Gado fiti fu kisi grani
1Gi a tiriman fu a singigrupu fu a tempel. Wan psalm fu David. Wan Singi.
2Gado di e libi ini Sion, a fiti fu wi gi Yu grani.
Wi o du san wi pramisi Yu.
3Yu di e yere begi,
ala libisma e kon na Yu.
4Te den kruktudu fu wi furu tumsi fu tyari,
Yu e gi wi pardon fu den.
5A sma di Yu teki puru mindri trawan fu kan kon krosbei na Yu,
na wan blesi sma,
a kan go kon ini Yu tempel.
Wi o kisi bogobogo fu a bun fu Yu oso,
bogobogo fu a santa tempel fu Yu.
6Yu e piki den begi fu wi nanga bigi wroko,
Gado, Yu e meki wi kisi wi leti èn Yu e ferlusu wi.
Sma di e libi te na den kbapisi fu grontapu,
sma fu te abra den moro fara se, e fertrow na Yu tapu.
7Nanga a krakti fu Yu, Yu poti bergi tnapu,
Yu tranga srefsrefi.
8Yu e tiri den se te den e rigeri,
den skwala te den seki,
nanga a opruru fu den folku.
9Na dat' meki libisma na alasei fu grontapu,
abi lespeki gi den marki fu Yu,
pe a son e opo nanga pe a e saka
Yu e meki sma bari fu prisiri.
10Yu e sorgu gi a kondre,
Yu e meki a kisi nofo watra,
Yu e gi en bun doti.
A liba fu Gado span nanga watra
Yu e meki a gron gi karu.
Iya, na so Yu e meki den klari.
11Yu e nati a gron te den drai a doti,
Yu e safu a doti nanga alen èn Yu e blesi den sani di prani.
12Yu e blesi a yari fu bogobogo nyanyan kan koti,
pe Yu e psa, bogobogo nyanyan e de.
13Den wei abi bogobogo grasi,
den lagi bergi e prisiri.
14Den meti ini den wei no de fu teri
karu e gro bogobogo ini den dal,
den e singi èn prisiri nanga makandra.
