Lukas 22

₁A fesa pe den e nyan brede san meki sondro dyesi, ben de krosbei. A fesa dati den e kari Paska. ₂Den prenspari priester nanga den sabiman fu Gado wèt ben e suku wan fasi fu puru Yesus na pasi, bika den ben frede a folku. ₃Dan Satan go na ini a ati fu Yudas di den ben e kari Iskariot tu. A ben de wan fu den twarfu man di ben e teki leri fu Yesus. ₄Dan so Yudas go taki nanga den prenspari priester nanga den edeman fu den man di e hori wakti gi a tempel, fa a ben kan gi Yesus abra na ini den anu. ₅Den ben breiti, èn den agri makandra fu pai en. ₆Yudas ben feni en bun. Dan a bigin luru wan bun okasi fu gi Yesus abra na den, sondro tak' a folku sabi.

₇So a fesa doro pe den ben e nyan brede san meki sondro dyesi. Dan tapu a dei di den ben mus srakti wan pikin skapu fu nyan Paska, ₈Yesus seni Petrus nanga Yohanes fu go du wan sani gi En. A taki: “Un gwe go meki ala sani klari fu un kan nyan a Paska-nyanyan.” ₉Den aksi En taki: “Masra, pe Yu wani fu un meki sani klari?” ₁₀Yesus taigi den taki: “Arki. Te un go ini a foto, wan man di e tyari wan kroiki o kon miti unu. Un waka na en baka, go ini a oso pe a e go, ₁₁dan un taigi a man di abi a oso taki: ‘A Meister seni aksi pe a kamra de pe A kan nyan Paska nanga den man di e teki leri fu En.’ ₁₂Dan a man o sori unu wan bigi kamra na sodro, di abi ala sani kba. Drape un mus meki a Paska-nyanyan klari.” ₁₃Na so Petrus nanga Yohanes gwe, èn ala sani waka soleki fa Yesus taki. Dan den meki a Paska-nyanyan klari.

₁₄Di a yuru fu nyan a Paska-nyanyan doro, Yesus nanga den boskopuman fu En teki presi sei a tafra. ₁₅Dan Yesus taigi den taki: “Mi ben angri sote fu nyan a Paska disi nanga unu, fosi Mi bigin nyan pina. ₁₆Fu tru Mi e taigi un taki: Mi no o nyan Paska moro te leki a sani san Paska wani taki kon tru, te Gado o tiri libisma.” ₁₇Dan Yesus teki wan kan, A taki Gado tangi, dan A taki: “Un teki en, dan un alamala dringi fu en. ₁₈Bika Mi e taigi un taki: Bigin fu now Mi no o dringi win moro, te leki a ten doro pe Gado o tiri libisma.” ₁₉Baka dati Yesus teki wan brede. Di A taki Gado tangi, A broko en, dan A gi den man di ben e teki leri fu En. A taki: “Disi na Mi skin, san Mi o gi abra fu un ede. Un mus tan du disi fu memre Mi.” ₂₀Di den kba nyan, Yesus teki wan kan dan A taki: “A kan disi na a nyun ferbontu. A brudu fu Mi san o lon gi unu, o stampu a ferbontu disi.

₂₁Ma un arki: A sma di o seri Mi, de dya nanga Mi na tafra. ₂₂Bika a Manpikin fu Libisma sa dede leki fa a ben skrifi kba na fesi. Ma a man di seri En mus luku bun!” ₂₃Dan den bigin aksi makandra sortu wan fu den sa du sowan sani.

₂₄Den man di ben e teki leri fu Yesus bigin krutu nanga makandra sortu wan fu den moro prenspari. ₂₅Dan Yesus taigi den taki: “Den kownu fu den folku e basi den, èn den wan di abi makti, den sma e kari: sma di e du bun gi a folku. ₂₆Ma unu no mus de so. A moro prenspari sma na un mindri mus tyari ensrefi leki a moro pikinwan, èn a fesiman fu unu mus tyari ensrefi leki a sma di e dini trawan. ₂₇Suma moro prenspari? A sma di de na tafra, noso a sma di e poti a nyanyan tapu a tafra. Na a sma di de na tafra moro prenspari. Ma Mi de na un mindri leki a sma di e dini trawan.

₂₈Unu ben de ala ten nanga Mi di tesi ben miti Mi. ₂₉Dan soleki fa Mi P'pa gi Mi a leti fu rigeri, na so Mi e gi unu a srefi leti tu. ₃₀Unu o nyan èn dringi na Mi tafra te Mi sa rigeri leki Kownu, èn unu o sidon na tapu kownusturu fu tiri den twarfu lo fu Israel.”

₃₁Dan Yesus taki: “Simon, Simon, luku bun! Satan kisi primisi fu seki unu leki fa yu e wai graan, fu a kan tesi a bribi fu unu. ₃₂Ma Mi begi gi yu fu yu no lasi bribi. Dan te yu drai kon baka na Mi, yu mus kraka den trawan.” ₃₃Dan Petrus taigi Yesus taki: “Masra, mi de klar'klari fu go nanga Yu na ini straf'oso, èn fu dede srefi nanga Yu!” ₃₄Ma Yesus taki: “Petrus, Mi e taigi yu taki: Fosi kakafowru bari tide, yu o taki dri leisi taki yu no sabi Mi.”

