Lukas 20

₁Yesus ben e gi sma leri na ini a tempel, èn A ben e ferteri den a bun nyunsu. Wan fu den dei dati den prenspari priester, den sabiman fu Gado wèt nanga den fesiman fu a folku, kon na En. ₂Den aksi En taki: “Taigi unu, pe Yu feni a leti fu du den sani san Yu e du? Suma gi Yu a makti fu du den sani disi?” ₃A piki den taki: “Mi wani aksi un wan sani tu. Un taigi Mi: ₄Suma ben gi Yohanes a makti fu dopu sma? Gado noso libisma?” ₅Dan den man taki a tori nanga makandra. Den taki: “Efu un taki: ‘Na Gado,’ dan A o aksi unu: ‘Fu sanede un no ben bribi en dan?’ ₆Ma efu un taki: ‘Na libisma,’ dan a heri folku o ston un kiri. Bika den e bribi taki Yohanes ben de wan profeiti.” ₇So den piki taki: “Wi no sabi suma gi en a makti.” ₈Ne Yesus taigi den taki: “We, dan Mi srefi no o taigi unu pe Mi feni a leti fu du den sani san Mi e du.”

₉Dan Yesus ferteri a folku wan agersitori. A taki: “Wan man ben prani droifibon na ini en gron. A yuru a droifidyari gi tra sma, dan a gwe wan heri pisten na wan tra kondre. ₁₀Di a ten doro fu piki den droifi, a seni wan knekti go na den man di yuru a droifidyari, fu den gi en den droifi san en masra ben mus kisi. Ma den man fon en, dan den seni en gwe nanga soso anu. ₁₁Dan a man di abi a droifidyari seni wan tra knekti go, ma den man fon a knekti disi tu. Den gi en syen, dan den seni en gwe nanga soso anu. ₁₂Dan a man seni ete wan knekti go, a di fu dri. Ma den man gi a knekti disi mankeri, dan den srepi en puru ini a droifidyari. ₁₃Dan a man di abi a droifidyari aksi ensrefi taki: ‘San mi mus du now? We, mi o seni a manpikin fu mi go, di mi lobi. Den no sa du den sani dati nanga en.’ ₁₄Ma di den man di ben yuru a gron si a manpikin, den taigi makandra taki: ‘Na a boi disi o kisi a gron te en p'pa dede. Kon meki un kiri en, dan unu o kisi a gron.’ ₁₅So den srepi a manpikin go na dorosei fu a droifidyari, dan den kiri en.” Dan Yesus aksi den sma taki: “San un e prakseri taki a man di abi a droifidyari o du nanga den man? ₁₆Mi e taigi unu: A o kon kiri den man di ben yuru a droifidyari, dan a o yuru en gi tra sma.” Di den sma yere a sani disi, den taki: “Disi no musu psa, kwet'kweti!” ₁₇Ma Yesus luku den, dan A taki: “A skrifi taki: ‘A ston di den mesreman feni taki no bun, na a srefi ston dati tron a moro prenspari ston fu a heri oso. San a sani disi wani taki?’ ” ₁₈Dan Yesus taki moro fara: “Ala sma di fadon tapu a ston disi, o broko ala den bonyo. Èn efu a ston disi fadon na tapu wan sma, a o masi en tron wan doni.” ₁₉Den sabiman fu Gado wèt nanga den prenspari priester ben kon ferstan taki na gi den A koti wan odo nanga a agersitori disi. Dat' meki den ben wani grabu En a srefi yuru dati, ma den ben frede a folku.

