Nomru 27

_1-2Dan den umapikin fu Selofkad go tnapu na mofodoro fu a tenti pe yu kan miti nanga Gado fesi Moses, priester Eleasar, den edeman nanga a heri folku. Selofkad ben de a manpikin fu Hefer. Hefer ben de a manpikin fu Gilead. Gilead ben de a manpikin fu Makir. Makir ben de a manpikin fu Manase. Manase ben de a manpikin fu Yosef. Den nen fu den umapikin fu Selofkad ben de: Makla, Noa, Hogla, Milka nanga Tirsa. ₃Dan den umapikin fu Selofkad taki: “Wi p'pa dede ini a sabana, aladi a no ben de ini a grupu fu Korak, a grupu di ben kaka futu gi MASRA. A dede fu en eigi sondu ede. Ma a no ben abi manpikin. ₄Fu di wi p'pa no ben abi manpikin a nen fu en o dede gwe na mindri fu den tra famiri. Fu dat'ede un mus gi wi wan pisi gron na mindri den brada fu wi p'pa.” ₅Dan Moses poti a tori fu den na MASRA fesi. ₆Ne MASRA taigi Moses taki: ₇“Den umapikin fu Selofkad abi leti. Yu mus gi den wan pisi gron tu na mindri fu den brada fu den p'pa. Yu mus gi den a pisi gron di den p'pa bo kisi. ₈Den Israelitisma yu mus taigi taki: ‘Efu wan sma dede di no ben abi wan manpikin, un mus meki a umapikin kisi a pisi gron fu en. ₉Efu a no abi umapikin, dan un mus gi den brada fu en a pisi gron fu en. ₁₀Efu a no abi brada, dan un mus gi den brada fu en p'pa a pisi gron fu en. ₁₁Efu en p'pa no abi brada, dan a moro krosbei famiri fu en sa kisi a pisi gron fu en. Disi sa de wan sani di ala Israelitisma sa tan du, leki fu MASRA taigi Moses taki den mus du.’ ”

₁₂Dan MASRA taigi Moses taki: “Kren a Abarimbergi, dan yu e luku a kondre di Mi gi den Israelitisma. ₁₃Baka te yu si en, yu o dede go na den afo fu yu leki yu brada Aaron. ₁₄Bika di a folku ben e meki rigeri ini a Sinsabana na a watra, yu no sori lespeki gi Mi santa fasi na den fesi.” Disi ben psa na a watra fu Meribat-Kades ini a Sinsabana. ₁₅Dan Moses taigi MASRA taki: ₁₆“Meki MASRA, a Gado di e gi a libibro na ala sani di e libi, poti wan man gi a folku ₁₇di kan tyari den go moro fara èn di kan go na den fesi ini feti, fu a folku fu MASRA no de leki skapu di no abi wan skapuman.” ₁₈Ne MASRA taigi Moses taki: “Teki Yosua, a manpikin fu Nun. Na wan man di furu nanga a Yeye. Poti yu anu na en tapu ₁₉na fesi priester Eleasar nanga a heri folku, dan yu e komanderi en ala sani san a mus du leti na den fesi. ₂₀Gi en a grani di yu ben abi meki heri Israel yere. ₂₁Te a mus teki wan besroiti a sa go na priester Eleasar, dan a disi sa go na MASRA fesi nanga a Urimston fu luku san a mus du. A sa taigi Yosua nanga ala den Israelitisma efu den mus hari go feti noso te den no mus go.”

₂₂Dan Moses du ala sani leki fa MASRA ben taigi en fu du. A teki Yosua dan a poti en tnapu fesi priester Eleasar nanga a heri folku. ₂₃A poti en anu na en tapu, dan a taigi en san a mus du, leki fa MASRA ben taigi en fu du en.