1Neleki fa a no fiti fu sneeuw fadon ini waranten,
nanga alen ini dreiten,
na so grani no fiti wan don sma tu.
2Wan fluku di yu no fiti fu kisi,
de leki wan pikinfowru di e frei lontu nomo,
leki wan zwaluw di e hari psa.
3A wipi na fu a asi,
a titei gi a mofo fu a buriki,
a tiki gi a mindribaka fu a don sma.
4No piki wan don sma wan lawlaw fasi,
noso yu nanga en na a srefi.
5Ma piki en ini a don fu en,
fu a no prakseri taki a koni.
6A sma di seni wan don sma fu tyari wan boskopu,
de leki wan sma di kapu en eigi futu,
èn di suku bigi problema gi ensrefi.
7Wan leri di kmoto ini a mofo fu wan don sma,
de leki den futu fu wan lan sma.
A no abi no wan krakti.
8Fu gi wan don sma grani,
de leki te yu tai wan ston fasi ini wan slinger.
9Leki fa wan drunguman no e firi a maka di dyuku en ini en anu,
na so a leri di e kmoto ini a mofo fu wan don sma no e du noti tu.
10A basi di e teki don sma nanga drunguman fu wroko gi en,
de leki wan man di e sutu nanga bo
sondro fu luku pe a e sutu go.
11Leki fa dagu gwenti nyan san den e puru kon na doro,
na so don sma gwenti meki den srefi fowtu.
12Howpu de moro gi wan don sma,
dan gi wan sma di koni ini en eigi ai.
13A lesiman e taki: “Wan lew de na dorosei,
wan lew de na strati.”
14Leki fa wan doro e drai fu a wan sei go na a tra sei,
na so wan lesiman drai ini en bedi.
15Awinsi a lesiman dipi en anu go ini wan skarki,
a lesi srefi tumsi fu tyari en go na en mofo.
16Wan lesiman e si en srefi moro koni,
dan seibi sma di e piki tapu wan koni fasi.
17Wan sma di e sutu en mofo te tu tra sma abi trobi,
de leki wan sma di e grabu wan dagu di e psa na den yesi fu en.
18Leki fa wan lawman e sutu faya peiri e kiri sma,
19na so wan sma de tu di e bedrigi en mati,
dan a e taki: “Na spotu mi e meki.”
20Efu udu no de moro, a faya e dede,
efu sma no de di e taki sma sani,
trobi e tapu.
21Neleki fa krofaya nanga udu e meki a faya kon moro bigi,
na so wan sma di e suku trobi e meki trobi kon moro bigi.
22Den wortu fu sma di e takitaki sani, gersi switi sani,
sma e swari den go ini den bere.
23Switi wortu di e kmopo fu wan takru ati,
den de leki wan kleipatu nanga solfru na en tapu.
24A no e de fu yere ini a taki fu wan sma
taki a no lobi a trawan srefsrefi,
ma ini en ati a wani du en ogri.
25Awinsi a e taki switi nanga yu,
no fertrow en,
bika soso groskin prakseri de ini en ati
fu san a wani du nanga yu.
26Awinsi a e lei fu kibri taki a no lobi yu srefsrefi,
a o kon na krin gi ala sma.
27A sma di diki wan olo gi wan trawan,
o fadon srefi na ini,
èn a sma di lolo wan ston fu masi wan trawan,
a srefi ston dati o masi en.
28Wan sma di e lei, no lobi den sma gi san a e lei srefsrefi,
ma wan sma di e taki switi e tyari pori tu.
