A pipel e taki en sondu
1Den Israelitisma kon makandra tapu a di fu tutenti-na-fo dei fu a srefi mun fu faste; den weri lowkrosi èn den poti santi tapu den ede fu sori taki den e sari. 2Den Israelitisma no meki no wan doroseisma kon pe den ben de. Dan den tnapu èn den taki den sondu, nanga di fu den afo fu den. 3Dan di den tnapu so tapu den presi, sma leisi dri yuru langa gi den fu a wètbuku fu MASRA, a Gado fu den. Baka dati, dri yuru langa, den kindi fesi MASRA, a Gado fu den, e taki sortu sondu den du. 4Den Lefitiman Yesua, Bani, Kadmiyel, Sebanya, Buni, Serebya, Bani nanga Kenani, ben tnapu tapu a podium e begi trangatranga na MASRA, a Gado fu den. 5Den Lefitiman Yesua, Kadmiyel, Bani, Hasabneya, Serebya, Hodia, Sebanya nanga Petakya, taki: “Un opo tnapu, dan un gi MASRA, a Gado fu unu, grani, now èn fu têgo!
Iya, meki sma prijse Yu, MASRA. Libisma no kan gi Yu nofo glori nanga grani. 6Na Yu wawan de MASRA, na Yu meki heimel, a moro hei heimel nanga den stari. Na Yu meki grontapu nanga ala san e libi na en tapu. Na Yu meki den se nanga ala san de na den ini. Na Yu e gi libi na ala sani. Ala den makti fu heimel e boigi èn anbegi Yu. 7Yu, MASRA Gado, ben teki Abram. Yu puru en na Ur ini Babilonia dan Yu kenki a nen fu en kon tron Abraham. 8Di Yu kon si tak' a de fu fertrow, Yu meki wan ferbontu nanga en. Yu pramisi en tak' Yu o gi den bakapikin fu en a kondre fu den Kananitisma, fu den Hetitisma, fu den Amoritisma, fu den Perisitisma, fu den Yebusitisma nanga di fu den Girgasitisma. Èn Yu du san Yu ben pramisi en, bika Yu e hori Yu na Yu wortu.
9Yu si fa den afo fu wi ben e pina na ini Egipte. Yu yere den di den bari kari Yu na a Riet Se. 10Yu sori Farao, ala den knekti fu en, nanga ala den sma fu en kondre bigi marki nanga wondru, fu di Yu si fa den ben e si den afo fu wi fu noti. Nanga den sani di Yu du drape, Yu meki bigi nen taki te tide sma e taki fu Yu. 11Yu prati a se na tu gi den fu den abra a se tapu drei gron. Yu fringi den wan di ben lon na den baka, ini a dipi watra. Leki ston den sungu ini a hebi sek'watra. 12Nanga wan wolku Yu ben e sori den te deiten, pe den ben mus go, nanga wan faya Yu ben e krin a pasi gi den te neti. 13Yu saka go tapu Sinaibergi èn kmoto fu heimel Yu taki nanga Yu pipel. Yu gi den bun sani na san den ben mus tan hori densrefi, wèt tapu san den kan bow, sani di den mus tan du nanga gebod di ben bun gi den.
14Yu leri den fu hori a santa sabatdei fu Yu èn Yu meki Moses komanderi den fu ori ala den gebod, den besroiti nanga den wèt fu Yu. 15Di angri ben e kiri den Yu gi den brede fu heimel. Di watra ben e kiri den Yu gi den watra fu a bergiston. Yu komanderi den fu go teki a kondre abra di Yu ben sweri tak' Yu ben o gi den. 16Ma den afo fu unu ben abi bigifasi èn den ben trangayesi. Den no ben wani hori den gebod fu Yu. 17Den no ben wani arki èn es'esi den fergiti den bigi wondru di Yu ben du gi den. Den tranga den yesi èn fu di no ben wani du san Yu taki, den teki wan fesiman fu tyari den go baka go libi leki srafu. Ma Yu na wan Gado di e gi pardon, Yu e sori bun-ati nanga sari-ati, Yu abi furu pasensi èn Yu furu nanga lobi. Dat' meki Yu no gwe libi den.
