Filemon 1

₁Gi wi lobi brada Filemon di e wroko makandra nanga wi,

Disi na wan brifi fu Paulus nanga wi brada Timoteus. Mi de na straf'oso fu Kristus Yesus ede. ₂Wi e skrifi a brifi disi tu gi sisa Apfia, gi Arkipus di e strei makandra nanga wi, nanga gi a gemeente di e kon makandra na yu oso. ₃Wi e winsi taki Gado wi P'pa, nanga Masra Yesus Kristus, sa sori un bun-ati èn gi un freide.

₄Ala leisi mi e taki mi Gado tangi te mi e prakseri yu na ini begi. ₅Bika mi yere fa yu lobi ala den sma fu Gado, èn fa yu e bribi ini Masra Yesus. ₆Mi e begi Gado taki den bun di yu e du gi trawan fu di yu e bribi, sa meki yu kon sabi ala den bun sani finifini san wi kan du gi Kristus. ₇Brada, a lobi fu yu e meki a ati fu den bribisma firi prisiri. Dat' meki mi breiti srefsrefi èn a e trowstu mi.

₈Dat' meki awinsi Kristus gi mi a leti fu komanderi yu fu du san yu mus du, mi no o du dati. ₉Ma fu lobi ede mi feni en moro bun fu aksi yu. Mi Paulus kon owru kba, èn a de so tu taki mi de na straf'oso fu Kristus Yesus ede. ₁₀Mi wani aksi yu fu du wan sani gi Onesimus. Mi e si en leki mi eigi pikin, bika ini a strafu san mi de, mi ben tyari en kon na bribi. ₁₁Fosi a no ben de no wan yepi gi yu, ma now a o de wan bigi yepi gi yu nanga mi. ₁₂Mi e seni en kon baka gi yu. Na mi ati mi seni kon gi yu. ₁₃Mi ben sa wani fu a tan nanga mi. Dan a ben kan yepi mi na ini yu presi, now di mi de na strafu fu di mi e panya a bun nyunsu. ₁₄Ma mi no wani du noti sondro fu yu sabi na fesi. Bika te yu e du wan bun, yu no mus du en nanga dwengi, ma nanga wan fri wani.

₁₅Bika a kan taki a gwe libi yu wan pisten, nomo fu no gwe noiti moro te a drai kon baka na yu. ₁₆Ma now a no de wan srafu nomo, a de moro leki wan srafu. A de wan lobi brada di mi srefi lobi furu. Now a o de wan moro bigi yepi gi yu, leki srafu èn leki brada na ini Masra. ₁₇So, efu yu e firi yusrefi wan nanga mi, dan mi e aksi yu fu teki Onesimus na ini yu oso, soleki fa yu ben o du nanga mi. ₁₈Efu Onesimus meki yu lasi fu di a gwe libi yu, noso efu a abi wan paiman na yu, yu kan poti dati na tapu mi nen. ₁₉Na mi Paulus e skrifi dya: Mi sa pai yu. Dan mi no e taki a tori tak' a paiman san yu abi na mi moro bigi, dati na yu srefi. ₂₀Iya brada, fu di wi de wan ini Masra, meki mi e aksi yu fu du mi a bun disi. Meki mi ati firi prisiri na ini Kristus.

₂₁Mi skrifi yu nanga a bribi taki yu o du san mi aksi yu, èn mi sabi taki yu o du moro leki dati. ₂₂Mi e aksi yu tu fu yu seti wan kamra gi mi pe mi kan tan. Bika mi abi a howpu taki Gado o meki mi kon baka na yu fu di yu e begi fu dati.

₂₃Epafras di sroto makandra nanga mi fu Kristus Yesus ede, e seni odi gi yu. ₂₄Markus, Aristarkus, Demas nanga Lukas e seni odi gi yu tu. Den man disi e wroko makandra nanga mi.

₂₅Meki a bun-ati fu Masra Yesus Kristus de nanga unu.