1MASRA e tiri den prakseri fu wan kownu,
neleki fa A e tiri a watra fu wan kriki,
A e meki a go pe A wani.
2Ala sani san wan sma e du, bun na ini en eigi ai,
ma MASRA e luku fu sanede a e du den sani.
3Fu du Gado wani èn fu libi bun,
dati e gi MASRA moro prisiri dan fu tyari ofrandi gi En.
4Bigifasi nanga heimemre,
san de fu si ini a libi fu ogri-ati, na soso sondu.
5Den sani di wan sma di e wroko tranga poti fu du,
o tyari bun gi en,
ma wan sma di e du sani es'esi, o pina.
6Gudu di yu kisi fu di yu bedrigi trawan,
de leki wan smoko di e wai gwe esesi go ini a anu fu dede.
7A tranga nanga san den ogri-ati sma e du sani,
e srepi den go na den grebi,
bika den no wani du sani na tapu wan leti fasi.
8A sma di e bedrigi e waka kronkron pasi,
ma a sma di no e du ogri e du sani tapu wan leti fasi.
9A moro betre fu libi ini wan uku tapu a daki fu wan oso,
dan fu libi ini a srefi oso nanga wan uma di lobi meki trobi.
10A ogri-ati sma e angri fu du ogri,
a no abi sari-ati nanga tra sma.
11Te den e strafu a sma di e meki spotu,
a sma di no sabi furu e kon koni.
Te yu e gi wan koni sma leri,
a e kisi moro sabi.
12A Wan di e du sani nanga leti
e luku san e psa ini a oso fu ogri-ati sma,
èn A e meki bigi ogri miti den.
13Efu yu tapu yu yesi te wan pôtiman e bari suku yepi,
sma no o piki yu te yu o bari suku yepi tu.
14Efu yu gi wan sma wan moni bakabaka, a kan kowru en atibron,
wan kado ini en saka kan meki taki en ati no teki faya.
15Wan sma di bun ini Gado ai e prisiri te a e du bun,
ma gi den sma di e du ogri, a de wan bigi ogri.
16Wan sma di wani libi leki a lasi en ferstan,
o kisi ensrefi mindri den dedewan.
17Wan sma di lobi hori fesa,
o pina,
wan sma di lobi bigi nyanyan nanga dringi,
no o gudu.
18Den ogri-ati sma e kisi a strafu fu den sma di bun ini Gado ai,
èn den sma di no e tan waka na Gado baka,
e kisi a strafu fu den sma di e libi leki fa a fiti.
19A moro betre fu libi na ini wan dreisabana,
dan nanga wan uma di e krutukrutu èn lobi meki trobi.
20Furu diri gudu nanga oli de fu feni ini a oso fu wan koni sma,
ma wan don sma e kba ala sani esesi.
21A sma di e meki muiti fu du Gado wani èn fu sori lobi,
o libi langa,
sma o libi tapu wan leti fasi nanga en,
èn a o kisi grani.
22Wan koni man kan teki wan heri foto nanga dyadya srudati abra,
dan a broko a tranga skotu tapu san den ben e fertrow.
23A sma di e denki bun fosi a taki,
no e poti ensrefi ini problema.
24Wan sma nanga bigifasi nanga heimemre,
e teki ala sani meki spotu,
so wan sma abi heimemre psa marki.
25Den sani di wan lesiman e angri fu abi, o kiri en,
bika en anu lesi tumsi fu wroko.
26Furu sma de di wani moro nanga moro,
ma a sma di bun ini Gado ai, e gi,
a no e hori noti fu densrefi.
27A ofrandi fu wan ogri-ati sma na wan groskin sani,
èn o moro, efu a du en nanga takru prakseri.
28Wan ketoigi di no de fu fertrow mus tapu en mofo,
ma a sma di e arki bun, kan taki te a kba.
29Wan ogri-ati sma e poti en fesi leki a sabi ala sani,
ma a sma di e libi leki fa a fiti sabi san a mus du.
30No koni, no ferstan, noso bun rai fu libisma,
abi warti gi MASRA.
31Yu kan meki yu asi klari gi a dei fu a feti,
ma na MASRA e gi a wini.
