A wèt fu Masra
1Den sma tapu san trawan no man sori finga
na blesi sma,
den di e libi leki fa a wèt fu MASRA e taki.
2Den sma di e hori densrefi na den sani fu Gado di den mus memre,
na blesi sma,
den di e suku En nanga den heri ati,
3den di no e du ogri,
ma di e libi leki fa En wani.
4Yu komanderi wi fu wi hori wisrefi finifini
na den gebod fu Yu.
5Tye, mi e winsi taki mi ben man tan du Yu wani,
fu hori misrefi na den sani di wi mus tan du.
6Dan mi no ben o kon na syen
fu di mi no hori misrefi na den gebod fu Yu.
7Mi sa prijse Yu nanga wan ati di wani du Yu wani,
te mi leri den bun sani na san wi mus tan hori wisrefi.
8Mi sa hori misrefi na den sani fu Yu di wi mus tan du,
no gwe libi mi fu têgo.
9Fa wan yongu sma kan libi krin ini Gado ai?
Efu a du san a wortu fu Yu e taki.
10Mi e suku Yu nanga mi heri ati,
yepi mi fu mi tan du san den gebod fu Yu e taki.
11Mi e kibri a wortu fu Yu ini mi ati,
fu mi no du wan sani di no bun ini Yu ai.
12Mi e prijse Yu MASRA,
leri mi fu du den sani fu Yu di wi mus tan du.
13Trangatranga mi e taki den sani baka di Yu ben taigi wi
taki wi mus tan hori wisrefi na den.
14Nanga prisiri mi e du den sani fu Yu di wi mus memre,
leki na wan bigi gudu mi kisi.
15Mi sa sidon prakseri den sani di Yu komanderi wi fu du,
luku fin'fini fa Yu wani taki mi mus libi.
16Mi sa prisiri nanga den sani fu Yu di wi mus tan du,
mi no sa fergiti a wortu fu Yu.
17Du bun gi Yu knekti, dan mi sa libi
èn du san Yu wortu e taki.
18Opo mi ai fu mi si den wondru,
di kibri ini a wèt fu Yu.
19Mi de fu wan syatu ten dyaso na grontapu,
meki mi ferstan den gebod fu Yu.
20Mi e angri te fu dede fu hori misrefi ala ten
na den sani fu Yu na san wi mus tan hori wisrefi.
21Yu e strafu den sma nanga heimemre,
a fluku fu Yu de na den tapu,
tapu den di no e hori densrefi na den gebod fu Yu.
22No meki den kosi mi èn teki mi meki spotu,
bika mi e hori misrefi na den sani fu Yu di wi mus memre.
23Awinsi prenspari sma sidon fu meki mofo san den o du nanga mi,
Yu knekti sa tan memre den wèt fu Yu.
24Iya, den sani fu Yu di wi mus memre
e gi mi prisiri
na den e gi mi rai.
25Mi de fu dede,
ma hori mi na libi leki fa Yu ben pramisi.
26Mi ferteri Yu mi heri libi èn Yu piki mi.
Leri mi den sani fu Yu di wi mus tan du.
27Yepi mi fu ferstan san Yu e komanderi mi fu du,
dan mi kan memre den wondru fu Yu.
28Mi ati e sari,
gi mi krakti leki fa Yu ben pramisi.
29Yepi mi fu mi no taki sani di no tru,
sori mi Yu bun-ati èn leri mi den wèt fu Yu.
30Mi teki a besroiti fu teki a tru pasi,
èn fu hori misrefi na den sani fu Yu,
na san wi mus tan hori wisrefi.
31Mi e hori tranga na den sani fu Yu di wi mus memre,
tye MASRA, no meki mi kon na syen.
32Mi de fayafaya fu libi leki fa den gebod fu Yu e taki,
bika Yu e meki mi e ferstan sani moro krin.
33Leri mi, MASRA, san den sani wani taki
di wi mus tan du,
dan mi sa du den solanga mi e libi.
34Gi mi ferstan fu mi kan hori a wèt fu Yu,
nanga mi heri ati mi sa du san a e taki.
35Yepi mi fu teki a pasi di den gebod fu Yu e sori mi,
bika na dati mi e angri fu du.
36Meki mi ati angri fu den sani fu Yu di wi mus memre,
èn no fu meki moni nomo.
