Nomru 26

₁Baka di a siki ben tapu fu rigeri, MASRA taigi Moses nanga Eleasar, a manpikin fu Aaron taki: ₂“Teri ala den famiri fu Israel. Teri ala mansma fu tutenti yari nanga moro owru, di warti fu feti ini a legre fu Israel.” ₃Ne Moses nanga priester Eleasar kari den alamala kon na wan ini den bigi opo wei fu Moab, sei a Yordanliba, krosbei fu Yeriko. ₄Den kari ala mansma fu tutenti yari nanga moro owru, leki fa MASRA ben taigi Moses fu du.

Disi ben de den Israelitisma di ben hari kmoto na ini Egipte.

₅Ruben ben de a fosi manpikin fu Israel. Disi na den bakapikin fu Ruben. Yu ben abi Hanok, nanga den bakapikin fu en di den e kari a famiri fu den Hanokitisma. Palu, nanga den bakapikin fu en di den e kari a famiri fu den Paluwitisma. ₆Moro fara Hesron, nanga den bakapikin fu en di den e kari den Hesronitisma, nanga Karmi, nanga den bakapikin fu en di den e kari den Karmitisma. ₇Disi ben de den bakapikin fu Ruben. Den ben de fotenti-na-dri dusun seibi hondro nanga dritenti man. ₈Palu ben abi wan manpikin di ben nen Eliab. ₉Den manpikin fu Eliab ben den Nemuel, Datan nanga Abiram. Na a Datan nanga Abiram disi, tu prenspari Israelitiman, ben meki trobi nanga Moses nanga Aaron. Den ben du en makandra nanga Korak, nanga a grupu di ben waka baka Korak, di den disi no ben wani du moro san MASRA ben e taki. ₁₀Ma grontapu ben priti opo, swari den makandra nanga Korak. A grupu fu tu hondro nanga feifitenti man ben dede, fu di wan faya ben bron den kiri. Na so den ben tron wan eksempre di ben e meki trawan frede. ₁₁Ma den manpikin fu Korak no ben dede.

₁₂Disi na den bakapikin fu Simeon. Yu ben abi Nemuel, nanga den bakapikin fu en di den e kari den Nemuelitisma. Yamin, nanga den bakapikin fu en di den e kari den Yaminitisma. Yakin nanga den bakapikin fu en di den e kari den Yakinitisma. ₁₃Moro fara yu ben abi Serak nanga den bakapikin fu en di den e kari den Sarkitisma. Nanga Saul, nanga den bakapikin fu en di den e kari den Saulitisma. ₁₄Disi ben de den bakapikin fu Simeon. Den ben de tutenti-na-tu dusun nanga tu hondro sma.

₁₅Disi na den bakapikin fu Gad. Yu ben abi Sefon nanga den bakapikin fu en di den e kari den Sefonitisma. Hagi, nanga den bakapikin fu en di den e kari den Hagitisma. Suni, nanga den bakapikin fu den di den e kari den Sunitisma. ₁₆Osni, nanga den bakapikin fu en di den e kari den Osnitisma. Eri, nanga den bakapikin fu en di den e kari den Eritisma. ₁₇Moro fara yu ben abi Arod, nanga den bakapikin fu en di den e kari den Aroditisma. Nanga Areli, nanga den bakapikin fu en di den e kari den Arelitisma. ₁₈Disi ben de den bakapikin fu Gad. Den ben de fotenti dusun nanga feifi hondro sma.

₁₉Den manpikin fu Yuda ben de Er nanga Onan. Er nanga Onan ben dede ini a kondre Kanaan. ₂₀Den bakapikin fu Yuda ben de: Sela nanga den bakapikin fu en di den e kari den Selanitisma. Peres, nanga den bakapikin fu en di den e kari den Parsitisma. Nanga Serak, nanga den bakapikin fu en di den e kari den Sarkitisma. ₂₁Den bakapikin fu Peres ben de: Hesron, nanga den bakapikin fu en di den e kari den Hesronitisma. Nanga Hamul, nanga den bakapikin fu en di den e kari den Hamulitisma. ₂₂Disi ben de den bakapikin fu Yuda. Den ben de seibitenti-na-siksi dusun nanga feifi hondro sma.

