1 A sma di e dringi furu win e bigin meki spotu,
a sma di e dringi tranga sopi e bigin meki babari,
a sma di e dringi drungu, no abi ferstan.
2 A hebi atibron fu wan kownu, na leki a babari fu wan lew,
a sma di wiki a atibron fu en, e prei nanga en libi.
3 Na wan grani gi wan sma te a no e hari taki,
ma don sma lobi a sani dati.
4 Wan lesiman no e drai doti te a ten doro fu du dati,
ma te a ten fu koti nyanyan doro
a e aksi ensrefi fa a du kon
taki en no abi.
5 Den prakseri fu wan sma de leki dipi watra,
ma wan sma nanga ferstan sabi fa fu tyari den kon na doro.
6 Furu sma feni taki den de fu fertrow,
ma wan sma di de fu fertrow trutru, tranga fu feni.
7 Wan sma di bun ini Gado ai e waka a bun pasi,
Gado e blesi den pikin fu en di e kon na en baka.
8 Te wan kownu o koti krutu,
a man yagi ala ogri, soso fu luku nanga en ai wawan.
9 Suma man taki: “Mi abi wan krin konsensi,
mi no abi no wan sondu?”
10 Tu sortu wegi, nanga tu sortu markikan,
wan fu seri sani, nanga wan fu bai sani,
den ala tu de wan groskin sani gi MASRA.
11 Yu kan sabi kba fa wan pikin tan, efu yu luku den sani di a e du.
Den sani di a e du e taigi wi efu na wan bun pikin di de fu fertrow.
12 A yesi di e yere nanga a ai di e si,
na MASRA meki ala tu.
13 No lobi sribi tumsi noso yu o kon tron wan pinaman,
ma opo go wroko, dan yu o abi nofo nyanyan.
14 A sma di e bai e taki: “Disi no bun! Disi no bun!”
Ma te a e gwe, a e meki bigi fa a feni den sani bai bunkopu.
15 Gowtu nanga diriston de fu feni nofo,
ma wan sma di e taki nanga ferstan no makriki fu feni.
16 Teki a tapusei krosi fu a sma
di tnapu dyaranti gi wan sma
di a no sabi,
gi en leki panti na wan doroseisma.
17 Nyanyan di wan sma fufuru kan switi gi en,
ma bakaten a o gersi leki na ston de ini en mofo.
18 Den sani di wan sma wani du o go bun,
efu a sidon prakseri bun fosi a o du en,
dat' meki fosi yu go feti wan bigi feti,
yu mus prakseri bun fosi.
19 Wan sma di e tak'taki sani, no man hori kibritori gi ensrefi,
dat' meki yu no mus moksi nanga sma di e tak'taki sani.
20 A sma di e fluku en p'pa nanga en m'ma,
o dede go ini dipi dungru.
21 Efu wan sma kon gudu tumsi esi,
a gudu no sa de wan blesi gi en bakaten.
22 No taki: “Mi o pai a sma baka di du mi ogri,”
ma fertrow tapu MASRA, A sa yepi yu.
23 Wegi sani nanga tu sortu wegi na wan groskin sani gi MASRA,
na wan ogri sani fu wegi nanga wan wegi di no soifri.
24 Na MASRA e poti fa a libi fu wan sma o waka,
dan fa wan libisma o man sabi fa en libi o de?
25 No pramisi Gado wan sani
sondro fu prakseri bun fosi efu yu o man du en.
Efu yu du dati yu o kon ini problema.
26 Wan kownu di koni sabi fa fu puru ogri-ati sma na trawan mindri,
èn a e strafu den hebi.
27 A yeye fu wan sma na leki wan lampu gi MASRA,
nanga en A e ondrosuku den moro dipi prakseri fu a sma.
28 Wan kownu di e sori lobi èn di de fu fertrow sa tan na makti,
lobi e meki taki a e tan kownu.
29 Yongusma e prodo nanga den krakti,
owrusma nanga den weti wiwiri.
30 Wan bun fonfon e puru ogri ini wan sma,
wipi e krin a ati fu en fu san no bun.