37No meki mi lasi mi ten fu luku sani di no abi warti,
ma meki Yu pasi hori mi na libi.
38Du san Yu pramisi a knekti fu Yu,
di abi dipi lespeki gi Yu.
39No meki sma teki mi meki spotu,
mi frede dati sote,
ma den sani fu Yu bun,
na san wi mus tan hori wisrefi.
40Luku, mi e angri fu du den komanderi fu Yu,
ma hori mi na libi fu di Yu e du sani nanga leti.
41Tye MASRA, meki mi firi a bigi lobi fu Yu,
ferlusu mi leki fa Yu ben pramisi.
42Dan mi sa man piki den sma di e teki mi meki spotu
bika na tapu a pramisi fu Yu mi e fertrow.
43No meki mi tapu noiti fu taki a tru,
bika mi poti mi howpu tapu den sani fu Yu
na san wi mus hori wisrefi,
44fu mi kan tan hori misrefi na a wèt fu Yu
fu têgo èn alaten.
45Dan mi san man waka fri fu mi,
bika mi e meki muiti fu du san Yu komanderi.
46Mi sa ferteri kownu fu den sani fu Yu di wi mus tan memre.
sondro fu syen.
47Mi e prisiri nanga den gebod fu Yu,
mi lobi den sote.
48Mi e opo mi anu go na den gebod fu Yu
di mi lobi sote.
Mi e sidon prakseri den sani fu Yu
di wi mus tan du.
49No fergiti san Yu pramisi Yu knekti,
bika Yu gi mi howpu.
50Na a howpu di mi abi ini den problema fu mi,
taki a pramisi fu Yu o hori mi na libi.
51Awinsi fa den heimemre sma e teki mi e meki spotu,
mi e tan du san a wèt fu Yu e taki.
52Te mi prakseri den sani fu Yu na san wi mus tan hori wisrefi,
den sani di Yu gi wi someni langa kba,
MASRA, a de wan trowstu gi mi.
53Mi ati e bron te mi e si fa den ogri-ati sma
no e hori densrefi na a wèt fu Yu.
54Den sani fu Yu di wi mus tan du
na den wortu fu a singi di mi e singi
ini a kondre pe mi de leki wan doroseisma.
55MASRA, te neti mi e prakseri a nen fu Yu,
èn mi e hori a wèt fu Yu.
56Disi na san mi kisi
fu di mi e du san Yu e komanderi mi.
57MASRA, Yu na ala san mi abi fanowdu,
mi pramisi fu du san Yu taki.
58Nanga mi heri ati mi e suku a lobi fu Yu
sori mi Yu bun-ati leki fa Yu pramisi mi.
59Mi sidon prakseri a fasi fa mi mus libi,
mi o du den sani fu Yu baka di wi mus memre.
60Es'esi, sondro draidrai
mi o du san den gebod fu Yu e taki.
61Awinsi ogri-ati sma e seti sani fu fanga mi,
mi no sa fergiti a wèt fu Yu.
62Mi e opo te mindrineti fu prijse Yu,
fu den bun sani fu Yu na san wi mus hori wisrefi.
63Mi nanga ala sma di e lespeki Yu na mati,
nanga den di e hori densrefi na den komanderi fu Yu.
64MASRA, grontapu furu nanga a lobi fu Yu
leri mi den sani fu Yu di wi mus tan du.
65Tye MASRA, Yu du bun gi Yu knekti,
neleki fa Yu ben pramisi.
66Yepi mi fu teki den yoisti besroiti
èn gi mi moro koni
bika mi poti mi fertrow tapu den gebod fu Yu.
67Fosi Yu strafu mi, mi no ben teki a kruktu pasi,
ma now mi e du san Yu taki.
68Yu bun èn Yu e du soso bun,
leri mi fu du den sani fu Yu di wi mus tan du.
69Den sma nanga heimemre e suku fu pori mi nen,
ma nanga mi heri ati mi e tan du san Yu komanderi.
70Den no abi no wan firi gi a wèt fu Yu,
ma mi e prisiri nanga en.
71A benawtu ini san mi ben de ben bun gi mi,
a meki mi leri den sani fu Yu di wi mus tan du.
72A wèt di Yu gi wi bun gi mi
moro ala gudu fu grontapu.
