1Di den Israelitisma ben e libi kba ini den difrenti foto, den kon bogobogo na wan tapu a pren fesi a Watrapoort, 2tapu a fosi dei fu a di fu seibi mun. Dan den begi Esra, wan sabiman fu a wèt di MASRA ben gi Moses gi Israel, fu go teki a buku pe den wèt dati skrifi. 3Priester Esra now, teki a buku tyari go na a presi pe den sma ben de makandra; man, uma nanga pikin, di ben man ferstan den sani dati kba. 4Dan drape tapu a pren fesi a Watrapoort, a leisi gi den sma, fu mamanten te leki mofoneti. Iniwan ben e arki bun san a buku fu a wèt ben e taki.
5Esra a sabiman fu a wèt, ben tnapu tapu wan udu podium di den ben meki gi a okasi dati. Matitya, Sema, Anaya, Uria, Hilkia nanga Maaseya, ben tnapu na en leti-anu èn Pedaya, Misael, Malkia, Hasum, Hasbadana, Sekarya nanga Mesulam, ben tnapu na en kruktu-anu. 6A heri pipel ben kan si Esra krinkrin di a e opo a buku, fu di a ben tnapu moro hei leki den. Èn leki fa a opo a buku, den alamala go tnapu. 7Dan Esra gi MASRA, a bigi Gado, grani, èn ala sma piki nanga den anu na hei taki: “Amen, Amen.” Dan den kindi, èn den boigi nanga den fesi na gron anbegi MASRA. 8Di den sma go tnapu baka, den Lefitiman Yesua, Bani, Serebya, Yamin, Akub, Sabetai, Hodia, Maaseya, Kelita, Asarya, Yosabad, Hanan nanga Pelaya, bigin brokobroko gi den san a wèt wan taki. 9Den ben e leisi wan krin fasi kmoto fu a buku, fu a wèt fu Gado, dan den ben e brokobroko san den leisi fu den sma ben kan ferstan. 10Di den sma yere den sani di skrifi na ini a wèt, den alamala bigin krei. Ma komsarsi Nehemia nanga priester Esra, a sabiman fu a wèt, makandra nanga den Lefitiman di ben brokobroko a wèt gi den sma, taigi den taki: “Un no abi fu sari noso krei, bika a dei disi na wan santa dei gi MASRA, a Gado fu unu. A dei disi na wan spesrutu dei. 11Un go na oso go bori switi nyanyan. Dan un nyan, un dringi èn un prati gi sma di no abi. A dei disi na wan santa dei gi MASRA. Un no abi fu sari, ma meki a prisiri fu MASRA de un krakti.” 12Den Lefitiman srefi trowstu den sma. Den taki: “Un tan tiri èn un no sari moro langa, bika a dei disi na wan santa dei.” 13So ala den sma go na den oso fu nyan, fu dringi èn fu prati a switi nyanyan fu den nanga trawan. Den meki bigi prisiri, bika den ferstan san den yere.
14Tapu a di fu tu dei, ala den edeman fu den famiri, den priester nanga den Lefitiman kon na Esra, fu stuka a wèt. 15Ne den kon si wan sani: den kon si tak' a skrifi ini a wèt di MASRA ben meki Moses gi den leki Israelitisma, taki den mus libi ini kampu tapu a Sukotfesa di e ori ini a di fu seibi mun. 16A wèt skrifi tu tak' den mus seni komanderi den sma ini ala den foto fu a kondre, nanga den sma fu Yerusalem taki: “Un go na den bergi go broko taki fu a oleifbon, fu a oleasterbon, fu a mirtebon, fu a palmbon, nanga fu tra bon di lai wiwiri. Dan un meki kampu nanga den soleki fa a skrifi.” 17Den sma go broko den taki, èn den meki kampu tapu den plata daki fu den oso, tapu den dyari, tapu a dyari fu a tempel fu Gado èn tapu den pren fesi a Watrapoort nanga a Efraimpoort. 18So ala den sma di ben drai kon baka fu a kondre pe den ben de leki straf'man, meki den sortu kampu dati èn go tan ini den. Sensi a ten fu Yosua, a manpikin fu Nun, den Israelitisma no ben du a sani dati. Dat' meki den ben e prisiri srefsrefi. 19Esra leisi gi den fu a buku, a wèt fu Gado, fu a fosi dei te kon miti a kriboi dei. Seibi dei langa a fesa ori. Tapu a di fu aiti dei, den tapu a fesa nanga wan spesrutu konmakandra, soleki fa a ben skrifi na ini a wèt.
