1Wan sma di no e moksi nanga trawan e prakseri ensrefi wawan,
a no e teki no wan bun rai.
2Wan don sma no e si en leki wan prenspari sani fu abi ferstan,
ma a wani taki nomo fa ensrefi e si sani.
3Pe ogri-ati fasi de, sma no e si sani fu noti tu,
èn wan sma di lasi en grani o kisi syen.
4Den wortu fu wan bun sma de leki dipi watra,
leki wan kriki pe a watra e lon,
leki wan bron fu koni.
5A no bun fu teki a sei fu wan ogri-ati sma,
èn fu poti a leti fu wan di no du noti na wan sei.
6Den sani di don sma e taki e tyari soso trobi,
den e meki taki sma e wani fon den.
7Den sani di wan don sma e taki nanga en mofo
e meki a broko en eigi neki,
a e fasi ensrefi nanga den sani di a e taki.
8Den wortu fu sma di e takitaki sani gersi switi sani,
sma e swari den go ini den bere.
9Wan sma di lesi fu wroko,
nanga wan sma di e tyari pori, na a srefi.
10A nen fu MASRA de leki wan tranga kibripresi,
den sma di bun ini Gado ai e lon go drape èn noti no e miti den.
11Wan guduman e si a gudu fu en leki wan tranga kibripresi,
leki wan hei skotu baka san noti no kan miti en.
12Heimemre e go na fesi, fosi wan sma fadon,
ma sakafasi e waka fesi grani.
13A sma di e piki fosi wan tra sma kba taki,
e du wan don sani èn a e gi ensrefi syen.
14A wani fu wan libisma kan hori en tnapu te siki kon,
ma efu wan ati lasi howpu, suma o man yepi en?
15A ati fu a sma nanga ferstan e kisi sabi,
èn a yesi fu koni sma e suku sabi.
16Wan sma di e gi kado e opo pasi gi ensrefi,
a e meki sowan sma kon mindri heihei man.
17A gersi leki a sma di e taki leki fosiwan na krutu-oso, e abi leti,
te leki a tra sma bigin tyari en tori kon na fesi.
18A lot kan koti wan trobi,
srefi mindri tu tranga man.
19Efu yu du wan trawan ogri a e tapu ensrefi gi yu
moro wan tranga foto.
Trobi de leki a greni fu wan tranga kibripresi.
20Wan sma abi fu tyari a bakapisi fu den sani di a e taki.
A sa nyan den froktu fu en mofo.
21Den sani di wan sma e taki kan tyari dede noso libi,
sma di lobi tak'taki mus tyari a bakapisi fu dati.
22Wan man di feni wan uma, feni wan bun sani.
MASRA sori en a bunfasi fu En.
23Wan pôtisma e aksi nanga sakafasi,
ma a guduman e piki grofu.
24Wan sma di abi furu mati e lasi ala san a abi es'esi,
ma wan trutru mati betre moro wan brada.