73Na den anu fu Yu meki mi,
na den seti mi poti leki fa mi de,
gi mi ferstan tu fu mi kan leri den gebod fu Yu.
74Te den sma di e lespeki Yu si mi den e prisiri,
bika na tapu den pramisi fu Yu mi poti mi howpu.
75MASRA, mi sabi taki Yu e krutu sani tapu wan leti fasi,
èn dati Yu strafu mi fu di Yu de fu fertrow.
76Meki a lobi fu Yu trowstu mi,
leki fa Yu ben pramisi Yu knekti.
77Sori mi a sari-ati fu Yu,
bika mi e prisiri srefsrefi nanga a wèt fu Yu.
78Meki den sma nanga heimemre kon na syen,
bika den e du mi ogri nanga den lei fu den
ma mi e memre den komanderi fu Yu.
79Meki den sma di e lespeki Yu,
nanga den sma di sabi den sani fu Yu di wi mus memre,
kon na mi.
80Yepi mi fu du den sani fu Yu finifini di wi mus tan du,
fu mi no kon na syen.
81Mi e angri sote fu Yu ferlusu mi,
na tapu Yu wortu mi e howpu.
82Mi e angri fu si den sani di Yu pramisi mi,
oten Yu sa trowstu mi?
83Mi kon drei leki wan winsaka ini smoko,
ma mi no e fergiti den sani fu Yu di wi mus tan du.
84Olanga mi mus wakti ete Masra?
Oten Yu o strafu den sma di de nomonomo na mi baka?
85Den heimemre sma diki olo fu mi fadon na ini,
den di no e libi leki fa a wèt fu Yu e taki.
86Ala den gebod fu Yu de fu fertrow,
ma sma de di de nomonomo na mi baka
sondro taki mi du wan sani.
Kon yepi mi nanga den!
87Pikinso moro dan den ben kiri mi,
ma mi e tan du den sani di Yu komanderi.
88Meki a lobi fu Yu hori mi na libi,
dan mi kan du den sani di Yu ben taigi wi
taki wi mus memre den.
89Fu têgo, MASRA,
Yu wortu e tan tru na heimel.
90Fu têgo libisma kan bow na Yu tapu,
Yu poti grontapu tnapu èn a e tan tnapu.
91Heimel nanga grontapu de te nanga tide
fu di Yu poti sani na san den mus hori densrefi,
den alamala na knekti fu Yu.
92Na fu di a wèt fu Yu e gi mi prisiri,
meki mi no dede ini a nowtu ini san mi de.
93Noiti mi sa fergiti den sani di Yu komanderi,
bika nanga den Yu hori mi na libi.
94Mi na fu Yu, ferlusu mi,
bika mi e meki muiti fu du san Yu komanderi.
95Ogri-ati sma e luru mi fu puru mi na pasi,
ma mi e tan memre den sani fu Yu
di wi mus memre.
96Ala sani e kon na wan kba,
awinsi na wan sani di no abi no wan fowtu,
ma den gebod fu Yu no abi kba.
97Mi lobi a wèt fu Yu sote,
heri dei mi e sidon prakseri en.
98Den gebod fu Yu e meki mi koni moro mi feyanti,
ala ten mi e du san den gebod e taki.
99Mi abi ferstan moro ala den wan di gi mi leri,
bika mi e sidon prakseri den sani fu Yu
di wi mus memre.
100Mi srapu moro den owru wan,
bika mi e du den sani di Yu komanderi.
101Mi no wani abi not'noti fu du nanga ogri,
fu mi kan tan du san a wortu fu Yu e taki.
102Mi e tan hori misrefi na den sani fu Yu
na san wi mus hori wisrefi,
bika Yu e gi mi leri.
103Den wortu fu Yu switi na tapu mi tongo,
den switi moro oni ini mi mofo.
104Den sani di Yu komanderi meki mi kon srapu,
dat' meki mi no wani abi not'noti fu du nanga lei.
105Yu wortu de leki wan lampu di e go na mi fesi,
leki wan faya di e krin mi pasi.
106Mi meki wan sweri èn mi o hori mi na en,
taki mi sa hori misrefi na den bun sani fu Yu
na san wi mus hori wisrefi.
107A nowtu ini san mi de hebi tumsi,
tye MASRA, ma hori mi na libi leki fa Yu ben pramisi.