₂₀Dan so den seti luru gi Yesus. Den seni sma fu go luku efu Yesus ben o taki wan sani san no fiti, fu den kan gi En abra na ini anu fu a granman. Den man disi ben mus du leki den na sma di e libi leki fa Gado wani. ₂₁Dan den man taigi Yesus taki: “Meister, un sabi taki den sani san Yu e taki, nanga san Yu e leri, na tru sani. Yu no e wroko nanga fesi, ma Yu e leri unu a pasi fu Gado leki fa a de. ₂₂Ma un wani aksi Yu wan sani: A fiti fu pai lantimoni na a grankownu fu den Romeinisma, efu a no fiti?” ₂₃Ma Yesus si taki na fasi den ben wani fasi En. Dat' meki A taigi den taki: ₂₄“Kon meki Mi si wan moni. Suma fesi nanga suma nen de na en tapu?” Den piki En taki: “A di fu a grankownu.” ₂₅Ne Yesus piki den taki: “Dan un gi a grankownu san na fu en, èn un gi Gado san na fu Gado.” ₂₆So den man no ben man kisi Yesus fu A taki wan sani san no bun, fu a folku yere. Dan den hori den mofo, bika den ben ferwondru fu a fasi fa A piki den.

₂₇Wantu Saduseiman kon na Yesus fu aksi En wan sani. Den man disi no ben e bribi taki dedesma o kon na libi baka. ₂₈Den taki: “Meister, Moses ben skrifi taki efu wan man di abi wan brada trow, èn a dede sondro fu a kisi pikin, dan en brada mus trow nanga a uma fu meki pikin gi en brada di dede. ₂₉Now seibi brada ben de. A fosi wan trow, ma a dede sondro fu libi pikin na baka. ₃₀Dan a brada di waka na en baka trow nanga a uma, ₃₁dan a di fu dri, te leki ala den seibi brada ben trow nanga en. Ma den alamala dede sondro fu kisi pikin. ₃₂Te fu kba, a uma srefi kon dede.” ₃₃Dan den aksi Yesus taki: “Te den dedesma o kon na libi baka, sortu wan fu den brada sa abi a uma disi leki en trow-uma? Bika ala seibi man ben trow nanga en.” ₃₄Yesus piki den taki: “Den sma fu a ten disi e trow nanga makandra. ₃₅Ma den sma di Gado feni warti fu opo baka na dede, èn libi ini a ten di e kon, no o trow nanga makandra. ₃₆Den no o dede moro, bika den o de leki den engel. Den o de pikin fu Gado, fu di den kon na libi baka. ₃₇Moses srefi sori krinkrin tak' dedesma o kon baka na libi. Ini a tori fu a pikin bon di ben teki faya sondro fu bron, Moses kari Gado: a Gado fu Abraham, Isak, nanga Yakob. ₃₈Ini Gado ai, den sma dati e libi. So un e si taki Gado a no Gado fu dedesma, ma fu sma di e libi.” ₃₉Dan wantu fu den sabiman fu Gado wèt taigi Yesus taki: “Meister, Yu piki bun.” ₄₀Èn den no ben prefuru moro fu aksi En wan sani.

₄₁Dan Yesus aksi den sma taki: “Fa den sma kan taki tak' a Mesias na wan bakapikin fu kownu David? ₄₂Bika David srefi skrifi ini wan fu den Psalm taki: ‘Masra Gado taigi mi Masra taki: Kon sidon na Mi let'anu sei, ₄₃te leki Mi meki den feyanti fu Yu tron Yu futubangi.’ ₄₄We, efu David kari a Mesias en Masra, dan fa A kan de en bakapikin dan?”

₄₅A ten di a heri folku ben e arki san A e taki, Yesus taigi den sma di e teki leri fu En taki: ₄₆“Un mus luku bun nanga den sabiman fu Gado wèt. Den lobi fu weri langa krosi e koiri, èn den lobi te sma e gi den lespeki odi na wowoyo. Den lobi fu sidon na den moro bun presi ini den kerki, èn den wani sidon na den moro prenspari presi te den go nyan na sma oso. ₄₇Den e puru den oso na a anu fu den uma di masra dede kba, dan den e begi langabere begi fu sma denki taki den bun. Dat' meki a strafu fu den o moro hebi.”