₃₅Yesus aksi den taki: “Di Mi ben seni unu fu go panya a bun nyunsu, sondro fu un tyari moni, wan saka noso susu, un ben mankeri wan sani?” Den piki taki: “Nono, un no ben mankeri noti.” ₃₆Ne Yesus taki: “Ma now, a sma di abi moni mus tyari en, èn a mus tyari wan saka tu. A sma di no abi wan owru mus seri en dyakti fu bai wan. ₃₇Bika a skrifi taki: ‘Den si en leki wan abani,’ èn Mi kan taigi unu taki na dati o psa nanga Mi. Bika san skrifi fu Mi musu psa.” ₃₈Dan den man taigi En taki: “Masra, luku tu owru dyaso.” Yesus piki den taki: “A nofo!”

₃₉Yesus kmopo na ini Yerusalem, dan A go na a Oleifbergi, soleki fa A ben gwenti. Den man di ben e teki leri fu En go nanga En. ₄₀Di Yesus doro drape A taigi den taki: “Un begi fu un no kon na ini tesi.” ₄₁Dan Yesus kmopo na den mindri, go pikinso moro fara. A kindi na gron dan A begi taki: ₄₂“P'pa, efu Yu wani, puru a kan disi na Mi fesi, meki Mi no nyan a pina disi. Ma a no san Mi wani, ma na san Yu wani musu psa.” ₄₃Dan wan engel kmopo fu heimel kon na En fu gi En krakti. ₄₄Yesus ben frede te fu dede, dan A bigin begi moro tranga èn a sweti fu En ben dropu na gron leki brudu. ₄₅Di Yesus kba begi, A opo go na den man di ben e teki leri fu En, dan A si taki den fadon na sribi soso fa den ben sari. ₄₆A aksi den taki: “Sanede un e sribi? Un opo, dan un begi fu un no kon na ini tesi.”

₄₇Yesus no ben kba taki ete, di wan bigi grupu sma doro. Yudas, wan fu den twarfu man di ben e teki leri fu Yesus, ben e waka na den fesi. A waka kon na Yesus fu gi En wan bosi. ₄₈Ma Yesus aksi en taki: “Yudas, nanga wan bosi yu e seri a Manpikin fu Libisma?” ₄₉Di den man di ben de nanga Yesus si san ben o psa, den taki: “Masra, un mus teki un owru feti nanga den?” ₅₀Dan wan fu den kapu a let'sei yesi puru fu a knekti fu a granpriester. ₅₁Ma Yesus taki: “A nofo!” A fasi a yesi fu a man, dan a man kon betre. ₅₂Yesus taigi den prenspari priester, den edeman fu den man di e hori wakti gi a tempel, nanga den fesiman fu a folku di kon fu grabu En taki: “Un kon nanga tiki nanga owru, neleki un kon teki wan bigi ogriman. ₅₃Ala dei Mi ben de nanga unu ini a tempel, ma un no grabu Mi. Ma disi na a yuru fu unu, pe a makti fu dungru e rigeri.”

₅₄Dan den grabu Yesus, tyari En go na a oso fu a granpriester. Petrus ben e waka fara na den baka e kon. ₅₅Dan den man meki wan faya mindrisei fu a dyari, den go sidon nanga makandra èn Petrus go sidon na den mindri. ₅₆Dan wan uma di ben wroko drape, si Petrus sidon sei a faya. A luku Petrus bun, dan a taki: “A man disi ben de nanga Yesus tu.” ₅₇Ma Petrus lei taki: “Uma, mi no sabi En!” ₅₈Wan syatu pisten baka dati, wan tra sma si Petrus, dan a taki: “Yu na wan fu den man di ben e teki leri fu En tu.” Ma Petrus taki: “No, a no mi!” ₅₉Baka wan yuru so, wan tra man ben hori nomonomo e taki: “A tru. A man disi ben de nanga En tu, bika en na fu Galilea.” ₆₀Ma Petrus piki taki: “No, mi no sabi san yu e taki!” A srefi momenti di Petrus ben e taki, wan kakafowru bari. ₆₁Dan Masra drai luku Petrus. Ne Petrus memre taki Masra ben taigi en taki: “Fosi kakafowru bari tide, yu o taki dri leisi taki yu no sabi Mi.” ₆₂Dan Petrus go na dorosei, dan a bari wan krei.

₆₃Den man di ben hori wakti gi Yesus, teki En leki spot'popki, èn den naki En. ₆₄Den tapu En ai nanga wan krosi, dan den taigi En taki: “Sori unu tak' Yu na wan profeiti. Taigi unu suma naki Yu.” ₆₅Dan den taki wan lo tra sani fu afrontu Yesus.

₆₆Di dei opo, a grankrutu fu den Dyusma kon makandra, sobun den prenspari priester nanga den sabiman fu Gado wèt. Den tyari Yesus go na fesi den man disi, ₆₇dan den taigi En taki: “Efu Yu na a Mesias, taigi un dan!” A piki den taki: “Awinsi Mi taigi unu, un no o bribi. ₆₈Èn awinsi Mi aksi un wan sani, un no o piki. ₆₉Ma bigin fu now, a Manpikin fu Libisma o sidon na a let'anu sei fu Gado di abi Makti.” ₇₀Dan den man aksi En taki: “Na Yu na a Manpikin fu Gado dan?” Yesus piki taki: “Na unu srefi e taki tak' Mi na En.” ₇₁Dan den man taki: “Un no abi kotoigi fanowdu moro. Un srefi yere san A taki nanga En eigi mofo!”