108Abi prisiri MASRA nanga den ofrandi fu mi mofo
di mi e tyari sondro dwengi gi Yu,
èn leri mi fu mi hori misrefi na den sani fu Yu,
na san wi mus tan hori wisrefi.
109Dorodoro mi e suku fu lasi mi libi,
ma mi no e fergiti a wèt fu Yu.
110Ogri-ati sma e seti sani fu fanga mi,
ma mi e tan du san Yu komanderi.
111Mi kisi den sani fu Yu di wi mus memre
leki wan gudu taki na fu mi,
na den e gi mi ati prisiri.
112Mi teki a besroiti ini mi ati
fu du den sani fu Yu di wi mus tan du,
fu têgo, te na a kba.
113Mi no lobi den sma di no e dini Yu nanga den heri ati,
ma mi lobi a wèt fu Yu.
114Yu na mi kibripresi, a Wan di e kibri mi,
na tapu Yu wortu mi e howpu.
115Un kmopo na mi tapu, un takru-ati sma,
fu mi tan du san den gebod fu mi Gado e taki.
116Kraka mi leki fa Yu ben pramisi, fu mi tan na libi,
no meki mi kon na syen fu a howpu di mi abi.
117Yepi mi, fu mi kan kon fri,
dan mi sa man tan prisiri nanga den sani fu Yu
di wi mus tan du.
118Yu e poti ibri sma na wan sei
di e no e tan du den sani fu Yu
di wi mus tan du,
na densrefi den e bedrigi.
119Ala den ogri-ati sma na grontapu
Yu e figi puru na pasi leki skuma,
dat' meki mi lobi den sani fu Yu di wi mus memre.
120Mi heri skin e beifi fa mi e frede gi Yu
mi e frede te Yu e leisi strafu.
121Mi du san bun èn mi du en tapu wan leti fasi,
no gi mi abra na den sma di e pina mi.
122Gi Yu knekti a dyaranti taki sani sa waka bun gi en,
no meki den sma nanga heimemre pina mi.
123Mi e angri fu si a ferlusu di Yu o tyari,
nanga a pramisi taki Yu o du sani tapu wan leti fasi.
124Sori Yu knekti a bigi lobi fu Yu,
èn leri mi den sani fu Yu di wi mus tan du.
125Mi na Yu knekti, gi mi ferstan,
fu mi kan sabi den sani fu Yu di wi mus memre.
126MASRA, disi na a ten fu Yu du wan sani,
bika sma e broko a wèt fu Yu.
127Ma mi lobi den gebod fu Yu,
mi lobi den moro gowtu,
iya, moro a moro fini gowtu.
128Dat' meki ini ala sani mi e hori misrefi na den komanderi fu Yu,
mi no wani abi not'noti fu du nanga lei.
129Den sani fu Yu di wi mus memre
na ferwondru sani,
dat' meki mi e du den nanga mi heri ati.
130Te den opo a wortu fu Yu
a e tyari leti kon,
a e meki den sma di no sabi furu,
kon srapu.
131A mofo fu mi e lon watra,
fu a angri di mi e angri fu den gebod fu Yu.
132Drai luku mi èn sori mi a bun-ati fu Yu,
leki fa a fiti den sma di lobi Yu.
133Tyari mi tapu a pasi leki fa Yu ben pramisi mi,
no meki no wan ogri basi mi.
134Ferlusu mi fu a pina di libisma e pina mi,
dan mi sa tan du san Yu komanderi.
135Luku Yu knekti nanga prisiri,
èn leri mi den sani fu Yu di wi mus tan du.
136Den ai fu mi e lon watra leki wan kriki,
bika sma no e du san a wèt fu Yu e taki.
137MASRA, Yu e du sani na tapu wan leti fasi,
den sani fu Yu bun
na san wi mus tan hori wisrefi.
138Den sani fu Yu di Yu gi wi fu memre
tru èn den de fu fertrow.
139Mi e kuku fu atibron,
bika den feyanti fu mi fergiti den wortu fu Yu.
140Yu wortu tru dorodoro,
no wan fowtu no de na ini,
Yu knekti lobi a wortu fu Yu.
141Mi no prenspari èn mi no de na teri,
ma mi no e fergiti den komanderi fu Yu.
142A du san Yu e du sani nanga leti de fu têgo,
a wèt fu Yu tru.
