A seni tu fu den man di ben e teki leri fu En go na fesi. 30A taigi den taki: “Un go na a dorpu san de na un fesi. Te un doro ini a dorpu, un o si wan yongu buriki san den sma tai drape. Noiti ete wan sma ben sidon na en tapu. Un lusu en, dan un tyari en kon gi Mi. 31Efu wan sma sa aksi un fu sanede un e lusu a buriki, un mus taki: ‘Masra abi en fanowdu.’ ” 32Den tu man gwe, dan den feni a yongu buriki soleki fa Yesus taki. 33Di den ben e lusu a buriki, den sma di ben abi en aksi den taki: “Fu sanede un e lusu a buriki?” 34Den piki taki: “Masra abi en fanowdu.” 35Dan den tyari en go gi Yesus. Den bradi den krosi na tapu a buriki, dan den yepi Yesus kren go sidon na en tapu. 36Di A e rei gwe moro fara, den sma bradi den krosi tapu a pasi gi En. 37Di A doro krosbei fu Yerusalem pe A ben mus saka a Oleifbergi, dan a bigi grupu sma di ben e teki leri fu En, bigin prisiri. Den prijse Gado nanga tranga sten fu ala den bigi sani san den si. 38Den taki: “Blesi de tapu a Kownu di e kon ini a nen fu Masra! Freide de na heimel. Gado mus kisi ala grani!” 39Wantu Fariseiman di ben de na mindri a bigi grupu sma, taigi Yesus taki: “Meister, bari den sma fu Yu fu den hori den mofo!” 40Ma A piki den taki: “Fu tru Mi e taigi unu: Efu den sma disi hori den mofo, den ston o bari a srefi sani.”
41Di Yesus doro moro krosbei tak' A ben kan si a foto Yerusalem, A bigin krei gi en. 42A taki: “Tye, un sma fu Yerusalem. Mi winsi taki tide ete un ben kan ferstan san e tyari freide kon mindri unu nanga Gado! Ma now a kibri gi unu. 43Wan ten o kon pe den feyanti fu unu o lontu unu. Den o tapu unu fu ala sei, meki no wan sma no man go ini a foto noso kmopo na ini. 44Den o figi unu nanga den pikin fu unu puru na grontapu. No wan ston o tan na tapu wan trawan, bika un no ben sabi a ten di Gado ben wani yepi unu.”
Gado oso mus de wan presi fu begi
45Di Yesus doro na Yerusalem, A go na ini a tempel dan A bigin yagi ala den sma gwe di ben e seri sani drape. 46A taigi den taki: “A skrifi taki: ‘Mi oso mus de wan presi fu begi.’ Ma unu meki a tron wan nesi fu fufuruman.” 47Ala dei Yesus ben e gi leri na ini a tempel. Den prenspari priester, den sabiman fu Gado wèt nanga den fesiman fu a folku, ben e suku wan fasi fu kiri En. 48Ma den no ben man feni no wan fasi, bika nanga opo mofo a heri folku ben e arki san A ben e leri.