₂₃Disi na den bakapikin fu Isakar. Yu ben abi Tola nanga den bakapikin fu en di den e kari den Tolaitisma. Puwa, nanga den bakapikin fu en di den e kari den Punitisma. ₂₄Yasub, nanga den bakapikin fu en di den e kari den Yasubitisma. Nanga Simron, nanga den bakapikin fu en di den e kari den Simronitisma. ₂₅Disi ben de den bakapikin fu Isakar. Den ben de siksitenti-na-fo dusun nanga dri hondro sma.

₂₆Disi na den bakapikin fu Sebulon. Yu ben abi Sered nanga den bakapikin fu en di den e kari den Sarditisma. Elon, nanga den bakapikin fu en di den e kari den Elonitisma. Nanga Yakleel, nanga den bakapikin fu en di den e kari den Yakleitisma. ₂₇Disi ben de den bakapikin fu Sebulon. Den ben de siksitenti dusun nanga feifi hondro sma.

₂₈Den manpikin fu Yosef ben de Manase nanga Efraim. ₂₉Disi na den bakapikin fu Manase: Yu ben abi Makir nanga den bakapikin fu en di den e kari den Makiritisma. Makir ben de a p'pa fu Gilead. Den bakapikin fu Gilead den ben e kari den Gileaditisma. ₃₀Disi na den bakapikin fu Gilead: Yu ben abi Iyeser nanga den bakapikin fu en di den e kari den Iyesritisma. Helek, nanga den bakapikin fu en di den e kari den Helkitisma. ₃₁Asriyel, nanga den bakapikin fu en di den e kari den Asriyelitisma. Sekem nanga den bakapikin fu en di den e kari den Sikmitisma. ₃₂Semida, nanga den bakapikin fu en di den e kari den Semidaitisma. Hefer, nanga den bakapikin fu en di den e kari den Hefritisma. ₃₃Selofkad, a manpikin fu Hefer, no ben abi manpikin. A ben abi umapikin èn den nen fu den umapikin fu Selofkad ben de: Makla, Noa, Hogla, Milka nanga Tirsa. ₃₄Disi ben de den bakapikin fu Manase. Den ben de feifitenti-na-tu dusun nanga seibi hondro sma. ₃₅Disi na den bakapikin fu Efraim: Yu ben abi Sutelak nanga den bakapikin fu en di den e kari den Sutalkitisma. Beker, nanga den bakapikin fu en di den e kari den Bakritisma. Nanga Takan, nanga den bakapikin fu en di den e kari den Takanitisma. ₃₆Disi na den bakapikin fu Sutelak: Eran nanga den bakapikin fu en di den e kari den Eranitisma. ₃₇Disi ben de den bakapikin fu Efraim. Den ben de dritenti-na-tu dusun nanga feifi hondro sma. Den ben de den bakapikin fu Yosef.

₃₈Disi na den bakapikin fu Benyamin: Yu ben abi Bela nanga den bakapikin fu en di den e kari den Balitisma. Asbel, nanga den bakapikin fu en di den e kari den Asbelitisma. Akiram, nanga den bakapikin fu en di den e kari den Akiramitisma. ₃₉Sefufam, nanga den bakapikin fu en di den e kari den Sufamitisma. Nanga Hufam, nanga den bakapikin fu en di den e kari den Hufamitisma. ₄₀Den manpikin fu Bela ben de Arditisma. Nanga Naaman, nanga den bakapikin fu en di den e kari den Naamitisma. ₄₁Disi ben de den bakapikin fu Benyamin. Den ben de fotenti-na-feifi dusun nanga siksi hondro.