143Te mi de ini nowtu nanga benawtu,
den gebod fu Yu e gi mi prisiri.
144Den sani fu Yu di wi mus memre
bun fu têgo,
gi mi ferstan fu mi kan tan na libi.
145MASRA, mi e kari Yu nanga ala san de ini mi,
piki mi,
mi sa hori mi na den sani fu Yu di wi mus memre.
146Mi e kari Yu, ferlusu mi,
dan mi sa du den sani fu Yu di wi mus memre.
147Fosi dei krin mi e kari Yu fu Yu yepi mi
na tapu a pramisi fu Yu mi e howpu.
148Heri neti mi de na ai,
mi e sidon prakseri a wortu fu Yu.
149Arki mi, fu Yu lobi ede,
MASRA, hori mi na libi soleki fa a fiti na ini Yu ai.
150Den sma di de nomo na mi baka fu du mi ogri
den de krosbei,
den di no e du srefsrefi san a wèt fu Yu e taki.
151Ma Yu, MASRA, de krosbei fu mi,
ala den gebod fu Yu de fu fertrow.
152Bun langa mi sabi kba
taki den sani fu Yu di wi mus memre
de fu têgo.
153Si a bigi nowtu ini sani mi de èn yepi mi,
bika mi no e fergiti a wèt fu Yu.
154Taki gi mi fesi krutu èn ferlusu mi,
hori mi na libi leki fa Yu ben pramisi.
155Ferlusu no de gi den ogri-ati sma
bika den no wani sabi noti fu den sani fu Yu
di wi mus tan du.
156MASRA, a sari-ati fu Yu bigi,
meki den san fu Yu na san wi mus hori wisrefi
hori mi na libi.
157Den sma di de nomo na mi baka
nanga den feyanti fu mi, furu
ma mi no e tapu fu du den sani fu Yu
di wi mus memre.
158Te mi e si sma di drai baka gi a wèt fu Yu
mi no wan si den na ai srefsrefi,
bika den no e du san Yu wortu e taki.
159Ma luku fa mi lobi den sani di Yu komanderi,
MASRA, meki a lobi fu Yu hori mi na libi.
160Ala wortu fu Yu de fu fertrow,
ala den bun sani fu Yu na san wi mus tan hori wisrefi
de fu têgo.
161Prenspari sma de nomo na mi baka fu du mi ogri,
sondro taki mi du den wan sani,
ma mi abi lespeki gi den wortu fu Yu.
162Mi e prisiri nanga a wortu fu Yu,
leki wan sma di feni wan bigi gudu.
163Mi no lobi srefsrefi te sma e lei,
mi no wani abi not'noti fu du nanga den,
ma na a wèt fu Yu mi lobi.
164Seibi leisi wan dei mi e gi Yu grani,
fu bun sani fu Yu na san wi mus hori wisrefi.
165Den sma di lobi a wèt fu Yu
abi trutru freide
no wan ongoloku e kon tapu den pasi.
166MASRA, mi e fertrow na Yu tapu fu ferlusu mi,
mi e hori den gebod fu Yu.
167Mi e tan du den sani fu Yu di wi mus memre,
mi lobi den trutru.
168Mi e hori misrefi na den sani di Yu komanderi,
nanga den sani fu Yu di wi mus memre,
Yu e si ala san mi e du.
169Meki a bari di mi e bari suku yepi
doro te na Yu fesi, MASRA,
gi mi ferstan leki fa Yu ben pramisi.
170Meki a begi di mi e begi doro te na Yu fesi,
ferlusu mi soleki fa Yu ben pramisi.
171Mi mofo sa gi Yu furu grani,
bika Yu e leri mi den sani fu Yu di wi mus tan du.
172Mi mofo sa singi fu a wortu fu Yu,
bika ala den gebod fu Yu bun.
173Langa Yu anu yepi mi,
bika mi teki a besroiti fu du san Yu komanderi.
174Tye MASRA, mi e angri fu a ferlusu fu Yu,
mi e prisiri nanga a wèt fu Yu.
175Meki mi libi fu mi kan prijse Yu,
meki den sani fu Yu na san wi mus tan hori wisrefi
de wan yepi gi mi.
176Mi lasi pasi leki wan lasi skapu,
kon suku Yu knekti,
bika mi no fergiti den gebod fu Yu.
