1Di a kananiti kownu fu Arad, di ben e tan ini a Negebsabana, yere taki den Israelitisma ben de tapu a pasi fu Atarim e kon, a hari go feti nanga den dan a tyari wantu sma gwe leki srafu. 2Ne den Israelitisma pramisi MASRA taki: “Efu Yu gi a folku disi abra ini a makti fu wi, wi sa broko den foto fu den pis'pisi te na gron.” 3Dan MASRA arki san den Israelitisma aksi en. A gi a kananiti kownu abra ini den makti. Ne den Israelitisma kiri den alamala èn den broko den foto fu den pis'pisi te na gron. Dat' meki den e kari a presi dati Horma.
A kopro sneki
4Di den Israelitisma kmoto fu a Horbergi den hari go na a sei fu a Riet Se, bika den ben wani beni lontu a kondre Edom. Ma ondropasi den sma no ben abi pasensi moro. 5Dan den bigin krutu gi Gado nanga Moses taki: “Fu sanede yu meki wi kmoto na ini Egipte? Fu wi dede ini a sabana? Brede no de, watra no de èn wi e fuga fu a nyanyan disi di no abi tesi.” 6Ne MASRA seni takru sneki go tapu a folku. Den sneki ben e beti den èn furu fu den Israelitisma dede. 7Di dati psa a folku kon na Moses dan den taki: “Wi sondu, bika wi krutu gi MASRA nanga gi yu. Begi MASRA fu A seni den sneki gwe.” Ne Moses begi gi a folku. 8Dan MASRA taigi Moses taki: “Meki wan takru sneki poti tapu wan langa tiki. A sma di opo en ede luku a sneki na a tiki, no sa dede te wan sneki beti en.” 9Ne Moses meki wan kopro sneki dan a poti en tapu wan langa tiki. Ala sma di ben e opo en ede luku a kopro sneki te wan sneki ben beti en, ben e tan na libi.
10Baka dati den Israelitisma hari kmoto fu drape dan den meki den kampu na Obot. 11Di den kmoto fu Obot den meki den kampu ini a dreisabana, na a broko foto Abarim, di ben didon na oostsei fu Moab. 12Baka di den broko a kampu drape den hari go na a dal pe a Seredliba e lon, dan den meki den kampu drape. 13Baka dati den hari kmoto fu drape, dan den meki den kampu na abrasei fu Arnonliba. A liba disi e kmoto ini a kontren fu den Amoritisma èn a e lon psa ini a dreisabana. A liba disi e prati a kontren fu den Moabitisma nanga den Amoritisma. 14Fu dat'ede den e taki ini a buku fu den feti fu MASRA taki: “Waheb di didon ini Sufa, ini a dal fu a Arnonliba, 15den heihei pisi ini den dal, di e waka go te na Ar nanga pe a kontren fu Moab e bigin.” 16Fu drape a e go moro fara na Beer. Dati na a watrabron pe MASRA ben taigi Moses taki: “Kari a folku kon na wan, dan Mi sa gi den watra.” 17Ne Israel singi a singi disi:
“Watrabron, gi yu watra!
Un singi gi en, wan baka a trawan.
18A peti di den kownu ben diki,
di den heihei man fu a folku ben boro,
nanga den kownutiki,
nanga den wakatiki.”
Fu a dreisabana den hari go na Matana. 19Fu Matana den hari go na Nakaliyel èn fu Nakaliyel den hari go na Bamot. 20Fu Bamot den hari go na a dal fu Moab, krosbei fu a Pisgabergi. Fu a moro hei pisi fu a bergi disi yu e si a sabana.
A feti nanga kownu Sikon
21Dan Israel seni boskopuman go na Sikon, a kownu fu den Amoritisma. Den ben mus aksi taki: 22“Tangitangi, gi wi primisi fu hari psa ini yu kondre. Wi no sa beni dan wi waka psa ini den gron noso den droifidyari fu yu. Wi no sa dringi watra fu den peti fu yu. Wi sa tan tapu a bigi pasi te leki wi psa a kondre fu yu.” 23Ma Sikon no ben wani fu Israel psa ini a kondre fu en. A kari a heri legre fu en kon na wan dan a hari go miti Israel ini a dreisabana dan den bigin feti nanga Israel na Yahas. 24Ma den Israelitisma kiri den ini a feti dan den teki a kondre fu den abra fu a Arnonliba te go miti a Yabokliba. A liba disi ben e prati a kondre fu den Amoritisma nanga di fu den Amonitisma. Ma a sei fu den Amonitisma ben tranga fu teki abra. 25Den Israelitisma teki ala den foto fu den Amoritisma abra dan den go libi na ini den. Srefi ini Hesbon nanga ala den dorpu fu en. 26Hesbon ben de a foto pe Sikon, a kownu fu den Amoritisma ben e tan. A ben feti nanga a kownu fu Moab èn a ben puru a heri kondre na en anu te go miti a Arnonliba. 27Dat' meki den powemaman e taki:
“Kon na Hesbon
Bow a foto fu Sikon. Meki en moro tranga.
28Bika wan faya ben kmoto fu Hesbon,
fu a foto fu Sikon.
A bron Ar-Moab,
den wan di ben de na makti na den hei presi fu Arnon.
29Moab, yu mus luku bun!
Folku di e dini Kemos, yu lasi a feti!
Den manpikin fu yu ben abi fu lowe.
Den umapikin fu yu den teki leki srafu.
Sikon, a kownu fu den Amoritisma tyari den gwe.
30Un sutu un peiri go na en tapu.
Hesbon nanga Dibon lasi a feti.
Un broko a kondre fu den,
fu Nofak go miti Medeba.”
A feti nanga kownu Og
31Na so den Israelitisma ben go libi ini a kondre fu den Amoritisma. 32Dan Moses meki den go luku ini wan kibrifasi fa a foto Yaser tan. Baka dati den teki a foto nanga den dorpu fu en abra, dan den yagi den amoritisma gwe di ben e libi drape.
33Baka dati den drai dan de hari go na a sei fu Basan. Ne Og a kownu fu Basan hari kon miti den nanga a heri folku fu en fu feti nanga den na Edrei. 34Ma MASRA taigi Moses taki: “No frede en, bika Mi o gi en, en heri folku nanga a kondre fu en abra ini yu makti. Yu o du a srefi sani nanga en, leki fa yu du nanga Sikon, a kownu fu den Amoritisma di ben e libi na Hesbon.” 35Dan so den fon Og, den manpikin fu en nanga a heri folku fu en. Den fon den te na a laste man, dan den teki a kondre fu en abra.
