Lukas 23

₁Ne a heri grupu opo, dan den tyari Yesus go na fesi Pilatus.

₂Dan den bigin kragi En taki: “Un kon si taki a man disi e drai a ede fu a pipel fu unu. A e taigi den taki den no mus pai a grankownu lantimoni èn taki na En na a Mesias, a Kownu.” ₃Dan Pilatus aksi En taki: “Na Yu na a Kownu fu den Dyusma?” Yesus piki en taki: “Na leki fa yu taki.” ₄Dan Pilatus taigi den prenspari priester nanga a bigi grupu sma drape taki: “Mi no feni no wan sani na a man disi fu strafu En.” ₅Ma den tan hori doro taki: “A e sutu faya gi a folku ini heri Yudea nanga a leri fu En. A bigin na Galilea, dan now A doro te dya.” ₆Di Pilatus yere san den taki, a aksi efu a man disi na fu Galilea. ₇Dan di a kon ferstan taki A kmopo na ini a kontren pe Herodes ben abi fu taki, a seni En go na en. A pisten dati Herodes ben de na Yerusalem.

₈Di Herodes si Yesus a ben breiti srefsrefi, bika wan heri pisten kba a ben wani si En. A ben yere fu En, èn a ben angri fu Yesus sori en wan marki. ₉Herodes aksi Yesus wan lo sani, ma Yesus no piki en noti. ₁₀Den prenspari priester nanga den sabiman fu Gado wèt ben tnapu e kragi Yesus fayafaya. ₁₁Dan Herodes nanga den srudati fu en, bigin broko Yesus saka èn den teki En leki spot'popki. A weri wan moi krosi gi En, dan a seni En go baka na Pilatus. ₁₂A srefi dei dati, Herodes nanga Pilatus tron mati. Ma fosi dati den ben e libi leki feyanti nanga densrefi.

₁₃Dan now Pilatus kari den prenspari priester, a folku nanga den edeman fu a folku kon makandra. A taigi den taki: ₁₄“Un tyari a man disi kon na mi tak' A e drai a folku ede. Ma luku, let' na un fesi mi aksi En, ma mi no feni noti fu den sani san un e taki fu En. ₁₅Herodes srefi no feni noti, bika a seni En kon baka gi wi. Luku, A no du noti fu A mus dede. ₁₆Dat'ede mi o wipi En, dan mi o lusu En.” ₁₇Pilatus taki dati bika tapu a Paskafesa, a ben mus lusu wan straf'man gi den. ₁₈Ma den sma bari leki wan man taki: “Puru En na un tapu! Lusu Barabas gi unu!” ₁₉Den ben sroto a man disi fu wan dyugudyugu ini a foto, èn fu di a ben kiri wan sma. ₂₀Dan fu di Pilatus ben wani lusu Yesus, a taki baka nanga den sma. ₂₁Ma den ben e bari taki: “Spikri En na wan kroisi! Spikri En na wan kroisi!” ₂₂Pilatus taki a di fu dri leisi nanga den. A aksi den taki: “Ma sortu ogri a man disi du? Mi no feni noti fu meki taki A mus dede. Dat'ede mi o wipi En, dan mi o lusu En.” ₂₃Ma den sma ben e tan bari bun tranga tak' den mus spikri En na wan kroisi. Te fu kba a ben abi fu yere den. ₂₄Dan Pilatus teki a besroiti fu gi den san den wani. ₂₅A lusu a man san den ben wani, di ben sroto fu wan dyugudyugu èn fu di a ben kiri wan sma. Dan a gi Yesus abra fu den du nanga En san den wani.

₂₆Di den e tyari Yesus gwe, den grabu wan man Simon fu a foto Sirena, di ben kmopo na boiti e kon. Dan den poti a kroisi tapu en skowru fu a tyari en na Yesus baka. ₂₇Wan bun bigi grupu fu a folku ben e waka baka Yesus. Ini a grupu yu ben abi furu umasma, di ben e sari èn di ben e krei fu En ede. ₂₈Ma Yesus drai taigi den taki: “Uma fu Yerusalem, un no krei fu Mi ede, ma un krei gi unsrefi nanga den pikin fu unu. ₂₉Bika wan ten o kon pe sma o taki: ‘Den uma di no man kisi pikin, nanga den wan di no kisi pikin ete, abi koloku. Èn den uma di noiti gi pikin bobi, abi koloku tu.’ ₃₀Dan den sma o bigin taigi den bergi taki: ‘Fadon na un tapu!’ Den o taigi den pikin bergi taki: ‘Kibri unu!’ ₃₁Bika efu na disi den e du nanga a lala udu, san den sa du nanga a drei udu dan?”

