1Betlehem Efrata, yu na wan fu den pikinwan
na mindri den famiri fu Yuda,
ma na ini yu wan tiriman o kmoto
di Mi o poti fu tiri Israel.
Den afo fu en na fu bun langa bifo,
na fu ten di didon fara na wi baka.
2A sa libi den abra te leki a ten doro
fu a uma di de nanga bere kisi a pikin.
Dan den brada fu en di ben tan abra
sa drai kon baka na den sma fu Israel.
3Dan a sa opo èn tiri den,
leki fa wan skapuman e tiri en skapu.
A o du dati nanga a krakti fu MASRA,
nanga a glori fu a nen fu MASRA,
a Gado fu en.
Dan den sa libi ini freide.
Bika a makti fu En sa de te na a kba fu grontapu,
4èn a sa tyari freide kon.
Te Asur broko kon ini a kondre,
broko kon ini den kownu-oso fu wi,
wi o teki seibi skapuman
nanga aiti fesiman fu a folku.
5Dan den sa naki Asur nanga deigri,
nanga brenki deigri den o teki Nimrod abra.
A sa ferlusu wi fu Asur,
te Asur broko kon ini a kondre fu wi
te a kon na tapu wi gron.
6Dan den sma fu Yakob,
di tan abra na mindri furu folku,
o de leki dow di kmoto fu MASRA,
leki alen di e nati a grun grasi,
di no e ferwakti sani fu sma,
noso wakti fu sma du sani gi en.
7Den sma fu Yakob di tan abra,
o de na mindri sma fu furu kondre,
mindri sma fu difrenti folku.
Den o de leki wan lew na mindri den meti fu a busi,
leki wan yongu lew na mindri den skapu,
di e naki den trowe èn priti den te a broko kon ini a skapupen,
sondro taki wan sma man yepi den skapu.
8Yu sa wini ala den sma di wani feti nanga yu,
èn yu sa kiri ala den feyanti fu yu.
9Na disi MASRA taki:
A pisten dati Mi sa kiri ala den asi puru na unu mindri.
Ala fetiwagi Mi o broko.
10Mi o broko ala den foto ini a kondre fu unu.
ala den tranga kibripresi Mi o broko trowe.
11Ala den tofru sani Mi o puru na un anu.
No wan lukuman o de moro na un mindri.
12Mi o broko ala den ston nanga udu popki puru
fu den kruktu gado fu unu,
nanga den spesrutu ston di un e anbegi.
Un no sa boigi moro gi sani di unsrefi meki.
13Mi sa hari ala den postu puru na un mindri pe un e anbegi den gado,
èn Mi o broko ala den foto fu unu.
14Nanga trutru hebi atibron Mi o strafu den folku
di no ben arki.
