1Betre yu nyan wan drei pisi brede ini ala rostu,
dan fu de ini wan oso pe furu nyanyan de nanga trobi.
2Wan srafu nanga ferstan sa kisi moro makti
dan a manpikin di e tyari ensrefi tapu wan syenfasi,
èn a sa teki prati ini a gudu
makandra nanga den tra manpikin.
3Nanga faya sma e krin solfru nanga gowtu,
ma na MASRA e ondrosuku a ati fu libisma.
4Wan takru sma lobi arki te sma e taki ogri fu trawan,
sma di e lei lobi arki lei.
5A sma di e teki wan pôtisma meki spotu,
e afrontu a Wan di meki en,
èn a sma di e prisiri te ogri e miti trawan,
o kisi en strafu nomonomo.
6A grani fu owru sma na den granpikin,
èn a grani fu pikin na den m'ma nanga den p'pa.
7Leki fa wan don sma no man taki bun sani,
na so wan heihei sma no man puru lei tu ini a mofo.
8Tyuku de leki diriston gi a sma di gwenti pai en,
a e howpu taki sofasi ala sani sa waka bun gi en ala pe a e go.
9A sma di e gi tra sma pardon fu den sondu,
e suku fu tan bun nanga trawan,
ma a sma di e tan taki fu fowtu fu trawan,
e lasi mati.
10Wan koni sma e leri moro fu wan enkri warskow,
dan wan don sma fu wan hondro wipi.
11Wan takru sma e tyari soso problema,
dat' meki den e seni wan boskopuman go na en tapu di no abi sari-ati.
12A moro betre fu miti nanga wan uma beer di e suku en pikin,
dan fu miti nanga wan don sma nanga en donfasi.
13Efu yu pai bun nanga ogri,
a ogri no o kmopo moro fu yu oso.
14A bigin fu wan trobi de leki wan olo di wan sma e meki na wan dam.
Dat' meki yu mus tapu en es'esi fosi a no de fu hori moro!
15A sma di e no e leisi strafu gi wan ogri-ati sma,
nanga a sma di e leisi strafu gi wan sma di bun ini Gado ai,
de leki groskin sani gi MASRA.
16A no o du wan don sma no wan bun efu a abi moni,
bika a no abi ferstan, a no o man bai koni nanga en.
17A lobi fu wan mati de fu ala ten,
ma yu brada gebore fu yepi yu te nowtu miti yu.
18A sma di e seki anu fu tnapu dyaranti gi wan trawan,
na wan sma sondro ferstan.
19Wan sma di lobi ogri na wan sma di lobi trobi tu.
Wan sma di abi wan bigi mofo, na wan sma di o broko en neki.
20Wan sma nanga wan kruktu ati no e feni bun,
èn a sma di e lei o miti ogri.
21Wan pikin di don, de wan sari gi en p'pa,
a p'pa fu so wan pikin no sa prisiri.
22Wan ati di e breiti na wan bun dresi gi a skin,
ma wan ati di lasi howpu e swaki a skin.
23Wan ogri-ati sma e teki moni ondro tafra,
èn a e beni a leti.
24Wan sma di abi ferstan e luku nomo pe koni de fu feni,
wan don sma e luku heri grontapu sondro fu sabi san a e suku.
25Wan don pikin e meki en p'pa nyan en niri,
a e gi en m'ma di meki en poti na grontapu sari.
26A no bun fu meki wan sma di no fowtu pai wan butu,
ma a moro ogri fu wipi wan heihei sma.
27Wan sma di abi ferstan no e taki furu,
èn a wan sma nanga ferstan sabi fu hori ensrefi.
28Efu wan don sma hori en mofo, sma e si en leki wan koni sma,
efu a no e taki, sma e si leki en wan sma di abi ferstan.