₃₂Makandra nanga Yesus, den ben tyari tu abani gwe fu go kiri.

₃₃Di den doro na a presi san den e kari Dede-ede, den spikri Yesus na a kroisi. Den spikri den tu abani na wan kroisi tu: wan na En let'anu sei, èn a trawan na En kruktu-anu sei. ₃₄Dan Yesus taki: “P'pa, gi den pardon, bika den no sabi san den e du.” Dan den hari a lot fu prati En krosi. ₃₅A folku ben tnapu e luku, èn den edeman fu den ben teki En meki spotu. Den taki: “A ben yepi trawan. We, meki A yepi Ensrefi efu En na a Mesias, efu En na a Wan di Gado teki fu du En wani!” ₃₆Den srudati teki En leki spot'popki tu. Den waka kon na En, dan den gi En swa win fu A dringi. ₃₇Dan den taki: “Efu Yu na a Kownu fu den Dyusma, yepi Yusrefi!” ₃₈Den ben skrifi poti na En edesei: “Disi na a Kownu fu den Dyusma.” ₃₉Wan fu den abani di ben anga na a kroisi, afrontu En taki: “A no Yu na a Mesias? We, yepi Yusrefi, dan Yu yepi unu tu!” ₄₀Ma a trawan bari en taki: “Yu no e frede Gado, no? Yu kisi a srefi strafu leki En. ₄₁A strafu san un kisi fiti unu, bika disi na a paiman fu san un ben du. Ma a Man disi no du no wan ogri.” ₄₂Dan a abani taki: “Yesus, memre mi te Yu teki Yu presi leki Kownu.” ₄₃Yesus piki en taki: “Fu tru Mi e taigi yu: Tide srefi yu sa de nanga Mi na Paradeis.”

₄₄Twarfu yuru ten so a heri kondre kon dungru te leki dri yuru bakadina, ₄₅bika a son ben kon dungru. Dan a garden ini a santa presi priti na tu. ₄₆Dan Yesus bari nanga tranga sten taki: “P'pa, na ini Yu anu Mi e poti Mi yeye.” Di Yesus taki dati, En bro koti. ₄₇Di a kapten fu den srudati si san psa, a gi Gado glori. A taki: “Fu tru, a Man disi ben de wan bun sma.” ₄₈A bigi grupu sma di ben kon fu luku a sani disi, drai go baka na oso di den si san psa. Den ben naki densrefi tapu den borsu fu sori taki den e sari. ₄₉Ala den sma di ben sabi Yesus, ben tnapu farawe e luku san e psa, so tu den uma di ben waka kmopo fu Galilea kon nanga En.

₅₀Yu ben abi wan man Yosef di ben de wan fu den memre fu a grankrutu fu den Dyusma. A ben de wan bun sma èn a ben libi bun ini Gado ai. ₅₁A no ben agri nanga a besroiti san den ben teki èn nanga san den ben du. A man disi ben kmoto fu a Dyu foto Arimatea, èn a ben angri fu a ten doro pe Gado o tiri libisma. ₅₂A go na Pilatus, dan a aksi en a dedeskin fu Yesus. ₅₃Baka di a puru en na a kroisi, a domru en na ini wan linnen krosi, dan a poti en na ini wan grebi san den ben diki ini a bergiskin. Noiti ete wan sma ben beri drape. ₅₄A ben de a dei di den Dyusma ben e meki ala sani klari gi a sabatdei di ben o bigin. ₅₅Den uma di ben kmopo nanga Yesus na Galilea, waka baka Yosef. Den si a grebi èn fa Yosef poti a dedeskin didon na ini. ₅₆Dan den drai go baka na oso èn den poti mirre nanga tra spesrei klari. Ma tapu a sabatdei den rostu soleki fa a wèt e taki.