₄₂Disi na den bakapikin fu Dan. Sukam nanga den bakapikin fu en di den e kari den Sukamitisma. Disi ben de den bakapikin fu Dan. ₄₃Ala den bakapikin fu den Sukamitisma ben de siksitenti-na-fo dusun nanga fo hondro sma.

₄₄Disi na den bakapikin fu Aser: Yu ben abi Yimna nanga den bakapikin fu en. Yiswi, nanga den bakapikin fu en di den e kari den Yiswitisma. Beria, nanga den bakapikin fu en di den e kari den Beritisma. ₄₅Fu den bakapikin fu Beria yu ben abi: Heber, nanga den bakapikin fu en di den e kari den Hebritisma nanga Malkiyel, nanga den bakapikin fu en di den e kari den Malkiyelitisma. ₄₆Aser ben abi wan umapikin di ben nen Serak. ₄₇Disi ben de den bakapikin fu Aser. Den ben de feifitenti-na-dri dusun nanga fo hondro.

₄₈Disi na den bakapikin fu Naftali: Yu ben abi Yakseel nanga den bakapikin fu en di den e kari den Yakselitisma. Guni, nanga den bakapikin fu en di den e kari den Gunitisma ₄₉Yeser, nanga den bakapikin fu en di den e kari den Yisritisma. Nanga Silem, nanga den bakapikin fu en di den e kari den Silemitisma. ₅₀Disi ben de den bakapikin fu Naftali. Den ben de fotenti-na-feifi dusun nanga fo hondro sma.

₅₁Den Israelitisma di den teri ben de siksi hondro na wan dusun nanga seibi hondro nanga dritenti sma.

₅₂Dan MASRA taigi Moses taki: ₅₃“A kondre mus prati gi den sma disi di teri. A sa de fu den. ₅₄Efu na wan bigi grupu, dan den mus kisi wan bigi pisi. Efu na wan pikin grupu, dan den sa kisi wan pikin pisi. Un mus luku omeni sma de ini a grupu di un teri te den o kisi wan pisi fu a kondre. ₅₅Un mus trowe a lot fu luku fa a kondre o prati, sortu pisi fu a kondre den lo mus kisi. ₅₆Ala sma sa kisi a pisi gron di a lot sori, den bigi grupu nanga den pikinwan.”

₅₇Disi na den bakapikin fu Lefitiman di den teri: Den Gersonitisma, di ben de den bakapikin fu Gerson. Den Kehatitisma, di ben de den bakapikin fu Kehat, nanga den Meraritisma, di ben de den bakapikin fu Merari. ₅₈Den na den bakapikin fu Lefi: den bakapikin fu Libni, den bakapikin fu Hebron, den bakapikin fu Makli, den bakapikin fu Musi nanga den bakapikin fu Korak. ₅₉Kehat ben de a p'pa fu Amram. A frow fu Amram ben de Yokebed a umapikin fu Lefi. A frow fu Lefi ben kisi Yokebed di den ben de na Egipte. Den pikin di Yokebed ben kisi gi Amram ben de Aaron, Moses nanga den sisa Miryam. ₆₀Den manpikin fu Aaron ben de Nadab, Abihu, Eleasar nanga Itamar. ₆₁Nadab nanga Abihu ben dede fu di den ben kon nanga faya di no ben fiti, na MASRA fesi. ₆₂Den ben de tutenti-na-dri dusun. Soso mansma fu wan mun nanga moro owru. Den no ben teri den Lefitisma makandra nanga den tra Israelitisma, bika den no ben kisi wan pisi fu a kondre fu densrefi.

₆₃Disi ben de den Israelitisma di Moses nanga priester Eleasar ben teri na ini den bigi opo wei fu Moab sei a Yordanliba, krosbei fu Yeriko. ₆₄No wan fu den sma disi ben de ini a Sinaisabana, di Moses nanga Aaron ben e teri den Israelitisma drape. ₆₅Bika MASRA taigi den taki: “Fu tru, den alamala o dede na ini a sabana.” Soso Kaleb, a manpikin fu Yefune, nanga Yosua, a manpikin fu Nun ben tan na libi.