1No meki bigi fu san yu o du tamara,
bika yu no sabi fa tamara o waka.
2No gi yusrefi grani,
ma meki wan tra sma gi yu grani,
meki a kmoto na ini wan tra sma mofo
èn no fu yu eigi mofo.
3Ston hebi èn santi no lekti tu,
ma a fuga di yu kan fuga nanga wan don sma,
hebi moro den ala tu.
4Atibron kan meki sma du sani sondro fu prakseri,
te wan sma ati teki faya a kan figi ala sani puru na pasi,
ma wan sma di e dyarusu, ogri moro den.
5Fu warskow wan sma leti fesi ala sma,
betre moro leki te yu no warskow en fu di yu lobi en.
6Efu wan mati taigi yu wan sani di e hati,
a du dati fu di a wani si bun fu yu,
ma den bosi fu wan feyanti furu.
7Wan sma di bere furu kba,
no e luku a moro switi oni srefi na wan ai,
ma gi wan sma di angri e kiri, a moro bita sani srefi e switi gi en.
8Leki wan fowru di frei lontu fara fu en nesi,
na so wan sma de tu di e waka lontu fara fu en oso.
9A smeri fu oleif-oli nanga wierook e meki yu firi prisiri,
ma moro switi gi a ati na a waran fu wan bun mati.
10No drai yu baka gi yu mati nanga a mati fu yu p'pa,
no go na yu brada oso tu te yu de ini problema,
bika wan sma di e libi krosbei fu yu
betre moro wan brada di e tan farawe.
11Mi boi, libi koni, dan yu e gi mi prisiri,
dan so mi kan piki den sma di e taki takru fu mi.
12Wan koni sma e si a ogri di e kon,
èn a e go kibri,
wan sma di no e denki, e waka go miti en,
èn a e tesi a bakapisi fu en.
13Teki a tapusei krosi fu a sma
di tnapu dyaranti gi wan trawan
di a no sabi,
gi en leki panti na wan doroseisma.
14Efu yu e bari wan birtisma trangatranga odi te fruku mamanten,
a odi e de leki wan fluku gi en.
15Wan uma di lobi meki trobi,
de leki wan daki di e leki dorodoro tapu wan alen dei.
16Leki fa yu no man fanga winti,
noso grabu oli hori,
na so yu no man meki a hori en mofo.
17Leki fa isri e srapu isri,
na so a wan libisma e srapu a trawan.
18Efu yu e sorgu bun gi wan froktubon,
yu o nyan den froktu fu en,
a knekti di e sorgu bun gi en basi,
o kisi grani.
19Leki fa wan sma kan si en eigi fesi ini watra,
na so a ati fu wan sma e sori suma a sma de trutru.
20Leki fa dedekondre noiti abi nofo,
na so a de tu nanga a ai fu libisma.
21Nanga faya sma e krin solfru nanga gowtu,
na a bun nen fu wan sma e sori suma a sma de trutru.
22Awinsi yu stampu wan don sma nanga wan matatiki,
awinsi yu stampu en makandra nanga graan ini wan mata,
a don no e kmopo na ini en.
23Yu mus sabi fa a e go nanga den skapu nanga den krabita fu yu,
sorgu bun gi den.
24Bika gudu no e tan fu têgo,
wan kroon no e tan fu têgo tu ini wan famiri.
25Te yu koti a fosi grasi èn a nyun wan e sproiti kon,
te yu koti a grasi na den bergifutu tyari kon na wan,
26dan yu o abi skapu di abi wiwiri fu yu kan meki krosi,
nanga bokoboko di yu kan seri fu bai wan pisi gron.
27Yu o abi nofo krabitamerki gi yu, gi den ososma fu yu,
nanga den umasrafu fu yu.