18Srefi di den meki a gowtu bulu èn taki: ‘Disi na Wi gado di puru wi na Egipte,’ 19Yu no tapu fu sori den furu sari-ati, èn Yu no gwe libi den ini a bigi dreisabana. Yu no puru a wolku di ben e sori den te deiten pe den ben mus go nanga a faya di ben krin a pasi gi den te neti. 20Yu gi den a bun Yeye fu Yu fu opo den ferstan èn Yu no tapu fu gi den Yu manna fu den nyan nanga watra fu den dringi. 21Fotenti yari Yu sorgu den ini a bigi dreisabana. Den no ben mankeri noti. Den krosi no ben e broko èn den futu no ben e sweri. 22Yu gi kownu nanga folku abra ini den anu. Yu prati den kondre fu den gi Yu pipel. Den teki a kondre fu kownu Sikon fu Hesbon abra nanga a kondre fu kownu Og fu Basan. 23Yu gi den furu pikin leki den stari na heimel. Yu tyari den go ini a kondre di Yu ben komanderi den afo fu den fu teki abra.
24Den pikin fu den kon ini a kondre èn teki en abra. Yu broko den Kananitisma di ben e libi ini a kondre saka gi den. San den ben wani den ben kan du nanga den kownu èn den sma fu a kondre. 25Den teki tranga foto abra nanga bun doti. Den teki oso di ben lai nanga gudu, watrabaki di ben diki kba, bun furu droifidyari, oleifdyari nanga froktubon. Den nyan someni leki den ben wani, den ben kon fatu èn den ben abi en bun fu den bun sani di Yu ben e gi den. 26Ne den no ben wani arki moro. Den kaka futu gi Yu èn den drai den baka gi a wèt fu Yu. Den kiri den profeiti fu Yu di ben e warskow den fu den drai kon baka na Yu. Den afrontu Yu srefsrefi. 27Ne Yu gi den abra na den feyanti di ben e pina den.
Ma te den ben de ini benawtu èn den ben kari Yu, Yu ben e yere den fu heimel. Dan fu di Yu ben abi furu sari-ati gi den, Yu ben seni ferlusuman di ben e ferlusu den fu den feyanti. 28Ma te ala sani ben e go bun baka, den ben e du den srefi ogri baka na Yu fesi. Dan Yu ben e gi den abra baka na den feyanti fu den meki den dati ben basi den. Dan den ben e bari kari Yu baka fu Yu yepi den, Yu ben e yere den fu heimel èn ala leisi baka Yu ben e ferlusu den fu di Yu ben e sari den.
29Yu ben e warskow den fu den hori a wèt fu Yu baka. Ma den ben abi heimemre. Den no ben wani hori den gebod fu Yu nanga den sani na san den ben mus tan hori densrefi. Ma a sma di e hori ensrefi na den e feni a libi. Den kaka den futu gi Yu, den ben trangayesi èn den no ben wani arki. 30Yu ben abi pasensi nanga den a wan yari baka a trawan. A Yeye fu Yu ben meki den profeiti warskow den. Ma den no ben wani arki. Na dat' meki Yu gi den abra ini anu fu difrenti folku. 31Ma Yu no puru na pasi fu di Yu ben e sari den. Yu no gwe libi den tu bika Yu na wan Gado di e sori En bun-ati nanga sari-ati.
32We dan, Gado fu wi, Yu bigi, Yu tranga sote, Yu de fu frede, Yu di e hori a ferbontu fu lobi, no si a nowtu di miti wi leki noti, a nowtu di miti wi, den kownu nanga den fesiman fu wi, den priester, den profeiti, nanga den afo fu wi. Sensi di den kownu fu Asur kon dyaso, a heri folku de ini benawtu, te tide.
33Ma awinsi san miti wi, bigi leti na fu Yu. Ini ala wi kruktudu, Yu sori wi tak' wi kan bow na Yu tapu. 34Den kownu, den fesiman, den priester nanga den afo fu wi, no hori a wèt fu Yu. Den no gi yesi na den gebod nanga den warskow fu Yu. 35Srefi di den ben abi wan eigi kownu, nanga den bogobogo blesi fu Yu, èn di den ben e libi ini a bigi gudu kondre di Yu ben gi den, den no ben wani dini Yu. Den no ben wani tapu tu nanga den kruktudu.
36Now wi na srafu ini a srefi kondre di Yu ben gi den afo fu wi, ini a srefi kondre di ben e gi wi ala san wi ben abi fanowdu, ini a srefi kondre dati, wi na srafu tide. 37Fu di wi sondu, den dorosei kownu di Yu poti abra wi, e feni ala a bun fu a kondre. Den na basi. San den wani den e du nanga wi nanga den meti fu wi. Wi de ini hebi benawtu.”
A pipel agri fu no libi so go moro fara
38Dan fu ala den sani di psa, wi leki pipel meki wan ferbontu poti tapu papira. Den edeman, den Lefitiman nanga den priester fu wi, poti den stampu na en ondro.
