Bribi nanga howpu
1Wan begi fu David.
Kibri mi, mi Gado,
bika Yu na mi kibripe.
2Mi taigi MASRA taki:
“Yu na mi MASRA,
ala bun e kon fu Yu.”
3Ma den gado ini a kondre disi,
den makti di misrefi ben e dini,
mi e taigi taki:
4“Furu sari e wakti den sma di e waka na un baka.”
Mi no e trowe brudu na gron moro gi den leki ofrandi.
Srefi a nen fu den no e kmopo ini mi mofo moro.
5MASRA, Yu na a pisi gron di mi kisi.
Na Yu e gi mi san mi abi fanowdu.
A libi fu mi de na ini Yu anu.
6Mi kisi wan moi pisi gron,
iya, a pisi di mi kisi e gi mi prisiri.
7Mi e prijse MASRA fu den rai di A e gi mi,
srefi neti mi konsensi e taki nanga mi.
8Dorodoro mi e prakseri MASRA.
Mi no sa fadon fu di A tnapu na mi let'sei fu yepi mi.
9Na dat' meki mi ati e prisiri, dat' meki mi breiti,
mi sabi taki noti no kan miti mi.
10Yu no o meki mi dede fosi mi yuru kisi,
Yu no o meki a sma di e tan waka na Yu baka,
go na en grebi.
11Yu o sori mi a pasi go na a libi.
Krosbei na Yu mi abi bogobogo prisiri.
Mi o abi wan switi presi na Yu sei fu têgo.
